Read MAASAI REVISED PROTESTANT 2 Ilaiguanak 13 Bible Online

2 Ilaiguanak 13 - MAASAI REVISED PROTESTANT bible

2 Ilaiguanak 13

¹Ore to lari le tikitam ookuni le nkitoria e Yoash olayioni le Ahasia, olaiguanani le Yuda, neiteru Yehoahas olayioni le Yehu aitoreisho te Israel o te Samaria, neitoreisho ninye ilarin tomon oopishana.

²Etaasa apa ninye mbaa torrok too nkonyek o Laitoriani nerubare ing'ok e Yeroboam olayioni le Nebat, naa ninche apa eitapong'orie Isiraeli. Eitu ninye eing'uaa nena ng'ok.

³Neyupuyup engoro o Laitoriani tialo Isiraeli, neishooyo ninche apik inkaik e Hasael olaiguanani le Siria, o nkaik e Benhadad olayioni le Hasael.

⁴Neitoki Yehoahas aishiraki Olaitoriani, nening Olaitoriani ninye; amu etoduaa ninye ina kibookinoto naibookoki Israel enkop, o ina naibooko ninche olaiguanani le Siria enkop.

⁵Ore te nkaraki ina eishoo Olaitoriani Isiraeli olaitajeunoni, neaku etajeutuo ninche too nkaik oo ltung'ana le Siria. Nebik iltung'ana le Israel too nkang'itie enye anaa apa ake.

⁶Ore ake eyia eitu ninche eing'uaa ing'ok e nkaji e Yeroboam, naa ninche apa eitapong'orie Isiraeli. Kake eibung'a ninye orrekie lenye, neitobik Asher te Samaria.

⁷Amu eitu apa eing'ueikini Yehoahas enjore oo ltung'ana onom loo mbartan o ngarrin oo mbartan tomon o ltung'ana nkalifuni tomon oopuo too nkejek. Amu eidaikie apa olaiguanani le Siria ninche neitotiu ninche anaa enterit te wueji neidong'ishoreki.

⁸Ore apa nkulie kiaasin e Yehoahas o nena pooki naataasa neigeroki tiatua embuku oo ntepen oo laiguanak le Israel.

⁹Neaku eirure Yehoahas etua anaa apa loo menye, nenukaa ninche ninye te Samaria neitoreisho Yoash olayioni lenye te rishata enye.

¹⁰Ore to lari le tomoni uni oopishana le nkitoria e Yoash olaiguanani le Yuda neiteru Yehoas olayioni le Yehoahas aitore Israel te Samaria, neitoreisho ninye ilarin tomon o ile.

¹¹Etaasa apa sii ninye mbaa torrok too nkonyek o Laitoriani, eitu ninye epaash ing'ok pooki e Yeroboam olayioni le Nebat, naa ninche eitapong'orie Isiraeli metaasa ing'ok. Kake eibung'a ninye orrekie lenye aas ing'ok.

¹²Ore apa nkulie kiaasin pooki e Yoash, o nena pooki naataasa, o ina magilanisho naa ninye etigilunore Amasia olaiguanani le Yuda, neigeroki tiatua embuku oo ntepen oo laiguanak le Israel?

¹³Neaku eirure Yoash etua anaa loo menye, netonie Yeroboam olorika lenye le nkitoo; nenukari Yoash te Samaria tenebo ilaiguanak le Israel.

¹⁴Ore apa pee ejing Elisha emuoyian naa ninye naawa, nelo Yoash olaiguanani le Israel enetii ninye neishir ninye te dukuya Elisha ejo, “Papaai lai, papaai lai! Ngarrin oo mbartan e Israel o lakedok lenyena loo mbartan”

¹⁵Nejoki Elisha ninye, “Iwa enkawuo o mbaa;” neya ninye enkawuo o mbaa.

¹⁶Neitoki ninye ajoki olaiguanani le Israel, “Teyietu enkawuo,” neyietu ninye, neiteleiki Elisha nkaik enyena endukuya o laiguanani.

¹⁷Neitoki ninye ajo, “Tabolo elusie te nkalo oloosaen,” nebol olaiguanani elusie. Neitoki Elisha ajoki ninye, “Tang'oroi embae,” neng'oroo olaiguanani embae. Nejoki Elisha, “Embae o Laitoriani e nkisulata embae e nkisulata namirieki Siria! Amu ilo aarare Siria te Afek ometaba anaa niishie ninche.”

¹⁸Nejo Elisha, “Iwa nena baa.” Neya olaiguanani nena baa. Nejoki ninye ilo aiguanani le Israel, “Tooshie nena baa enkop;” neoshie ninye enkop katitin uni, neitirring'a.

¹⁹Negorokino ilo tung'ani le Nkai ninye, nejoki, “Anaata naaji itooshie enkop katitin imiet anaa ile; naa anaata ilo aar Siria ometaba anaa niishie ninche, kake ore taata katitin uni ake ilo aosh Siria.”

²⁰Neaku etua apa Elisha nenukari ninye. Ore ilooti wuampan loo Lmoabu naa kegira apa aarasaki ina kop te rishata o loirujuruj teilo ari.

²¹Ore ina kata enukari oltung'ani otua, nedoli entukus eilo wuampa nenang'akini ilo tung'ani otua atua enkurare e Elisha; eji ore ake pee eiseyie ilo tung'ani iloik le Elisha, nepiu neitashe too nkejek enyena.

²²Ore apa Hasael olaiguanani le Siria neibooko Isiraeli enkop too nkolong'i pooki e Yehoahas.

²³Kake eing'urrie Olaitoriani ninche, neibelekenyakino ninche, te nkaraki osotua lenye o Abraham o Isaak o Yakobo, neaku meidaikie ninye ninche; nemearaa ninche aitung'uaa kewan ometabaiki taata.

²⁴Ore ake pee eye Hasael olaiguanani le Siria, neaku Benhadad olayioni lenye olaiguanani te rishata enye.

²⁵Neitoki Yehoash olayioni le Yehoahas aya te Benhadad olayioni le Hasael nena anas apa naatooruo ninye Yehoas papaai lenye to larrabal. Katitin uni etimira Yoash ninye nerrinyu nena anas oo Siraeli.