Read MAASAI REVISED PROTESTANT 2 Ilaiguanak 17 Bible Online

2 Ilaiguanak 17 - MAASAI REVISED PROTESTANT bible

2 Ilaiguanak 17

¹Ore to lari le tomon oaare le nkitoria e Ahas olaiguanani le Yuda, neiteru Hoshea olayioni le Elan aitoreisho te Samaria, neitore ninye Isiraeli. Neitoreisho ninye ilarin ooudo.

²Neas ninye mbaa torrok too nkonyek o Laitoriani, kake eitu sii etiu anaa ilaiguanak le Israel apa ootii te dukuya ninye.

³Nelotu Shalmanesa olaiguanani le Asiria agilunore ninye. Neaku Hoshea osinka lenye, nelaaki ninye kodi.

⁴Kake enoto apa olaiguanani le Asiria enkitang'oroto te Hoshea; amu eirriwaka apa ninye ilkiliku Soo, olaiguanani le Misiri, neitu eitoki alaaki ninye kodi anaa apa enataasa too larin ootulusoitie. Ore te nkaraki ina neikenoo olaiguanani le Asiria Hoshea, neen tiatua jila.

⁵Neitoki olaiguanani le Samaria aibung ina kop pooki, nelotu Samaria. Ore too larin okuni, neman Samaria ang'adu.

⁶Ore to lari lioudo le nkitoria e Hoshea, neibung olaiguanani le Asiria Samaria, neya Isiraeli ootii Asiria nepik ninche enkanasa e Hala o embata olkeju le Habo o olkeju le Gosan o atua nkanas oo Lmedi.

⁷Netiu neijia, amu etaasa apa iltung'ana le Israel eng'oki tialo Olaitoriani Enkai enye, laa ninye oitayio ninche aitung'uaa enkop e Misiri, neitupuku te nkaina e Farao olaiguanani le Misiri. Eteserema ninche kulie aitin

⁸Neibung olkerreti le lelo oreren apa ootarayie Olaitoriani te dukuya iltung'ana le Israel, neibung lelo kerreti ooiteng'enishote ilaiguanak le Israel.

⁹Negolong'aki iltung'ana le Israel too nkisudorot mbaa torrok naaiba Olaitoriani Enkai enye, neas mbaa torrok. Eteshetakita ninche ate iwuejitin neeika too nkang'itie enye pooki, ebaiki oltalet ometabaiki enkanasa nasheta isunta.

¹⁰Etipikakita ninche ate ing'apeta o Asherim te pooki doinyo naado, o tiabori pooki shani onyori.

¹¹Ore teine nepuo aapejoo enkorropil too wuejitin pooki neeika anaa apa enataasa lelo oshon ooiwuang'ie Olaitoriani te dukuya ninche. Neas ninche mbaa torrok neitagor Olaitoriani.

¹²Neisiaai naa ninche inkitanyaanyukot naa ninche apa etiaakinye Olaitoriani ninche, “Emiaas intae ena.”

¹³Ore ake sii eikoo apa Olaitoriani Israel o Yuda te pooki oiboni le Nkai, o te pooki aduaani, ejo, “Embelekenyata entapaash inkoitoi inyi torrok, nimbung'ubung'u inkitanapat aainei, o nkikoot aainei, te risioroto e nena kitanapat apa naitanapa loo papaai linyi, o nena nairriwaka intae too sinkan laainei, lelo oiboonok le Nkai.”

¹⁴Kake eitu ninche ening, kake etogolong'akita anaa apa loo menye, amu eitu apa eiruk Olaitoriani Enkai enye.

¹⁵Etemenaitie ninche inkikoot enyena, oilo sotua lenye apa oitobira o loo menye o nena kikoot naaishoo ninye ninche. Eshomo ninche aasujaa nkitanyaanyukot neme Enkai, neaku ilootapong'ori, neibung ninche olkerreti le lelo oshon oomanita ninche, laa ninche apa eitanapa Olaitoriani nchere pee metiu anaa ninche.

¹⁶Nepaash ninche inkitanapat pooki o Laitoriani Enkai enye, neitobiraki ate inkitanyaanyukot naasholuno oo lasho oaare, neitobir Asherim, neserem olorora pooki le shumata, neisiaai Baal.

¹⁷Nepejoo ilayiok lenye o ntoyie enye anaa ilasarri, neasishore ninche enaibon o esakutore, nemir ate pee etum aataas entorroni too nkonyek o Laitoriani, neitagor ninye.

¹⁸Ore te nkaraki ina etagorokine Olaitoriani Isiraeli oleng, neiwuang'ie ninche te dukuya ninye; eitu eing'uari toki meteleku olosho le Yuda ake.

¹⁹Eitu apa sii ninye eibung Yuda inkitanapat o Laitoriani Enkai enye, kake eibung'a ilo kerreti apa oiteng'en Isiraeli ninche.

²⁰Neany Olaitoriani eishoi e Israel pooki, nepik ninche osina, nepik ninche atua inkaik oo lainyalak, ometaba anaa nenang'aa ninche aiwuang'ie te dukuya enye.

²¹Ore ake pee eidip Olaitoriani aiwuang'ie Isiraeli te nkaji e Daudi, neitaa ninye Yeroboam olayioni le Nebat olaiguanani. Nerikoo Yeroboam Isiraeli aitapaash esujata o Laitoriani, nerikoki ninche metaasa eng'oki sapuk.

²²Eturubare iltung'ana le Israel nena ng'ok pooki apa naataasa Yeroboam. Eitu ninche epaash nena ng'ok,

²³ometaba anaa neiwuang'ie Olaitoriani Isiraeli too nkonyek enyena, anaa apa enairoro aimunye isinkan lenyena lelo oibonok le Nkai. Neaku eshomo Isiraeli eyararoto, neing'uaa enkop enye maate nepuo Asiria, netoni teine ometabaiki ena olong.

²⁴Neyau olaiguanani le Asiria iltung'ana ooing'uaa Babilon, Kuta o Afa o Hamat o Shefafaim, nepik ninche nkanas e Samaria, te rishata oo ltung'ana le Israel. Neya ninche Samaria nebik too nkanas enyena.

²⁵Ore te nkiterunoto e manyisho enye teine, neitu ninche eureyu Olaitoriani. Ore te nkaraki ina neirriwaki Olaitoriani ilng'atunyo atua ninche, nenya lelo ng'atunyo kulikae lenye.

²⁶Nelikini olaiguanani le Asiria aajoki, “Ore lelo oshon apa liwa te yararoto nilo apik nkanas e Asiria, meyiolo ninche inkitanapat e Nkai eina kop. Ore te nkaraki ina eirriwayie ninye ilng'atunyo atua ninche, naa ng'ura, earita ninche iltung'ana metuata. Amu meyiolo ninche inkitanapat e Nkai eina kop.”

²⁷Neitoki olaiguanani le Asiria aitanapisho ajo, “Erriwai ine obo loo lapolosak apa litaaraitie ninchosho ninye meshomo abik teine; pee eiteng'enisho nkitanapat e Nkai eina kop.”

²⁸Neaku eewuo obo le lelo apolosak apa ootaarayioki te Samaria nelotu abik te Betel, neiteng'en ninche eneiko teneureyu Olaitoriani.

²⁹Kake meetae apa olosho lemeitobir inkaitin enye maate, nepik ninche inkajijik oo wuejitin neeika apa naaitobira ltung'ana le Samaria, nepik ake olosho nena anas apa naabikie ninche.

³⁰Ore iltung'ana le Babilon neitobir Sukot-be-not. Ore iltung'ana le Kut, neitobir Nergal, ore iltung'ana le Hamat, neitobir Ashima.

³¹Ore iltung'ana le Efrit neitayu Nibas o Tarka; ore iltung'ana le Sefafit nenukaa inkera enye te nkaraki Adramalek o Anamelek nena aitin e Shefafaim.

³²Etureita sii apa ninche Olaitoriani, negelaki ate mpukunot pooki oo ltung'ana aaitaa ilapolosak loo wuejitin neeika, pee eitayu ilasarri too wuejitin neeika.

³³Neaku etureita ninche Olaitoriani kake eisiaayia sii inkaitin enye maate, aasujaa orrekie le lelo oshon apa ootarayioki aaya eyararoto tenebo ninche.

³⁴Ore ebaiki ena olong nesuj ninche ilo rrekie lenye apake. Meure ninche Olaitoriani, nemerubare ninche nkikoot anaa nkiguanat, anaa nkitanapat apa naaitanapa Olaitoriani nkera e Yakobo laa ninye apa etejoki Israel.

³⁵Eitobira apa Olaitoriani olning'o lo sotua o ninche, neitanap ninche ajoki, “Miureyuyu intae kulie aitin, nimirrugokinono ninche anaa isiaayiayia ninche, anaa ipolosakiki ninche.

³⁶Kake Olaitoriani entureita laa ninye apa oyawua intae aitupuku te nkop e Misiri, te ngolon kitok, o te nkaina naitoriori. Ninye errugokinoto, naa ninye entopolosaki.

³⁷Ore nena kikoot o nkiguanat, o ina kitanapata apa naigeroki intae, entaas entobiraki. Miureyuyu intae kulie aitin.

³⁸Niminchosho erikino intae osotua lai apa laitobiraka intae. Miureyuyu intae kulie aitin.

³⁹Kake entureita Olaitoriani Enkai inyi, naa kekordu ninye intae aitupuku too nkaik oo lmang'ati linyi.”

⁴⁰Ore ake eyia, eitu ening'isho ninche, kake etaasa ninche te risioroto olkerreti lenye liapa.

⁴¹Neaku eteserema apa kulo oshon Olaitoriani, neisiaai sii nkaitin oo nkitanyaanyukot naaguetuno, neijia sii eikununo nkera enye, o nkera oo nkera enye. Ore apa enataasa loo menye, neas sii ninche ina ometabaiki ena olong.