Read MAASAI REVISED PROTESTANT 1 Ilaiguanak 3 Bible Online

1 Ilaiguanak 3 - MAASAI REVISED PROTESTANT bible

1 Ilaiguanak 3

¹Eitobira apa Solomon osotua o Farao olaiguanani le Misiri; neyam ninye entito e Farao, neriku ninye atua enkanasa e Daudi, o metaba anaa neidip atesheta enkaji enye makewan o enkaji o Laitoriani o esuntai naman Yerusalem.

²Too wuejitin neeika apa epolosisho iltung'ana, amu meetae apa enkaji naidipaki aateshet naipotieki Olaitoriani.

³Kenyor apa Solomon Olaitoriani, nelo too nkikoot e Daudi papaai lenye. Kake keitayu apa ninye ilasarri nepej enkorropil too wuejitin neeika.

⁴Ore nabo olong nelo olaiguanani Gibeon apolosisho teine amu ine apa ewueji neika kitok, naa keishooyo apa Solomon ilasarri oopejori enkalifu te nchumata eilo perere lo lasar.

⁵Ore te Gibeon neipang'aki Olaitoriani Solomon te nkidetidet kewarie, nejoki, “Toomonu entoki niyieu naa kaaisho.” Nejo Solomon,

⁶“Intodolua iyie enyorrata kitok nauno to sinka lino Daudi, papa lai, te nkaraki nashomo ninye te dukuya iyie te supatisho, o too sipat o to ltau oitoriori tialo iyie, nimbung'a iyie te ninye ena nyorrata kitok nauno, ninchoo ninye olayioni otonie olorika lenye le nkitoo ena olong.

⁷Ore taata, Olaitoriani Enkai ai, intaa iyie osinka lino olaiguanani te rishata e Daudi papa lai, hoo ninye naa kara nanu enkerai, mayiolo nanu aipang'a nemayiolo atijing'u.

⁸Netii osinka lino atua iltung'ana linono litegelaka, olorere kitok, lemeidimi aaikena te nkumoi anaa aatayiolo esiana te nkumoi.

⁹Nchoo naa osinka lino endamunoto e ning'unoto pee etum aitoria ltung'ana linono, netum atumusu nerishu mbaa sidain o ntorrok, amu kaing'ae oidim aitoria ele orere lino kitok?”

¹⁰Etishipakine apa Olaitoriani nchere ena bae etoomono Solomon.

¹¹Nejoki Enkai ninye, “Ore te nkaraki ninkilikuanua ena, neitu iomonu enkishui naado te nkaraki enkishui ino, anaa karsisisho, anaa enkishui oo lmang'ati linono, kake itoomonoko kewan pee kinchori eyiolounoto pee imusu esidai,

¹²kaaitaas naa nanu taata te risioto o rorei lino. Kaaisho nanu iyie endamunoto e ng'eno nimusunye mbaa, metaa meetae olikinyaanyukie otulusoyie nemeetae oloyooki atiu anaa iyie te siadi iyie.

¹³Kaaisho sii nena neitu iomonu, karsisisho o enkanyit ometaa meetae likae aiguanani likintanyaanyukieki too nkolong'i inono pooki.

¹⁴Naa tenilo iyie too nkoitoi aainei, aibung inkitanapat aainei o nkikoot aainei, anaa apa enataasa papaai lino Daudi, naitoodor inkolong'i inono.”

¹⁵Neputunye Solomon neyiolou ajo enkidetidet ake, Neitoki alotu Yerusalem neitashe te dukuya osanduku lo sotua lo Laitoriani, neishooyo inkishoorot o lasarri oopejori, o lasarri le seriani, neitobir osirua te nkaraki isinkan lenyena pooki.

¹⁶Neitoki inkituaak are mulayoni aapuonu enetii olaiguanani neitashe te dukuya ninye.

¹⁷Nejo enkitok nabo e nena, “Oi olkitok lai, ore ena kitok o nanu naa enkaji nabo kimanya; naisho nanu eton kishula teina aji.

¹⁸Ore te nkolong e uni aidipa atoisho, neitoki sii ninye ena kitok aisho; naa iyiook ake, metii hoo likae tung'ani tenebo iyiook tiatua aji, iyiook ake pokira are naatii atua aji.

¹⁹Ore enkayioni ena kitok neye kewarie amu etepetayie ninye.

²⁰Nedumunye ninye te mpolos e nkewarie neya enkayioni ai te mbata ai ina kata eirura esinka ino, neirragie ninye to lgoo lenye. Neirragie ina kerai enye natua to lgoo lai.

²¹Ore pee ainyototo tadekenya aaitanak enkerai ai, nadol ajo etua; kake ore ake pee aaing'or nanu asipu tadekenya, nadol ajo mme enapa kerai natoiwuo.”

²²Kake etejo ina ae kitok, “A'a enaai ena kerai naishu, naa enino ena natua.” Neitoki enaduoo e dukuya ajo, “A'a, enino ina natua, naa enaai ena kerai naishu.” Neijia eikuna eiro te dukuya olaiguanani.

²³Neitoki olaiguanani ajo, “Ejo ake nabo, ‘Enaai ena kerai naishu, netua enkayioni ino’; nejo enkae; ‘A'a; amu enkayioni ino natua naa enkayioni ai ena naishu.’ ”

²⁴Neitoki olaiguanani ajo, “Eyakaki nanu olalem.” Neaku eyauaki olalem dukuya olaiguanani.

²⁵Nejo olaiguanani, “Entoor ina kerai naishu katitin are, ninchosho ematua nabo enkitok nabo ninchosho enkae rubata enkae kitok.”

²⁶Ore ina kitok apa naishu enkayioni enye nejoki olaiguanani, te nkaraki naata ninye olng'ur to ltau te nkaraki enkayioni enye. “Oi olkitok lai, nchoo ninye meewa ina kerai naishu, nimimper ninye.” Kake etejo ina ae kitok, “Nchoo eaku mme enaai neme enino, tasasha ninye matoor.”

²⁷Neitoki olaiguanani awalu ajo, “Enchoo ena kerai naishu enkitok e dukuya, nimisashisasha ake amu ninye ng'otonye.”

²⁸Nening Israel pooki enkiguana natudung'o olaiguanani; neing'asiakino ninche olaiguanani; amu etumusutuo aajo etii eng'eno e Nkai atua ninye pee eiguana too sipat.