Read MAASAI REVISED PROTESTANT 2 Ilaiguanak 16 Bible Online

2 Ilaiguanak 16 - MAASAI REVISED PROTESTANT bible

2 Ilaiguanak 16

¹Ore to lari le tomon oopishana le nkitoria e Peka olayioni le Remalia neiteru Ahas olayioni le Yotan, olaiguanani le Yuda aitoreisho.

²Oloo larin tikitam apa Ahas pee eiteru aitoreisho, neitoreisho ninye ilarin tomon o ile te Yerusalem. Neitu ninye eas mbaa sidain too nkonyek o Laitoriani Enkai enye, anaa apa enataasa papaai lenye Daudi.

³Kake eibung'a ninye orrekie loo laiguanak le Israel. Etapejoyie ninye olayioni leye aitaa olasar, te risioroto e ilo minong loo loshon apa ootaarayie Olaitoriani te dukuya Isiraeli.

⁴Neitayu ninye ilasarri nepejoo enkorropil too wuejitin neeika; o too nchumat oo ldoinyo, o tiabori pooki shani onyori.

⁵Neitoki Resin olaiguanani le Siria o Peka olayioni le Remalia, olaiguanani le Israel aapuonu aaitayunye Yerusalem olarrabal, neman Ahas aang'adu kake eitu emir ninye.

⁶Ore apa teina kata nerrinyu olaiguanani le Edom enkanasa e Elat, metaa ene Edom, nearaa iltung'ana le Yuda aitung'uaa enkanasa e Elat; nepuonu iltung'ana le Edom Elat nebik ninche teine o taata.

⁷Neaku eirriwaka Ahas ilkiliku Tiglat-pilesa olaiguanani le Asiria, ejo, “Kara nanu osinka lino, nara olayioni lino. Wou tokorduaki nanu too nkaik o laiguanani le Siria o too nkaik o laiguanani le Israel, amu aatarasakitia ninche.”

⁸Neitoki sii Ahas adumu enkosholai o saabu pooki natii enkaji o Laitoriani o atua ilchumat le nkaji o laiguanani, neirriwaa anaa enkishooroto aisho olaiguanani le Asiria.

⁹Nening olaiguanani le Asiria ninye. Nelo olaiguanani le Asiria agilunore Dameski, neya ninye, neya iltung'ana eyararoto te Kir, near Resin metua.

¹⁰Ore ake pee elo olaiguanani Ahas Dameski atumore Tiglat-pilesa olaiguanani le Asiria, nelo ninye olperere lo lasar otii Dameski. Neirriwaki olaiguanani olapolosani oji Uria empukunoto eilo perere lo lasar, o enkitobirunoto enye, o mbaa enyena pooki.

¹¹Neshetu ilo apolosani oji Uria olperere lo lasar oikununo anaa ilo, te risioroto e nena pooki naairriwaka ninye olaiguanani Ahas te Dameski, neaku eitobira olapolosani Uria ina, eton eitu ebau olaiguanani Ahas te Dameski.

¹²Ore ake pee errinyunye olaiguanani te Dameski nelo aing'or ilo perere lo lasar. Neitoki olaiguanani anyikaki ilo perere lo lasar nelo aked shumata enye,

¹³nepejoo ilasarri lenyena o lasarri le ntapa, nebukoki olasar opikuni, neisuaki osarge lenye lo lasar le seriani enchumata eilo perere lo lasar le seriani.

¹⁴Ore ilo perere lo lasar lo suyai apa otii dukuya Olaitoriani, neiwuang'ie ninye te dukuya enkaji, teine wueji e rishata olperere lenye lo lasar o enkaji o Laitoriani, nelo apik enkalo e moikuape eilo perere lenye lo lasar.

¹⁵Neitanap olaiguanani Ahas Uria, ilo apolosani, ejo, “Ore te nchumata eilo perere kitok lo lasar, entapejoi olasar le nkakenya opejori, o lasar teipa le ntapa opejori, o lasar lo laiguanani opejori o lasar lenye le ntapa o lasar opejori loo ltung'ana pooki leina kop o lasar lenye le ntapa o lasar lenye ooki, nisuakiki shumata ninye osarge pooki lo lasar opejori o sarge pooki lo lasar, kake ore ilo perere lo lasar lo suyai naa nanu ake olo aikilikuanishore.”

¹⁶Neas Uria ilo apolosani nena pooki anaa enaitanapa olaiguanani Ahas ninye.

¹⁷Nedung olaiguanani nena kitotoneta enkitashoto, neiwuang'ie ilo moti oitukuoreki aitung'uaa ninche, neiwuang'ie ilo moti le nkare aitung'uaa lelo mong'i ooitobiruno to suyai apa ootii tiabori, neiteleiki ninye isoito.

¹⁸Ore ine wueji apa neitobiraki te nkaraki Sabato, tiatua enkaji o laiguanani, o ina kishomi e auluo o laiguanani, neiwuang'ie ninye tiatua enkaji o Laitoriani, te nkaraki ilo aiguanani le Asiria.

¹⁹Ore apa nkulie kiaasin e Ahas naataasa neigeroki tiatua embuku oo ntepen oo laiguanak le Yuda.

²⁰Neirura Ahas etua anaa apa loo menye, nenukari ninye tenebo loo menye tiatua enkanasa e Daudi; neitoreisho Hesekia olayioni lenye te rishata enye.