Read MAASAI REVISED PROTESTANT 1 Ilaiguanak 5 Bible Online

1 Ilaiguanak 5 - MAASAI REVISED PROTESTANT bible

1 Ilaiguanak 5

¹Eirriwaka apa Hiram olaiguanani le Tiro Solomon isinkan lenyena etoning'o nchere etuputoki Solomon aaitaa olaiguanani te rishata e papaai lenye, amu kenyor apa Hiram Daudi.

²Neirriwaki Solomon Hiram olkilikuai ajoki,

³“Iyiolo ajo eitu apa etumoki papaai lai Daudi atesheta enkaji te nkarna o Laitoriani Enkai te nkaraki olarrabal amu etang'adutua apa ilmang'ati lenyena ninye, ometaba anaa nepik Olaitoriani ninche abori inkejek enyena.

⁴Kake ore taata, aaishoo nanu Olaitoriani Enkai ai enkiyeng'iyeng te pooki shoto. Metii olmang'atinta nemetii enyamali.”

⁵Neaku atejo kashetu enkaji te nkarna o Laitoriani Enkai, anaa apa enatiaaka Olaitoriani Daudi papaai lai, ‘Ore olayioni lino laa ninye nanu apik olorika lino le nkitoo, te rishata ino, ninye oshetu enkaji te nkaraki enkarna ai.’

⁶Ore naa taata ntanapisho pee aadung'okini ltarakua le Lebanon; ore ilaisiaayiak laainei, neibung'are ilaisiaayiak linono naa kalaaki nanu isinkan linono olekoisiaayio anaa enijo; amu iyiolo iyie ajo meetae likae oyiolo atuuroi iltarakua anaa iltung'ana le Sidon.

⁷Ore ake pee ening Hiram lelo omon le Solomon neshipayu oleng, nejo ninye, “Meisisi Olaitoriani ena olong, oishoo Daudi olayioni ng'en oitore ele orere kitok.”

⁸Neirriwaki Hiram Solomon olkilikuai ajoki, “Atoning'o nanu ilo kilikuai likirriwaka; naa kaas nanu nena pooki ninkilikuanua tialo mbaoi o ltarakua o no lchani onyaanyukie oltarakuai.

⁹Keitadou ilaisiaayiak laainei lelo keek te Lebanon neyau embata enaiposha, neen ninche tenebo naaitadoiki te naiposha meetu ewueji niyieu naisho ninche meiperri teine, ning'amaa iyie ninche; ore te nkalo ino naa kayieu nincho iltung'ana laainei endaa.”

¹⁰Neaku eishoo apa Hiram Solomon mbaoi pooki o ltarakuai o nolerai naaba anaa inaayieu,

¹¹neisho Solomon Hiram mboreitin e mpirbil inkalifuni tikitam e nkano meitaa endaa enkaji enye, o mboreitin e mpirbil e ilata nkalifuni tikitam. Neisho Solomon Hiram kuna te pooki ari.

¹²Neisho Olaitoriani Solomon eng'eno, anaa apa enaisiligie ninye, neaku ketii apa eseriani erishata e Hiram o Solomon, ore lelo pokira neitobir olning'o.

¹³Neitayu olaiguanani Solomon iltung'ana oas esiaai te Israel pooki, ore lelo tung'ana naa inkalifuni tomoni uni.

¹⁴Neirriwaa ninche meshomo Lebanon, nepuo ake iltung'ana inkalifuni tomon te nkata nabo to lapa, netii ake iltung'ana Lebanon to lapa obo, netii ang ilapaitin oaare. Adoniram apa olkitok le lelo tung'ana oasisho.

¹⁵Keeta sii apa Solomon iltung'ana inkalifuni ntomoni naapishana o naapisho o laguetak loo soito inkalifuni ntomoni isiet te nkop oo ldoinyo.

¹⁶Ore tenebo lelo etii sii iltung'ana kituaak le Solomon inkalifuni uni o iip uni ooitasheiki esiaai, ninche ooitasheiki lelo tung'ana oonapisho te siaai.

¹⁷Ore te nkitanapata o laiguanani, nenap ninche isoito sapuki; oogol enkinyiang'a pee etum aatipik olkitamanyunoto le nkaji too soito oogueta.

¹⁸Neaku ore apa ilashetak le Solomon o lashetak le Hiram, o ltung'ana le Gebal neas esiaai e nguetare neitobir mbaoi o soito pee eshet enkaji e Nkai.