Read MAASAI REVISED PROTESTANT 2 Ilaiguanak 24 Bible Online

2 Ilaiguanak 24 - MAASAI REVISED PROTESTANT bible

2 Ilaiguanak 24

¹Ore apa aa olaiguanani Yehoiakim, neilepu Nebukadnesa arasaki te Yuda neaku Yehoiakin osinka lenye ilarin okuni. Neitoki ninye aibelekenya agilunore ninye.

²Neirriwaki Olaitoriani metigilunore ninye ilwuampan loo ltung'ana loo Lkaldayo o too ltung'ana le Moab o loo ltung'ana le Amori, neirriwaki ninche meshomo aarasaki Yuda neidaikie ninye, te risioroto o rorei lo Laitoriani, apa oiroro aimunye isinkan lenyena, lelo oibonok le Nkai.

³Eewuo ena bae shumata Yuda te nkitanapata o Laitoriani, pee eiwuang'ie ninche too nkonyek enyena, te nkaraki ing'ok e Manase, te risioroto e nena pooki apa naataasa ninye.

⁴O te nkaraki sii ilo sarge lemeeta entioto apa oibukoyie ninye, amu eiputa apa ninye Yerusalem, osarge lemeeta entioto, neaku meidim Olaitoriani ataapalaki ninye.

⁵Ore apa nkulie kiaasin e Yehoiakim, o nena pooki naataasa ninye, neigeroki tiatua embuku oo ntepen oo laiguanak le Yuda.

⁶Neaku eirure Yehoiakim etua anaa apa loo menye, neitoreisho Yehoiakim olayioni lenye te rishata enye.

⁷Eitu eitoki olaiguanani le Misiri aipang'u te nkop enye, amu ewa olaiguanani le Babilon nena pooki apa naara ino laiguanani le Misiri ebaiki oerata le Misiri o metabaiki olkeju le Frati.

⁸Oloo larin tomon o isiet apa Yehoiakin pee eiteru aitoreisho, neitoreisho ninye ilapaitin okuni te Yerusalem. Ore apa enkarna e ng'otonye naa keji Nabusta, entito e Elnatan.

⁹Neas ninye mbaa torrok too nkonyek o Laitoriani, te risioroto e nena pooki apa naataasa loo papaai lenye.

¹⁰Ore apa teina kata neilepu isinkan le Nebukadnesa olaiguanani le Babilon aapuonu Yerusalem, neibung'i ina anasa aang'adu.

¹¹Ore Nebukadnesa, olaiguanani le Babilon nelotu ina anasa ina kata etang'adutua isinkan lenyena.

¹²Ore Yehoiakin olaiguanani le Yuda, neitarasaki kewan olaiguanani le Babilon, kewan enye, o ng'otonye o sinkan lenyena, o lkituaak lenyena, o sinkan le nkaji enye e nkitoo. Neen olaiguanani le Babilon ninye, neya ninye, to lari le isiet le nkitoria enye.

¹³Nenap ninye aya lelo shumat pooki le nkaji o Laitoriani o lchumat le nkaji o laiguanani, nedung aitaa mbelibelat imasaa pooki e saabu naatii atua enkaji o Laitoriani, apa naaitobira Solomon olaiguanani loo Siraeli, anaa apa enatolimuo Olaitoriani.

¹⁴Etanapa Nebukadnesa aya Yerusalem pooki, o lkituaak pooki o ltung'ana pooki magil yiolot, iltung'ana inkalifuni tomon ooibung'aki, o ltung'ana pooki arriyiak te nguetare, o too sekenke. Meetae hoo obo otelekua, meteleku ake lelo tung'ana ake aisinak oleng leina kop.

¹⁵Neya ninye Yehoiakin Babilon o ng'otonye olaiguanani, o nkituaak o laiguanani, o lkituaak lenyena o ltung'ana kituaak leina kop. Ewa ninye te yararoto aitung'uaa Yerusalem nerik Babilon.

¹⁶Neyau olaiguanani le Babilon lelo yarunot Babilon, lelo tung'ana pooki yiolot, nkalifuni naapishana, o ltung'ana arriyiak te nguetare, o loo sekenke, iltung'ana enkalifu nabo, ore lelo pooki naa iltung'ana oogol neishiaakino to olarrabal.

¹⁷Neitoki olaiguanani le Babilon aitaa Matania ole nkapu le Yehoiakin, olaiguanani te rishata enye, neibelekeny enkarna enye ajo Sedekia.

¹⁸Oloo larin tikitam oobo apa Sedekia ina kata pee eaku olaiguanani, neitoreisho ninye ilarin tomon oobo te Yerusalem. Ore apa enkarna e ng'otonye naa keji Hamutal, entito e Yeremia le Libna.

¹⁹Neas ninye mbaa torrok too nkonyek o Laitoriani, te risioroto e nena pooki naataasa Yehoiakin.

²⁰Amu ore te nkaraki engoro o Laitoriani, etabawua erishata te Yerusalem o te Yuda, naiturrayie Olaitoriani ninche aitalam kewan. Negolong'aki Sedekia olaiguanani le Babilon.