Read MAASAI REVISED PROTESTANT 2 Ilaiguanak 11 Bible Online

2 Ilaiguanak 11 - MAASAI REVISED PROTESTANT bible

2 Ilaiguanak 11

¹Ore ake pee edol Atalia ng'otonye Ahasia ajo etua olayioni lenye, nedumunye ninye aidaikie enkaji pooki e nkitoo.

²Kake ore Yehosheba, ina tito o laiguanani Yoram, enkanashe e Ahasia, neya Yoash olayioni le Ahasia, nepurroo ninye nelo aisudoo aitung'uaa lelo ayiok lo laiguanani apa ooji pee eari metuata, nepik ninye o enkaibung'ani enye atua olgilata oirragi. Neisudoo ninye te nkaraki Atalia, neaku eitu eari ninye metua.

³Neboitare Yoash ninye ilarin ile, eisudoo tiatua enkaji o Laitoriani, naa Atalia naitoreisho ina kata teinakop.

⁴Kake ore to lari liopishana neirriwaki olapolosani oji Yehoida olkilikuai lelo aitasheikinok loo larripok le nkaji e nkitoo, nejoki ninche pee epuonu enkaji o Laitoriani. Ore teine neinosie ninche olmumai pee ening'okino ina apa naitobira pee eas. Neitodol ninche olayioni lo laiguanani.

⁵Neitanap ninye ninche ajoki, “Ena bae intae enchom entaas: ore erubata inyi e uni, lelo ooipang'u aaing'uaa enkisiaayiare te nkolong e Sabato, nerrip enkaji o laiguanani

⁶netii enkae rubata e uni kishomi e Suri, ore enkae rubata e uni nelo kishomi natii oriong ilarripok, nerrip lelo enkaji e nkitoo.

⁷Ore ntukusi inyi are naapuonu enkisiaayiare te nkolong e Sabato, nerrip enkaji o Laitoriani,

⁸neman ninche aang'adu olaiguanani, oltung'ani ake eibung'ita imasaa enyena o larrabal te nkaina. Ore pooki ng'ae onyikaki lelo turrurri neari metua. Etaa tenebo o laiguanani teneipang auluo o tenejing'u.”

⁹Neas lelo kituaak le njore te risioroto e nena pooki naaitanapishe Yehoida olapolosani neriku ake pooki lenye oltung'ani lenye lemetii enkisiaayiare te nkolong e Sabato, tenebo lelo oopuonu aajing enkisiaayiare te nkolong e Sabato, nepuonu enetii Yehoida olapolosani.

¹⁰Neyaki ilo apolosani lelo kituaak le njore iremeta o long'oi apa naara ino laiguanani Daudi, naatii atua enkaji o Laitoriani;

¹¹neitashe lelo arripok neibung'ita ake pooki tung'ani imasaa enyena o larrabal too nkaik enyena, ebaiki enkalo e kopikop e nkaji o metabaiki enkalo e moikuape, neman olperere lo lasar o ina aji.

¹²Neipang'unye ninye ilo ayioni lo laiguanani neishopoki enkopiyia e nkitoo, neisho ninye shakenisho, neibalunyeki ninye aaitaa olaiguanani nebukokini eilata aaput. Neosh ninche inkaik ejo, “Metobikoi olaiguanani.”

¹³Ore ake pee eining'oo Atalia enkilepilep oo larripok tenebo iltung'ana, nelo ninye atua enkaji o Laitoriani ine netii iltung'ana;

¹⁴nejo aing'orisho, eitashe olaiguanani te mbata e ng'ape, anaa enatiu olkerreti lenye, ore ilarikok le njore o laoshok loo sekekuani ootashare olaiguanani o ltung'ana pooki leina kop, neshipa neosh intarumpetani. Nepolos Atalia nkilani enyena neishir ajo, “Entorroni! Entorroni!”

¹⁵Neitanap olapolosani Yehoida ilarikok le njore laa ninche apa ooitasheiki esikari ajoki, “Eyau ninye eimunye erishata oo ltimito naa iariara pooki tung'ani osuj ninye to lalem.” Amu etejo apa ilo apolosani, “Mincho eari ninye metua tiatua enkaji o Laitoriani.”

¹⁶Neaku eibung'a ninche ninye; neim ninye erishata e kishomi oo mbartan nelo enkaji o laiguanani, nepuoi aar ninye metua teine.

¹⁷Neitobir Yehoida olning'o te rishata o Laitoriani o laiguanani o ltung'ana, nchere keaku ninche iltung'ana lo Laitoriani; neitobir sii olning'o te rishata o laiguanani o ltung'ana.

¹⁸Neitoki iltung'ana pooki leina kop aapuo enkaji e Baal neuroo ninye, o lperereni lenyena loo lasarri. Ore inkitanyaanyukot enyena nebel aaitaa mbelibelat. Near Matan ilo apolosani le Baal metua te dukuya lelo pereren loo lasarri. Nepik ilo apolosani ilarripok ooing'or enkaji o Laitoriani.

¹⁹Neyau ninye lelo arikok le njore, o laitasheikinok le nkaji e nkitoo o larripok o ltung'ana pooki leina kop; neriku ninche pooki olaiguanani te nkaji o Laitoriani, nepuo aaim kishomi oo larripok, nepuo enkaji o laiguanani. Neton Yehoash to lorika le nkitoo lo laiguanani.

²⁰Neshipayu iltung'ana pooki leina kop. Neitirring'a ina anasa ina kata eidipaki aatar Atalia metua to lalem te enkaji o laiguanani.

²¹Oloo larin oopishana apa Yehoash pee eiteru aitoreisho.