Read MAASAI REVISED PROTESTANT 2 Ilaiguanak 20 Bible Online

2 Ilaiguanak 20 - MAASAI REVISED PROTESTANT bible

2 Ilaiguanak 20

¹Ore apa te nena olong'i, etamuoyia Hesekia ometaa kejo pee eye. Nelotu Isaya, ilo oiboni le Nkai enetii ninye, nejoki ninye, “Nji ejo Olaitoriani, ‘Ntobira mbaa olmarei lino, amu iye iyie, minchiu iyie.’ ”

²Neibelekenya Hesekia aing'orie enkomom enye esuntai neomon Olaitoriani nejo,

³“Tadamu taata Olaitoriani, aatasayia iyie, ina nashomo nanu te dukuya iyie too sipat, o to ltau pooki, nataasa nanu mbaa sidain too nkonyek inono.” Neishir Hesekia te mion.

⁴Ore eton eitu elo Isaya aipang to lgoriet le polos, nelotu ororei lo Laitoriani enetii nejoki,

⁵“Torrinyoyu, nilo ajoki Hesekia, ilo kitok loo ltung'ana laainei, ‘Nji ejo Olaitoriani, Enkai e Daudi papaai lino: Atoning'o nanu enkomono ino. Atoduaa nanu ilkiyio linono; ng'ura kaaishiunye nanu iyie; ore te nkolong e uni, naa ilep iyie alo enkaji o Laitoriani.

⁶Naa kaponaa nanu ilarin tomon o imiet te nkishui ino. Kaakordu nanu iyie o ena anasa aitayu te nkaina o laiguanani le Asiria, naa kamitu nanu ena anasa te nkaraki kewan ai, o te nkaraki o sinka lai Daudi.’ ”

⁷Nejo Isaya, “Iyau emukate oo lng'abolo, naa nchoo epuo ninche aaiteleiki oldututai, pee etum ninye aishiu.”

⁸Nejoki Hesekia Isaya, “Kainyoo enkitodolunoto nchere kaaishiunye nanu Olaitoriani, naa kayooki nanu alo enkaji o Laitoriani te nkolong e uni?”

⁹Nejoki Isaya ninye, “Ele olmonekie te iyie oing'uaa Olaitoriani, nchere keas Olaitoriani ina toki naisiligishore ninye. Kelo oloip dukuya iroruat tomon anaa errinyo siadi iroruat tomon?”

¹⁰Newalu Hesekia ajo, “Kelelek pee eadoru oloip alo iroruat tomon alang tenerrinyo siadi iroruat tomon.”

¹¹Neishiraki Isaya ilo oiboni le Nkai Olaitoriani, nerrinyunye oloip siadi iroruat tomon, nerrinyo enkolong aipirakinore enkoitoi o sagam le Ahas.

¹²Ore apa teina kata, neirriwaa Merodak-baladan olayioni le Bat-adam, ilo aiguanani le Babilon ilkiliku ooyautua mpala o enkishooroto enetii Hesekia, amu etoning'o apa ninye ajo etamuoyia Hesekia.

¹³Neitoomon Hesekia ninche, neitodol ninche ilchumat pooki le nkaji enye, ina osholai, o saabu o enkorropil o eilata nagol enkinyiang'a o ewueji enye oo masaa o larrabal, o nena pooki apa naatii nkajijik enyena naashumishoreki. Meetae apa entoki natii atua enkaji enye, anaa pooki toki e nkitoria enye neitu eitodol Hesekia ninche.

¹⁴Neitoki Isaya ilo oiboni le Nkai alotu enetii olaiguanani Hesekia nejoki ninye, “Kaa etejo kulo tung'ana? Naa kanu eetuo ninche enitii?” Nejo Hesekia, “Enkop nalakua eing'uaa ninche, Babilon eing'uaa ninche.”

¹⁵Neitoki ninye ajoki olaiguanani, “Kainyoo ninche etoduaa te nkaji ino?” Newalu Hesekia ajo, “Etoduaa ninche nena pooki naatii atua enkaji ai. Meetae entoki tiatua nena ajijik aainei naashumishoreki neitu nanu aitodol ninche.”

¹⁶Neitoki Isaya ajoki Hesekia, “Toning'o ororei lo Laitoriani:

¹⁷Kepuonu nkolong'i, ore nena pooki naatii atua enkaji ino o nena apa naatushuma loo papaai lino o metabaiki ena olong, nenapi aaya Babilon; meing'uari toki, Olaitoriani ojo.

¹⁸Ore embata oo layiok linono makewan likitoikioki iyie, neyai sii ninche naa kepuo aaku isunaishi oogelema tiatua enkaji o laiguanani le Babilon.”

¹⁹Neitoki Hesekia ajoki Isaya, “Ore ilo rorei lo Laitoriani liroro naa aisidai. Neijia etiu, keetae eseriani o enkitirring'a too nkolong'i aainei.”

²⁰Ore nkulie kiaasin e Hesekia o enkidimata enye pooki, o ilo shorro oitobira ninye, o ewueji neimieki enkare, neyau enkare atua enkanasa, neigeroki pooki tiatua embuku oo ntepen oo laiguanak le Yuda.

²¹Neirura Hesekia etua anaa apa loo menye; neitoreisho Manase olayioni lenye te rishata enye.