Read MAASAI REVISED PROTESTANT 1 Ilaiguanak 21 Bible Online

1 Ilaiguanak 21 - MAASAI REVISED PROTESTANT bible

1 Ilaiguanak 21

¹Neeta apa Nabot le Yesreel enkurma oo lng'anayio te Yesreel, te mbata e nkaji e nkitoo e Ahab olaiguanani le Samaria.

²Ore nabo olong nejoki Ahab Nabot, “Nchooki nanu enkurma ino oo lng'anayio pee aitaa enkurma oo mbenek, amu ketaaniki enkaji ai. Naa kaaisho nanu enkurma sidai oo sabibu naa tenidol eishiaakino, naaisho elaakinoto enye too mpisai.”

³Kake etiaaka Nabot Ahab, “Too loo papa nanu atujung'o ena kurma, oo lng'anayio. Metomito Olaitoriani tenaa kaaisho nanu iyie.”

⁴Nelo Ahab enkaji enye eeta osina netagore te nkaraki ina natiaaka Nabot le Yesreel ninye. Amu etejo ninye, “Maaisho nanu iyie enjung'ore oo loo papa.” Neirrag ninye te ndapash enye, neibelekeny ninye endukuya enye aing'or idia alo neany enya endaa.

⁵Kake eewuo enkitok enye Yesebel enetii ninye nejoki, “Kainyoo pee eeta oltau lino osina eji neaku minya endaa?”

⁶Nejoki Ahab ninye, “Te nkaraki nairorie nanu Nabot le Yesreel, najoki nanu ninye, ‘Timirakaki nanu enkurma ino oo lng'anayio too ropiyiani, aashu tenidol eishiaakino, nawalu nanu tiae kurma oo lng'anayio.’ Newalu ninye ajo, ‘Maaisho nanu enkurma ai oo lng'anayio.’ ”

⁷Nejoki Yesebel ina kitok enye ninye, “Keton aa iyie oitore Israel? Tudumunye inosa endaa, nincho metishipayu oltau lino; amu kaaisho nanu iyie ina kurma oo lng'anayio e Nabot le Yesreel.”

⁸Neiger ninye mpala te nkarna e Ahab, netukuny ninche to lmishire lenye, neirriwaki lelo payiani o ltung'ana kituaak ooboitare Nabot teina anasa enye.

⁹Neiger ninye te nena palaajo, “Embalie enkolong naeni aapukoo, neishori Nabot enkitoo aaitulusoo too ltung'ana.

¹⁰Nipikipiki iltung'ana oaare atang'orok, meetu aaitang'or ninye. Naa nchoo ninche eishankarrarre ninye ejo, ‘Itediaa iyie Enkai o laiguanani!’ Nimbung'ubung'u taa ninye aaya auluo, ninang'inang'a too soito metua.”

¹¹Ore iltung'ana leina anasa, ilpayiani o lkituaak apa oomanya ina anasa, neas anaa enatolikio Yesebel ninche. Anaa enaigeroki te nena pala naaigeroko ninye ninche.

¹²Neibalunye ninche enkolong naeni aapukoo, neisho Nabot enkitoo aaitulusoo too ltung'ana.

¹³Ore ilooti tung'ana oaare aitang'orok, nepuonu aaitang'or ninye, nepuonu lelo le pesho aaishankarrare Nabot te dukuya iltung'ana, ejo, “Etediaa Nabot Enkai o laiguanani.” Neya ninche ninye auluo enkanasa nenang ninye metua too soito.

¹⁴Neitoki ninche aairriwaki Yesebel olkilikuai ejo, “Etanang'aki Nabot too soito, etua ninye.”

¹⁵Ore ake ina kata pee ening Yesebel nchere etanang'aki Nabot ometua too soito, nejoki Yesebel Ahab, “Inyo tudumunye, inyo shomo iwa enkurma oo lng'anayio apa nikitomitikio Nabot too mpisai. Amu meekure eishu Nabot, etua ninye.”

¹⁶Ore ake ina kata pee ening Ahab ajo etua Nabot, nedumunye Ahab adoyio alo aya enkurma oo lng'anayio e Nabot le Yesreel, pee eitaa enenye.

¹⁷Neitoki ororei lo Laitoriani alotu enetii Eliya le Tishbi ejo,

¹⁸“Tudumunye shomo tanang'are Ahab olaiguanani loo Siraeli, etii ninye Samaria. Ng'ura etii ninye atua enkurma oo lng'anayio e Nabot, neshomo ninye aya ine aitaa enenye.

¹⁹Shomo iyie tiaaki ninye, ‘Nji ejo Olaitoriani; Itara iyie oltung'ani metua niya ntokitin enyena?’ Nintoki ajoki ninye, ‘Nji ejo Olaitoriani; Ore ine wueji apa nemejie ildiein osarge le Nabot, teine epuo ildiein aamej osarge lino.’ ”

²⁰Nejoki Ahab Eliya, “Ekinepua nanu lo mang'atinta lai?” Newaliki ajoki, “Ee aainepua, amu itegelaka iyie kewan pee ias mbaa torrok te dukuya Olaitoriani.

²¹Kayau nanu entorroni shumata iyie, kaaiwuang'ie nanu iyie aishie, naiwuang'ie nanu te Ahab pooki lee, tiatua Israel, oloena o lolakuno.

²²Naa kaitotiu nanu enkaji ino anaa enkaji e Yeroboam olayioni le Nebat, o enkaji e Baasha olayioni le Ahija, te nkaraki ena goro nikintagoro nanu o te nkaraki sii nitorikoko Isiraeli metaasa ing'ok.

²³Ore tialo Yesebel neitoki Olaitoriani ajo, ‘Kenya ildiein Yesebel too lpolosien le Yesreel.’

²⁴Ore pooki ng'ae lo lmarei le Ahab oye tiatua enkanasa nenya ildiein; ore pooki ng'ae oye tiong'ata nenya ilmotonyi.”

²⁵Meetae apa oltung'ani otegelaka kewan aas imbaa torrok te dukuya o Laitoriani anaa Ahab oisisayie ninye enkitok enye Yesebel.

²⁶Etaasa ninye ntabo arubare nkitanyaanyukot. Etaasa ninye anaa apa Ilamori, laa ninche eiturrayie Olaitoriani te dukuya iltung'ana loo Siraeli.

²⁷Ore ake pee ening Ahab lelo rorei, nepolos nkilani enyena, neishopoki kewan ilkuniyiani, neen ninye apukoo neirrag too lkuniyiani, nelo ninye to sina.

²⁸Neitoki ororei lo Laitoriani alotu enetii Eliya le Tishbi, ejo,

²⁹“Itoduaa ajo eitoborro Ahab kewan te dukuya nanu? Ore te nkaraki naitoborro ninye kewan te dukuya nanu, mayau nanu entorroni too nkolong'i enyena. Too nkolong'i oo layiok lenyena nanu ayau entorroni shumata enkaji enye.”