Read MAASAI REVISED PROTESTANT 1 Ilaiguanak 7 Bible Online

1 Ilaiguanak 7 - MAASAI REVISED PROTESTANT bible

1 Ilaiguanak 7

¹Ilarin tomon ookuni apa etesheta Solomon enkaji enye, neidip ninye enchetata enkaji pooki.

²Etesheta ninye enkaji e ntim e Lebanon, ore enkadoro enye naa ntemat enkaina iip nabo, ore endapasho naa ntemat e nkaina onom, ore enkadoro eilep naa ntemat e nkaina tomoni uni, neteshetaki apa too lkererin ooiriamari okuni too ng'apeta o ltarakuai, o rishinani oltarakuai te shumata ing'apeta.

³Neimulumuli apa shumata lelo gilat te lelo tarakua ootipikaki shumata nena ng'apeta artam oimiet, etii ake iltarakua tomon o imiet olkereri obo.

⁴Netii apa irubat oo lusien olkereri ake obo, netii apa ilusien aaipira too nkaloli pokira, katitin uni.

⁵Ore njing'eta pooki oo nkajijik o lusien naa kerisioro too nchot pooki. Ore ake elusie neipirakinore elusie katitin uni, eiriamari maare.

⁶Neitobir ninye enkaji Nalala oo Ng'apeta; ore enkadoro enye naa ntemat onom e nkaina, ore endapasho enye naa ntemat tomoni uni e nkaina. Netii apa olodungoro dukuya enye oitobiruno too ng'apeta, netii enkitushuret dukuya ninye.

⁷Neitobir ninye enkaji nalala o lorika le nkitoo teine nedung'ie ninye enkiguana, aa taa enkaji e nkiguana, neitobiri too ltarakua ebaiki oltiren o metabaiki shumata enye.

⁸Ore enkaji enye makewan naa ninye, etonie, tiae dung'oroto te siadi ina aji nalala, naa neijia ake eikunuwuaki olchetie. Enyaaka ake sii Solomon aitobiru enkaji natiu anaa ena aji nalala te nkaraki entito e Farao apa nayama.

⁹Eitobiruaki kuna pooki too soito oogol enkinyiang'a, ootaguetaki te risioroto naba anaa enairirikino, neiriri te musumeno, oriong o atua, ebaiki olkitamanyunoto o metabaiki shumata. Ore ebaiki endung'oroto e nkaji o Laitoriani o metabaiki endung'oroto kitok.

¹⁰Ore apa olkitamanyunoto naa oloo soito oogol enkinyiang'a, isoito sapuki oleng, isoito loo ntemat isiet anaa ntemat tomon enkaina.

¹¹Ore shumata naa isoito oogol enkinyiang'a, ooguetuno anaa enairirikino, tenebo iltarakua.

¹²Ore apa ina dung'oroto kitok neeta ilkererin okuni too soito ootaguetaki oomanita o lkereri loo loom loo ltarakua, neeta sii nena ina dung'oroto e atua e nkaji o Laitoriani, o lodung'oro ojing'ieki enkaji.

¹³Neirriwaa olaiguanani Solomon meyauni Hiram aaitung'uaa Tiro.

¹⁴Olayioni apa ninye le nkoliai o losho le Naftali, ore menye naa oltung'ani le Tiro, olaitobirani lo suyai; naa ng'en apa ninye oleng, neeta eng'eno nagut sapuk o ening'unoto o enkarriyiano te nkitobirata e pooki siaai o suyai. Nelotu ninye enetii olaiguanani Solomon, neas esiaai enye pooki.

¹⁵Eitobira apa Hiram ing'apeta are o suyai. Ntemat tomon oisiet enkadoro e ng'ape nabo, naa enkopito ntemat tomon oaare enkaina naaman ake eng'ape nabo negum nchumat enye. Ore apa enkirrushai enye naa ilkimojik oong'uan neijia apa eikununo ing'apeta pokira are.

¹⁶Neitoki sii aitobir intokiting e shumata naaikununo anaa nkopiyiani enkitoo, to suyai otosholaki, pee epiki shumata e nena ng'apeta; ore apa enkadoro entoki nabo naa ntemat imiet e nkaina.

¹⁷Neitoki aitobiru intokiting are naashetuno anaa ilmarisiani to lpisiai, nepik shumata nena ng'apeta, netii ake ina toki nashetuno anaa olmarisian shumata e ng'ape nabo netii enkae shumata enkae ng'ape.

¹⁸Neitoki ake sii aitobiru ilgululu oopurupurana oonyaanyukie kukumanka ilkererin oaare pee eitoip nena lukuny oo ng'apeta.

¹⁹Ore apa nena kikompeni naatii ilukuny e nena ng'apeta neitobiruaki anaa ntapuka, naa ntemat ong'uan e nkaina.

²⁰Netii apa nena kikompeni ilukuny e nena ng'apeta are, o shumata ina natii embata ena ripata olmarisian, netii apa ilgululu iip are, emanaa too lkererin oaare, naa neijia eikununo enkae toki te nchumata enkae ng'ape.

²¹Neitasheyie Hiram nena ng'apeta ntaloishin pokira are e wueji nejing'ieki enkaji e Nkai; nepik ninye eng'ape enkalo e kopikop nejo enkarna eine Yakini; neitoki, apik eng'ape enkalo e moikuape nejo enkarna enye Boas.

²²Ore too nchumat oo ng'apeta netii ntokitin naaitobiruaki anaa ntapuka sidain. Neaku eidipe apa esiaai oo ng'apeta.

²³Neitoki Hiram aitobir olmoti sapuk lo suyai otosholaki, naa kepurupurana ilo moti, naa ntemat tomon e nkaina ebaiki enchoto nabo e nkererema ometabaiki enkae shoto. Naa ntemat imiet e nkaina enkadoro ebaiki kop o metabaiki shumata. Naa ntemat tomoni uni emanaroto enye.

²⁴Ore abori enkererema enye netii iltuleta oomanita, ore lelo tuleta naa ilkererin oaare, neenikini ilo moti metaa entoki nabo.

²⁵Neitakedi ilo moti shumata iloing'ok tomon oaare lo suyai, neing'orita okuni lenye enkalo e moikuape, neing'orita okuni endoyioroto e nkolong, neing'orita okuni kopikop, neing'orita okuni enkalo o loo ntoluo; ore apa ilo moti naa shumata ninche eiteleikino. Ore enkalo enye pooki e siadi naa atua etii.

²⁶Ore endapasho enye neba anaa endap e nkaina, ore enkererema enye neikununo anaa enkererema e nkikompe, eikunuwuaki anaa entapukai sidai. Naa iltooi ooitukuoreki inkalifuni are enkare natii ilo moti.

²⁷Enyaaka sii Hiram aitobir inkejek tomon naatonie ilo moti. Ore ake enkitotonet nabo naa ntemat ong'uan e nkaina enkadoro, naa ntemat ong'uan e nkaina endapasho, naa ntemat uni e nkaina enkadoro nailep.

²⁸Ele apa olchetunei loo nkitotoneta. Etipikaki nkeek meibung'a enkamanaa e oriong,

²⁹ore nena keek naatipikaki enkamanaa e oriong naguetakino ilng'atunyo o loing'ok o lkerubi. Ore enchumata nena rubat te shumata o tiabori lelo ng'atunyo o loing'ok, netii ilmarisiani le siaai naikoduno.

³⁰Ore ake sii keeta ake enkitotonet nabo nkejek e ngarri o ng'uan o suyai o ltidii lo suyai, ore ilpijat pokira oong'uan naa ineeirisharieki ilo moti. Ore nena rishinani neikodoki too lmarisiani te pooki shoto.

³¹Ore enjing'et enye naa enchumata enye etii neilep enkadoro e ntemata nabo e nkaina, ore ina jing'et enye naa kepurupurana naa entemata nabo olpisiai enguton. Ore ina jing'et enye neeta imolinkaishi ore irubat enyena naa kerisioro nchot pooki, mepurupurana.

³²Netii apa nena kejek pokira ong'uan inkeek e abori. Ore apa nkeek naaibung inkejek naa entoki nabo o nkitotoneta. Ore enkadoro enkeju naa entemet nabo e nkaina olpisiai.

³³Neitobiraki apa nena kejek anaa nkejek oo ngarrin oo mbartan; ore nkeek enye o enkamanaa o ltidii o eneibung'are, naa ino suyai.

³⁴Neeta ake te pooki garri inkeek onguan naairishaa tiabori, naa nabo ninche o engarri.

³⁵Ore te nchumata e nkitotonet netii entoki napurupurana aa olpisiai le ntemata e nkaina enkadoro nailep; ore enchumata eina kitotonet, irishinani enyena o nkeek enyena naa entoki nabo o ina garri oo mbartan.

³⁶Ore tioriong nena rishinani o tioriong nkeek neguetaki ilkerubi o lng'atunyo o ltuka, te risioroto e rishata e nabo ake enye, neitaman olmarisian.

³⁷Ore tele rrekie neitobiru nkitotoneta tomon, neitobiruni pooki aaitanyaanyuk te risioroto o te mpukunoto.

³⁸Neitobiru ninye ilmotioo tomon lo suyai; ore ake olmoti obo neeta mboreitin oo ltooi artam ooitukuoreki, ore ake olmoti obo naa ntemat ong'uan e nkaina, etii ake olmoti nkitotoneta tomon.

³⁹Nepik ninye nena kitasheta imiet enkalo e kopikop eina aji, nepik imiet enkalo e moikuape enkaji, nepik ilo moti olpijata aaitorit kopikop o loo saen leina aji.

⁴⁰Eitobira sii apa Hiram imotioo, o nchempei naata ilala, o ng'irran. Neaku eidipa apa Hiram esiaai pooki nataasaka Solomon tialo ina aji Olaitoriani:

⁴¹nena ng'apeta pokira are, o lelo bakulini pokira oaare apa otii nchumat e nena ng'apeta, o nena sosin pokira are naaimulumul ilbakulini ootii nchumat oo ng'apeta.

⁴²O lelo gululu iip ong'uan le nena sosin pokira are, ilkererin oaare loo lgululu ake te sos nabo, pee eimulumul lelo bakulini oaare loo nchumat oo ng'apeta;

⁴³o nena kitasheta tomon o lelo motioo tomon ootii shumata nkitasheta tomon,

⁴⁴oilo moti obo, o lelo oing'ok tomon oaare ootii abori ilo moti.

⁴⁵Ore nena motioo, o nena kurteta, o mbakulini, ore kuna masaa pooki naatii atua enkaji o Laitoriani, apa naaitobiraka Hiram olaiguanani Solomon, naa ino suyai otisikaki.

⁴⁶Ore teina kisiashata e Yordan neiturraa olaiguanani ninche teinakop e nterit natii erishata e Sukot o Seretan.

⁴⁷Neing'ua Solomon nena masaa pooki eitu etemi aaineneng te nkaraki naa eikumok apa oleng. Ore enkiroishi o suyai neitu apa eyiolouni.

⁴⁸Neaku eitobira apa Solomon ntokitin pooki naatii atua enkaji o Laitoriani: ilo perere lo lasar le saabu, ina misa e saabu te nkaraki emukate naitisinyaki

⁴⁹o nkitasheta oo ltaai e saabu nasila, imiet te nkalo e kopikop o imiet te nkalo e moikuape, eitu ebaiki ilo gilata liatua; o ntapuka, o ltaai, o ntokitin naarieki iltaai e saabu:

⁵⁰o nkikompeni o nkalema o mbakulini, o ntokitin e nkorropil, o ng'irran e nkima e saabu te nkaraki nena kikeneta e kutukaji e atua ilo gilata liatua, ine wueji nesinya aisul, o nena kikeneta o lgos le nkaji e Nkai.

⁵¹Neaku ina siaai pooki apa etaasa olaiguanani Solomon neidipayu ina aji o Laitoriani. Neitoki Solomon ayau nena tokiting apa naaitisinya Daudi papaai lenye, ina osholai o ina saabu o nena masaa, neshum ninche te wueji neshumishoreki tiatua enkaji o Laitoriani.