Read MAASAI REVISED PROTESTANT 2 Ilaiguanak 14 Bible Online

2 Ilaiguanak 14 - MAASAI REVISED PROTESTANT bible

2 Ilaiguanak 14

¹Ore to lari liare le nkitoria e Yoash olayioni le Yoahas, olaiguanani le Israel, neiteru aitoreisho Amasia olayioni le Yoash, ilo aiguanani le Yuda.

²Oloo larin tikitam o imiet apa ninye pee eiteru aitoreisho, neitoreisho ninye ilarin tikitam ooudo te Yerusalem. Ore apa enkarna e ng'otonye naa keji Yeho-adin e Yerusalem.

³Neas ninye mbaa sidain too nkonyek o Laitoriani, kake mme sii anaa apa Daudi papaai lenye. Etaasa ninye too mbaa pooki anaa enataasa papaai lenye Yoash.

⁴Kake eitu eiwuang'ieki iwuejitin neeika, eton ake eitayu iltung'ana ilasarri nepej enkorropil too wuejitin neeika.

⁵Ore ake pee eidipi aaishoo Amasia enkitoo metaa ninye olaiguanani, near ninye isinkan lenyena metuata, laa ninche apa ootasesekuana menye.

⁶Kake eitu ninye ear inkera e lelo tung'ana oata iloikop, te risioroto e nena naaigeroki te mbuku oo nkitanapat e Musa. Teine apa neitanapishe Olaitoriani ajo, “Meari iloo menye metuata te nkaraki nkera, nemeari nkera metuata te nkaraki loo menye; kake keye ake pooki ng'ae te nkaraki eng'oki enye makewan.”

⁷Etaara apa Amasia iltung'ana le Edom inkalifuni tomon metuata to erata le munyan, neya enkanasa e Sela to larrabal, neisho ninye enkarna ajo Yokteel, naa ninye enkarna enye o taata.

⁸Neitoki Amasia airriwaa ilkiliku meshomo enetii Yoash olayioni le Yehoahas, olayioni le Yehu, olaiguanani le Israel, ajoki, “Wou maing'urata iyiook too nkomomi.”

⁹Neitoki Yehoash olaiguanani le Israel airriwaki olkilikuai olaiguanani le Yuda, nejoki, “Etiaaka apa olkikuei lo ldoinyo le Lebanon oltarakuai, ‘Nchoru entito ino meyama olayioni lai.’ Nelotu eng'ues entim e Lebanon aim ine neituny ilo kikuei.

¹⁰Kesipa itoosho iyie Edom, nikinting'ida iyie oltau lino. Ndipakinoyu naa iyie te nkitoo ino nintirring'a tiang. Amu kainyoo iyie pee ing'oru enyamali ijo pee ibatata iyie tenebo Yuda.”

¹¹Kake eitu ening Amasia ina. Neaku etudumunye Yehoash olaiguanani le Israel alo, ore ninye o Amasia olaiguanani le Yuda neipirakino to larrabal te Bet-shenesh, e Yuda.

¹²Nemir Israel Yuda neisik pooki tung'ani alo enkang enye.

¹³Neibung Yehoash olaiguanani le Israel Amasia ilo aiguanani le Yuda, olayioni le Yehoash, olayioni le Ahasia te Betshe-mesh, nelotu Yerusalem neuroo esuntai e Yerusalem erishata oo ntemat e nkaina iip ong'uan, ebaiki kishomi e Efraim ometabaiki kishomi o lpijata.

¹⁴Neya ninye saabu pooki o enkosholai, o masaa pooki apa naainepuaki tiatua enkaji o Laitoriani, o tiatua ilchumat le nkaji o laiguanani o ltung'ana apa ootarayioki, neyau ninche Samaria.

¹⁵Ore nkulie kiaasin e Yehoash apa naataasa ninye, o enkidimata enye o ina nataarare Amasia olaiguanani le Yuda, neigeroki tiatua embuku oo ntepen oo laiguanak le Israel.

¹⁶Neirura Yehoash etua anaa loo menye, nenukari ninye te Samaria, tenebo ilaiguanak le Israel; neitoreisho Yeroboam olayioni lenye te rishata enye.

¹⁷Etobiko apa Amasia olayioni le Yoash, olaiguanani le Yuda, ilarin tomon o imiet, te siadi keeya e Yehoash olayioni le Yehoahas olaiguanani le Israel.

¹⁸Ore apa nkulie kiaasin e Amasia, neigeroki tiatua embuku oo ntepen oo laiguanak le Yuda.

¹⁹Nerresh ninche ninye te Yerusalem, neisikaki enkop e Lakish. Kake eirriwakita ninche iltung'ana le Lakish, nepuo ninche aar ninye metua teine.

²⁰Nenapu ninche ninye too mbartan; nepuoi aanukaa ninye te Yerusalem tenebo loo menye te nkanasa e Daudi.

²¹Neya iltung'ana pooki le Yuda Asaria, laa oloo larin tomon o ile, neitaa ninye olaiguanani te rishata e papaai lenye Amasia.

²²Etesheta apa ninye Elat nerrinyoki Yuda, ina kata eidipa olaiguanani atua tenebo loo menye.

²³Ore to lari le tomon o imiet le nkitoria e Amasia olayioni le Yoash, olaiguanani le Yuda, neiteru Yeroboam olayioni le Yoash, olaiguanani le Israel aitoreisho te Samaria. Neitoreisho ninye ilarin artam oobo.

²⁴Neas ninye mbaa torrok too nkonyek o Laitoriani. Eitu ninye epaash ing'ok pooki e Yeroboam olayioni le Nebat, naa ninche apa eitapong'orie Isiraeli.

²⁵Etorrinyuo ninye olpolosie pooki le Israel ebaiki enejing'ieki Hamat ometabaiki enaiposha e Araba, te risioroto eilo rorei lo Laitoriani, Enkai oo Siraeli, apa oiroro aimunye osinka lenye Yona olayioni le Amitai, ilo oiboni le Nkai; oing'uaa Gat-hafer.

²⁶Amu etoduaa apa Olaitoriani nchere ore ina kibookinoto e nkop oo Siraeli naa keme, amu meetae hoo obo otelekua, oloena anaa ololakuno, nemeetae oltung'ani oret Isiraeli.

²⁷Kake eitu apa ejo Olaitoriani keiwuang'ie enkarna e Israel tiabori keper. Neaku eitajewuo ninye ninche aitung'uaa enkaina e Yeroboam olayioni le Yoash.

²⁸Ore apa nkulie kiaasin e Yeroboam, o nena pooki naataasa ninye, o enkidimata enye, o larrabali lenyena, o ina natorrinyoko Israel Dameski o Hamat, naa ene Yuda apa, neigeroki tiatua embuku oo ntepen oo laiguanak le Israel.

²⁹Neirura Yeroboam etua anaa apa loo menye, lelo aiguanak le Israel. Neitoreisho Sakaria olayioni lenye te rishata enye.