Read MAASAI REVISED PROTESTANT 2 Ilaiguanak 2 Bible Online

2 Ilaiguanak 2 - MAASAI REVISED PROTESTANT bible

2 Ilaiguanak 2

¹Ore etaa kejo pee eya Olaitoriani Eliya ailepie keper to lkutati, negira Eliya o Elisha aairiamari te nkoitoi eing'uaa Gilgal.

²Nejoki Eliya Elisha, “Totona tene aatoomono amu aairriwayie nanu Olaitoriani Betel.” Kake etejo Elisha, “Ore anaa enaishu Olaitoriani o anaa eninchu iyie makewan, maaing'uaa nanu.” Nedoyio ninche aapuo Betel.

³Nepuonu ilooiteng'eni loo loibonok le Nkai nejoki Elisha, “Iyiolo iyie ajo keya taata Olaitoriani olkitok lino, nikintung'uaa iyie?” Nejo ninye, “Ee kayiolo, entirring'ata ake intae.”

⁴Neitoki Eliya ajoki Elisha, “Elisha, totona tene, aatoomono amu aairriwayie nanu Olaitoriani Yeriko.” Kake etejo ninye, “Ore anaa enaishu Olaitoriani, o anaa eninchu iyie makewan, maaing'uaa nanu iyie.” Nepuonu ninche Yeriko.

⁵Ore ilayiok loo loibonok le Nkai ootii Yeriko nepuonu aataaniki Elisha, nejoki ninye, “Iyiolo iyie ajo keya taata Olaitoriani olkitok lino nikintung'uaa iyie?” Newal ninye ajo, “Ee kayiolo, entirring'ata ake intae.”

⁶Neitoki Eliya ajoki ninye, “Totona tene, aatoomono, amu aairriwayie nanu Olaitoriani Yordan.” Kake etejo ninye, “Ore anaa enaishu Olaitoriani, o anaa eninchu iyie makewan maaing'uaa nanu iyie.” Neaku eiriamari aapuo pokira oaare.

⁷Nepuo iltung'ana onom le lelo ayiok loo loibonok le Nkai, neitashe tenelakuaniki ninche, neitashe ninche pokira oaare te mbata o lkeju le Yordan.

⁸Neitayu Eliya olkila lenye nenunuk, neoshie enkare, neoro enkare neito ena shoto o enda shoto. Neim ninche pokira oaare ine etaa enkop natoyio.

⁹Ore ake pee eidip aatalang, nejoki Eliya Elisha, “Tolimu embae niyieu naaitaas eton eitu aayae aaitung'uaa iyie.” Nejo Elisha, “Aatoomono, ntujung'oki nanu enkiyanget oltau lino kat are.”

¹⁰Nejoki ninye, “Inkilikuanua iyie embae nagol, kake ore ake eyia, tenikiduaaya nanu aayaitae aaitung'uaa iyie, naa ketiu neijia te iyie, kake tenimikiduaaya iyie, nemetiu neijia.”

¹¹Ore epuoito ninche einosaa lomon, ng'ura, nerish ninche pokira oaare engarri oo mbartan e nkima. Nelo Eliya to lkutati keper.

¹²Nedol Elisha ina bae, neishir ajo, “Papaai lai! Papaai lai! Ngarrin oo mbartan e Israel o lakedok lenyena loo mbartan!” Neitu ninye eitoki adol Eliya. Neitoki ninye aibung ilkilani lenyena, nepolos aitaa are.

¹³Nedumu ninye ilo kila apa oitadoyie Eliya, nerrinyo ninye nelo aitashe te mbata olkeju le Yordan.

¹⁴Neitoki ninye adumu olapa kila le Eliya oitadoikio ninye, neoshie enkare, ejo, “Koree Olaitoriani, Enkai e Eliya?” Ore ake pee eosh enkare, neoro enkare, nelo ena shoto o enda shoto; nelang Elisha alo.

¹⁵Ore ake pee edol lelo ayiok loo loibonok le Nkai apa ootii Yeriko ninye, nejo ninche, “Etii Enkiyang'et e Eliya Shumata Elisha.” Nepuonu ninche aanang'are ninye, neirrugo aaitabaiki nkomomi enkop te dukuya ninye.

¹⁶Nejoki ninche ninye, “Etii tenebo isinkan linono iltung'ana onom oogol; aatoomono nchoo ninche epuo aaing'oru olkitok lino, ebaiki neewa ninye Enkiyang'et o Laitoriani nelo anang'aki ninye likae doinyo, aashu epik atua oerata.” Nejo ninye, “Mirriwaa intae ninche.”

¹⁷Kake ore ake pee eitirrishaki ninye o metaba anaa nedol enkurruna, nejo ninye, “Erriwai.” Neirriwaa ninche iltung'ana onom; ore too nkolong'i uni, neing'oru ninye kake eitu etum ninye.

¹⁸Nerrinyunye ninche aapuonu enetii Elisha etonita te Yeriko, nejoki ninye ninche, “Keitu nanu ajoki intae emipuopuo?”

¹⁹Nejoki apa iltung'ana le nkanasa e Yeriko Elisha, “Ng'ura ajo eisidai ena anasa, anaa enidolita olkitok lai; kake eitorrono enkare, nemeisho enkop.”

²⁰Nejo ninye, “Eyakaki nanu olbakuli ng'ejuk, nipikipiki emunyan atua.” Neyaki ninche ninye.

²¹Nelo ninye enetii enchorro e nkare neisuaaki emunyan atua, nejo, “Nji ejo Olaitoriani aitamelono nanu ena are, ore ebaiki ena kata meitokini aekata aatum keeya anaa olkibiroto tialo ena are.”

²²Neaku eitamelonoki apa ina are ometabaiki ena olong, te risioroto eilo rorei apa oiroro Elisha.

²³Nedumunye Elisha teine nelo Betel; ore eloito ninye te nkoitoi, nepuonu nkuti ayiok aakueniyie ninye, ejo, “Ilepa shomo iyie olokurro lukunya! Ilepa shomo olokurro elukunya!”

²⁴Neibelekenya ninye anang silig, ore ake pee edol ninche, nedek ninche te nkarna o Laitoriani. Neipang'u tiatua entim ilng'arurum oaare le ntim nedung nena ayiok artam o are aaitaa ndung'udung'ot.

²⁵Nedumunye teine nelo oldoinyo le Karmel neitoki arrinyo alo Samaria.