Read MAASAI REVISED PROTESTANT 1 Ilaiguanak 22 Bible Online

1 Ilaiguanak 22 - MAASAI REVISED PROTESTANT bible

1 Ilaiguanak 22

¹Ore apa too larin okuni netoni iltung'ana le Israel o le Siria te seriani.

²Kake ore to lari liokuni nelotu Yehoshafat olaiguanani le Yuda enetii olaiguanani le Israel.

³Nejoki ilo aiguanani loo Siraeli isinkan lenyena, “Iyiololo intae aajo enaang oshi Ramot-gilead, naa eikigira oshi iyiook, mikiyieu nikiya aaoru olaiguanani le Siria?”

⁴Nejoki Ahab Yehoshafat, “Eikiriamariyie iyie nanu pee kipuo olarrabal te Ramot-gilead?” Newaliki Yehoshafat ilo aiguanani loo Siraeli, “Atiu ake nanu anaa enitiu, netiu iltung'ana laainei anaa enatiu iltung'ana linono, netiu mbartan aainei anaa ninono.”

⁵Nejoki Yehoshafat ilo aiguanani loo Siraeli, “Tang'asa naa nkilikuanu ororei oing'uaa Olaitoriani.”

⁶Neitoki ilo aiguanani loo Siraeli aiturrur iloibonok le Nkai tenebo, oobaya iip ong'uan, nejoki ninche, “Kalo nanu olarrabal aarare Ramot-gilead anaa aimalo?” Nejo ninche, “Ilepa shomo amu keishoru Olaitoriani apik inkaik o laiguanani.”

⁷Kake enyaaka Yehoshafat ajo, “Aimeekure etii ene likae oiboni lo Laitoriani likinkilikuanishore?”

⁸Nejoki ilo aiguanani loo Siraeli Yehoshafat, “Eton etii oltung'ani obo likindim aaikilikuanishore tialo Olaitoriani. Mikaia olayioni le Imla, kake kaiba nanu ninye amu maaibonoki aekata ninye embae sidai, intorrok ake aaibonoki.” Nejo Yehoshafat, “Mincho olaiguanani ejo neijia.”

⁹Neitoki ilo aiguanani loo Siraeli aipotu oltung'ani kitok nejoki, “Toriku ntasieku Mikaia olayioni le Imla.”

¹⁰Ore apa ina kata netonita olaiguanani loo Siraeli o Yehoshafat ilo aiguanani le Yuda too lorikan lenye le nkitoo, etukusote too lkilani lenye. Netoni ninche te wueji neidong'ishoreki te mbata enkishomi e Samaria. Neibonisho apa iloibonok pooki te dukuya ninche.

¹¹Ore Sedekia olayioni le Kenaana neitobiraki kewan imowuarak e sekenkei, nejo, “Nji ejo Olaitoriani, ‘Te kuna ipuopuo intae aarrumoo iltung'ana le Siria ometaba anaa neidaaya.’ ”

¹²Neibonisho iloibonok pooki aaiko neijia, nejo ninche, “Ilepa shomo Ramot-gilead timirisho; amu keishoru Olaitoriani apik inkaik olaiguanani.”

¹³Ore ilo tung'ani apa oirriwayioki meshomo aipotu Mikaia nejoki ninye, “Ore irorei loo loibonok pooki naa eisidain tialo olaiguanani; nchoo irorei linono metotiwuo anaa irorei liobo lenye, niro mbaa sidain.”

¹⁴Kake etejo Mikaia, “Ore anaa enaishu Olaitoriani, ina naajoki nanu Olaitoriani ninye alo airo.”

¹⁵Ore ake pee elotu ninye enetii olaiguanani, neikilikuan olaiguanani ninye ajoki, “Mikaia eikipuo iyiook olarrabal te Ramot-Gilead anaa aimikipuo?” Newalu ninye ajo, “Shomo timirisho, amu keishoru Olaitoriani apik inkaik olaiguanani.”

¹⁶Kake etiaaka olaiguanani ninye, “Ae katitin aja nanu aaikilikuan pee iro esipata ake te nkarna Olaitoriani?”

¹⁷Nejo ninye, “Atoduaa nanu Isiraeli pooki eidapashate too ldoinyo anaa ntare nemeeta olchekut; nejo Olaitoriani, ‘Meeta kulo olaitasheikinoni, nchoo ake errinyo pooki ng'ae enkang enye te seriani.’ ”

¹⁸Nejoki ilo aiguanani loo Siraeli Yehoshafat, “Keitu nanu aajoki iyie meibonu ninye embae sidai, kake entorrono eibonu?”

¹⁹Neitoki Mikaia ajo, “Entoning naa ororei lo Laitoriani: Atoduaa nanu Olaitoriani eton to lorika lenye le nkitoo. Ore olorora pooki le shumata neitashe te mbata enye te nkalo e tatene o te kedianye.

²⁰Nejo Olaitoriani, ‘Kaing'ae ilo olo alej Ahab, meilepa ninye alo metaari metua te Ramot-gilead?’ Nejo ake oltung'ani embae nabo nejo olikae enkae bae.

²¹Nelotu enkiyang'et naishu aitashe te dukuya Olaitoriani, nejo, ‘Kalo nanu alej ninye.’

²²Nejoki Olaitoriani ninye, ‘Eitiaa oitoi?’ Nejo ninye, ‘Kalo nanu aaku ololejisho too nkutukie oo loibonok pooki.’ Nejo ninye, ‘Ilo iyie alej ninye naa ilo aidimu ninye, shomo naa taasa ina.’

²³“Ore naa taata, etipika Olaitoriani oltau le lejare kulo oibonok pooki, eimaka Olaitoriani embae torrono tialo iyie.”

²⁴Nenyiku Sedekia olayioni le Kenaana neosh Mikaia eseder, nejoki, “Kaji eiko Enkiyang'et o Laitoriani tenepuku te nanu nelotu airo te iyie?”

²⁵Nejo Mikaia, “Ng'ura, ilo kenya adol teina olong nilo ajing'ie olgilata liaji isudori.”

²⁶Nejo ilo aiguanani loo Siraeli, “Embung'a Mikaia eyaki Amon olgafanai le nkanasa, o Yoash olayioni lo laiguanani;

²⁷nipuopuo aajo, ‘Nji ejo olaiguanani; Entipik ena tung'ani atua jila nintotiti ninye too mukateni o te nkare ake ometaba anaa narrinyunye te seriani.’ ”

²⁸Nejo Mikaia, “Tenirrinyunye iyie te seriani, neitu naa aairorie nanu Olaitoriani.” Neitoki ajo, “Entoning lo tung'ana pooki!”

²⁹Kaae, nelo apa olaiguanani loo Siraeli o Yehoshafat olaiguanani le Yuda Ramot-gilead.

³⁰Nejoki olaiguanani loo Siraeli Yehoshafat, “Kalo nanu anapa pee alo olarrabal, kake nchopo iyie ilkilani linono le nkitoo.” Nelo olaiguanani loo Siraeli anapa nelo olarrabal.

³¹Neitanap apa olaiguanani le Siria lelo arikok le pokira tomoni uni oaare loo ngarrin oo mbartan, ejo, “Emiaar oltung'ani kitok aashu oloti, kake olkitok loo Siraeli ake entaar.”

³²Ore ake pee edol lelo akedok loo ngarrin oo mbartan Yehoshafat, nejo, “Kesipa olaiguanani le Israel.” Kaae neibelekenya aarare ninye, neyietu Yehoshafat aishir.

³³Ore ake pee edol lelo arikok loo ngarrin oo mbartan aajo mme olaiguanani loo Siraeli, nepal eitu eitoki aasujaa ninye.

³⁴Kake eteyietuo oltung'ani obo enkawuo enye, neng'or olaiguanani loo Siraeli eripata e long'o enye, to lgoo. Ore te nkaraki ina nejoki olaiguanani ilo arewani le ngarri enye oo mbartan, “Mbelekenyayu, iwaki matung'uai olarrabal, amu aatipikaki olbae.”

³⁵Neirowuaju olarrabal ina olong, neigarakino olaiguanani engarri enye eing'or enkalo oo ltung'ana le Siria. Ore pee eaku teipa neye ninye, ore osarge leina ng'oroto neiput oltiren leina garri oo mbartan.

³⁶Ore etaa kedoyio enkolong neibulu olkiyioi enkop pooki, eji, “Shomo pooki tung'ani enkanasa enye, nelo pooki tung'ani enkop enye!”

³⁷Kaae, neaku etua olaiguanani Ahab neyauni ninye Samaria; nepuoi aanukaa ninye te Samaria.

³⁸Nepuoi aaituku ina garri oo mbartan to lchorro le Samaria nemej ildiein ilo sarge lenye, ore inkituaak naaibor onyek neituku ate teilo sarge, te risioroto eilo rorei lo Laitoriani apa oiroro ninye.

³⁹Ore nkulie kiaasin e Ahab, o nena pooki naataasa ninye, o ina aji oo lala loo lkanchaoni apa natesheta ninye, o nena anas pooki apa naatesheta ninye, neigero tiatua embuku oo ntepen oo laiguanak loo Siraeli.

⁴⁰Kaae, neirura Ahab neye anaa loo menye, neitoreisho Ahasia te rishata enye.

⁴¹Neiteru Yehoshafat olayioni le Asa aitore Yuda to lari liong'uan le enkitoria e Ahab olaiguanani loo Siraeli.

⁴²Oloo larin tomoni uni o imiet apa Yehoshafat pee eiteru aitoreisho, neitoreisho ninye ilarin tikitam o imiet te Yerusalem. Ore apa enkarna e ng'otonye naa Asuba entito e Shilhi.

⁴³Nerubare ninye orrekie le Asa Papaai lenye, eitu ninye eibelekenya apaash easata oo mbaa sidain te dukuya Olaitoriani. Ore ake eyia eitu eyai iwuejitin neeika, ore iltung'ana neitayu ilasarri nepej enkorropil te nena wuejitin neeika.

⁴⁴Eitobira sii apa Yehoshafat osotua o laiguanani loo Siraeli.

⁴⁵Ore apa nkulie kiaasin e Yehoshafat, o ina kidimata enye naitodolua, o ina nashomo olarrabal, neigeroki tiatua embuku oo ntepen oo laiguanak le Yuda.

⁴⁶Ore olpisiai le lelo ooibor onyek apa ootelekutua too nkolong'i e papaai lenye, neishie ninche teinakop.

⁴⁷Meetae apa olaiguanani te Edom; olaiguanani oti ninye apa etegeluaki

⁴⁸neitobir Yehoshafat imelin e Tarshishi pee epuo Ofir aayau saabu; kake eitu ninche epuo, amu eidaaitie nena melin te Esiong'eber.

⁴⁹Neitoki Ahasia Olayioni le Ahab ajoki Yehoshafat, “Nchoo isinkan laainei epuo tenebo isinkan linono too melin.” Kake eitu enyorraa Yehoshafat.

⁵⁰Neirrag Yehoshafat airura neye anaa loo menye, nenukari te nkurare oo loo menye te nkanasa e Daudi nkuyiaa lenye. Neitoreisho Yehoram olayioni lenye te rishata enye.

⁵¹Neiteru Ahasia olayioni le Ahab aitoreisho te Israel te Samaria to lari le tomon oopishana le nkitoria e Yehoshafat olaiguanani le Yuda, neitoreisho ninye ilarin oaare te Israel.

⁵²Etaasa apa ninye embae torrono too nkonyek o Laitoriani, nerubare orrekie le papaai lenye, o rrekie le ng'otonye, o rrekie le Yeroboam olayioni le Nebat, laa ninye apa oitapong'oyie Isiraeli metaasa eng'oki.

⁵³Eisiaayia apa ninye Baal neserem ninye, neitagor Olaitoriani, Enkai e Israel, te pooki oitoi apa nataasa menye.