Read MAASAI REVISED PROTESTANT 2 Ilaiguanak 1 Bible Online

2 Ilaiguanak 1 - MAASAI REVISED PROTESTANT bible

2 Ilaiguanak 1

¹Ore eidipa Ahab atua, negolong'u Moab apaashare Israel.

²Nesulunye apa Ahasia to lkitara le nkaji e shumata, te Samaria, neirrag ninye etamuoyia. Neaku eirriwayie ninye ilkiliku ajoki olorere, “Enchom enkilikuanishore Baalsebub, ina ai e Ekron tenaa kaishiu nanu tena muoyian.”

³Kake etiaaka olmalaika lo Laitoriani Eliya le Tishibit, “Tudumunye shomo tanang'are ilkiliku lo laiguanani le Samaria, nijoki ninche, ‘Te nkaraki nemeetae Enkai te Israeli pee ishomo aaikilikuanishore Baalsebub, ina ai e Ekron?’

⁴Ore naa taata, nji ejo Olaitoriani, ‘Mipuku iyie teina dapash nitii, kake esipa iye iyie.’ ” Nelo Eliya.

⁵Nerrinyo lelo tung'ana lo lkilikuai aapuo enetii olaiguanani, nejoki ninye ninche, “Kainyoo intae pee itorrinyunye?”

⁶Nejoki ninche ninye, “Eewuo oltung'ani anang'are iyiook, nejoki iyiook, ‘Entorrinyoto enchom enetii ilo aiguanani oirriwua intae, nijokiki ninye; Nji ejo Olaitoriani, Te nkaraki nemeetae Enkai te Israel pee irriwayie ilkiliku meshomo aaikilikuanishore Baalsebub, ina ai e Ekron? Ore te nkaraki ina midou iyie teina dapash nitii, kake iye iyie.’ ”

⁷Nejoki olaiguanani ninche, “Kaa pukunoto o ltung'ani ilo tung'ani oewuo anang'are intae, nejoki intae kuna baa?”

⁸Newaliki ninche ninye aajoki, “Eishopito enkila oo lpapit neeta enkeene e mpolos te mpolos enye.” Nejo olaiguanani, “Eliya le Tishibit ilo.”

⁹Neitoki olaiguanani airriwaki ninye olkitok le njore loo ltung'ana onom. Neilep ninye alo enetii Eliya, etonita te nchumata e ndoinyo, nejoki ninye, “Lo tung'ani le Nkai, ejo olaiguanani, ‘Tadou wou.’ ”

¹⁰Kake etiaaka Eliya ilo arikoni le njore loo ltung'ana onom, “Tenaa kara nanu oltung'ani le Nkai, nchoo edou enkima naing'uaa keper, nikinya iyie o lelo tung'ana linono onom.” Nedou enkima naing'uaa keper nenya ilo tung'ani o lelo tung'ana lenyena onom.

¹¹Neitoki olaiguanani airriwaki ninye o likae kitok le njore loo ltung'ana onom, tenebo iltung'ana lenyena pokira onom. Neilep ninye alo enetii Eliya nejoki ninye, “Lo tung'ani le Nkai, enkitanapata o laiguanani ena, ‘Tasioki tadou!’ ”

¹²Kake etawalikia Eliya ajoki ninche, “Tenaa kara nanu oltung'ani le Nkai, nchoo edou enkima naing'uaa keper nikinya iyie o kulo tung'ana linono pokira onom.” Nedou enkima e Nkai naing'uaa keper nenya ninye o lelo tung'ana lenyena pokira onom.

¹³Neitoki olaiguanani airriwaa olarikoni le ntukus e uni oo ltung'ana onom, tenebo iltung'ana lenyena onom. Ore ilo arikoni liokuni le njore loo ltung'ana onom, neilep alo. Nelotu agil kung te dukuya Eliya, nesai ninye ajoki, “Lo tung'ani le Nkai, aatoomono iyie, nchoo enkishui ai o enkishui e kulo sinkan linono menoto tipat too nkonyek inono.

¹⁴Ng'ura ajo etadowuo enkima naing'uaa keper nenya lelo arikok le njore loo ltung'ana maa onom, o lelo tung'ana lenye maa onom. Kake ore naa taata nchoo enkishui ai menoto tipat too nkonyek inono.”

¹⁵Neitoki olmalaika lo Laitoriani ajoki Eliya, “Tadoi shomo tenebo ninye; miureyu iyie ninye.” Nedumunye Eliya nedoyio alo tenebo ninye, enetii olaiguanani.

¹⁶Nejoki ninye, “Nji ejo Olaitoriani, ‘Ore te nkaraki irriwayie ilkiliku meshomo aaikilikuanishore Baalsebub, ina ai e Ekron, ke nkaraki nemeetae Enkai te Israel, pee inkilikuanishore too rorei lenyena? Ore te nkaraki ina midou iyie teina dapash nishomo, ajing, kake meeta nchere pee miye iyie.’”

¹⁷Neaku etua Ahasia te risioroto o rorei lo Laitoriani oiroro Eliya. Neaku Yoram olalashe lenye olaiguanani te rishata enye, to lari liaare le Yehoram olayioni le Yehoshafat, olaiguanani le Yuda. Amu meeta apa Ahasia olayioni.

¹⁸Ore apa nkulie kiaasin pooki e Ahasia naataasa ninye, neigero tiatua embuku oo ntepen oo laiguanak le Israel.