Read MAASAI REVISED PROTESTANT 2 Ilaiguanak 21 Bible Online

2 Ilaiguanak 21 - MAASAI REVISED PROTESTANT bible

2 Ilaiguanak 21

¹Oloo larin tomon oaare apa Manase pee eiteru aitoreisho, neitoreisho ninye ilarin onom o imiet te Yerusalem. Ore apa enkarna e ng'otonye naa keji Hefasiba.

²Etaasa apa Manase mbaa torrok too nkonyek o Laitoriani, te risioroto eilo minong apa oasita lelo oreren ootaarayie Olaitoriani te dukuya iloshon loo Siraeli.

³Amu enyaaka apa ninye ashet iwuejitin neeika apa naaidaikie papaai lenye Hesekia, neshetaki Baal ilpereren loo lasarri, neitobir ashera, anaa apa enataasa Ahab olaiguanani le Israel. Neserem ninye olorora pooki le keper neisiaai ninche.

⁴Neshetu ninye ilpereren loo lasarri tiatua enkaji o Laitoriani, laa ninche apa etejo Olaitoriani, “Atua Yerusalem nanu alo apik enkarna ai.”

⁵Neshetu ninye ilpereren loo lasarri ashetaki olorora pooki le keper, too lgorieti pokira oaare le nkaji o Laitoriani.

⁶Nepejoo olayioni lenye anaa olasar, neas ninye mbaa e naibon o easata oo mbaa e nking'asia. Neasishore ninye ilaitumusumusok o lasakutok. Etaasa ninye mbaa kumok torrok too nkonyek o Laitoriani, neitagor ninye.

⁷Ore ina kitanyaanyukoto e Ashera apa naitobira ninye nepik ninye atua ina aji natiaaka Olaitoriani Daudi, o Solomon olayioni lenye, “Atua ena aji o atua Yerusalem naa ninche nanu ategelua too loshon pooki loo Siraeli, nchere kapik nanu enkarna ai ntarasi.

⁸Nemaitoki nanu aisho nkejek oo ltung'ana laainei loo Siraeli menyaaki aalimana, aapuku teinakop apa naishoo loo menye. Oi ake duoo ninche easisho te risioroto e nena pooki naitanapa ninche, o te risioroto eina kitanapata pooki naitanapa osinka lai Musa ninche.”

⁹Kake eitu ninche ening'isho nelejaki Manase ninche metaasa ntorrok aaitulus te lelo oreren apa ooidaikie Olaitoriani te dukuya iltung'ana loo Siraeli.

¹⁰Nejo Olaitoriani eimunye lelo sinkan lenyena, lelo oibonok le Nkai,

¹¹“Ore te nkaraki enataasa Manase, olaiguanani le Yuda, ele minong, netaasa mbaa torrok aitulus nena oo Lamori, apa laa ninche ootii te dukuya ninye, nerikoki Yuda metaasa eng'oki te nena kitanyaanyukot enyena.

¹²Ore naa te nkaraki ina, nji ejo Olaitoriani, Enkai e Israel, ng'ura, kayau nanu shumata Yerusalem o Yuda, entorroni naikununo neijia naa ore ake nkiyiaa pooki naaning neng'eyu.

¹³Naa kalo nanu aitorioo te shumata Yerusalem olkereri le ntemet e Samaria, o latemani lo nkitoriorot le nkaji e Ahab, naa kajut nanu Yerusalem anaa enajut oltung'ani embakuli najutu ninche aiwuang'ie naibelekenyu atua aing'orie oriong,

¹⁴naa kaiturraa nanu ilo pisiai le njung'ore ai, naishooyo nanu apik ninche atua inkaik oo lmang'ati lenye, neaku ninche eyararoto too lmang'ati lenye pooki.

¹⁵Te nkaraki nataasa ninche mbaa torrok too nkonyek aainei naaitagoro ninche nanu, ebaiki ina olong apa natupukutuo loo menye te Misiri o metabaiki ena olong.”

¹⁶Ore ake sii eibukoyie Manase osarge sapuk oleng lemeeta entioto, omeiputa Yerusalem ebaiki enchoto nabo ometabaiki enkae shoto. Eeta ake sii eng'oki eina apa natorikoko Yuda metaasa ing'ok, neaku etaasa mbaa torrok too nkonyek o Laitoriani.

¹⁷Ore nkulie kiaasin e Manase, o nena pooki naataasa, o ina ng'oki nataasa, neigeroki tiatua embuku oo ntepen oo laiguanak le Yuda.

¹⁸Neirura Manase etua tenebo apa loo menye, nenukari ninye te nkurma natii embata e nkaji enye. Tiatua e nkurma e Usa; neitoreisho Amon olayioni lenye te rishata enye.

¹⁹Oloo larin tikitam o are apa Amon pee eiteru aitoreisho, neitoreisho ninye ilarin oaare te Yerusalem. Ore apa enkarna e ng'otonye naa keji Meshulemet entito e Harus le Yotba.

²⁰Etaasa apa ninye mbaa torrok too nkonyek Olaitoriani, anaa enataasa papaai lenye Manase.

²¹Eibung'a ninye orrekie le papaai lenye, neisiaai nena kitanyaanyukot apa naaisiaayia papaai lenye, neserem ninche.

²²Etung'uayie ninye Olaitoriani, Enkai oo loo menye, neitu ninye eibung enkoitoi o Laitoriani.

²³Nerresh isinkan le Amon ninye, near ilo aiguanani metua te nkaji enye.

²⁴Kake etaara apa iltung'ana leina kop lelo tung'ana pooki metuata apa ootarresho olaiguanani Amon, neitaa lelo tung'ana leina kop Yosia ilo ayioni lenye olaiguanani le rishata enye.

²⁵Ore apa nkulie kiaasin pooki e Amon apa naataasa, neigeroki tiatua mbukui oo ntepen oo laiguanak le Yuda.

²⁶Nenukari ninye te nkurare enye tiatua enkurma e Usa; neitoreisho Yosia olayioni lenye te rishata enye.