Read MAASAI REVISED PROTESTANT 2 Ilaiguanak 25 Bible Online

2 Ilaiguanak 25 - MAASAI REVISED PROTESTANT bible

2 Ilaiguanak 25

¹Ore to lari lioudo le nkitoria e Sedekia, to lapa le tomon, te nkolong e tomon o lapa, nelotu Nebukadnesa olaiguanani le Babilon tenebo o enjore enye pooki agilunore Yerusalem, neng'adu ninye aman, nepik ninche engumoto aaitaman enkanasa.

²Neaku etang'aduaki enkanasa ometaa olari le tomon oobo le nkitoria olaiguanani Sedekia.

³Ore te nkolong e naaudo o lapa liong'uan nerasu olameyu teina anasa, amu meekure eetae endaa too ltung'ana leina kop.

⁴Neitobiri elusie teina anasa; neisik olaiguanani kewarie o ltung'ana pooki le njore, aaim enkoitoi e kishomi natii erishata oo sunta, embata e nkurma o laiguanani, hoo netang'adutua apa Ilkaldayo ina anasa. Nepuo ninche aaim enkoitoi e Araba.

⁵Kake etusujaitie apa enjore oo Lkaldayo olaiguanani nepuo aainepu ninye too nkisiashat e Yeriko. Neidapasha enjore enye pooki aaing'uaa ninye.

⁶Neibung ninche olaiguanani Sedekia neyau enetii olaiguanani le Babilon te Ribla, nedung'oki ninye enkiguana.

⁷Near ninche ilayiok le Sedekia metuata too nkonyek enyena neen ninye too lpisia, neya ninche ninye Babilon.

⁸Ore to lapa le miet, te nkolong e naapishana o lapa aa ninye olari le tomon ooudo le nkitoria e Nebukadnesa, olaiguanani le Babilon, nelotu Nebusaradan ilo kitok loo larripok lo olaiguanani, osinka leilo aiguanani le Babilon, alotu Yerusalem.

⁹Nepejoo ninye enkaji o Laitoriani, o enkaji o laiguanani o nkajijik pooki e Yerusalem. Ore pooki aji kitok, nepejoo ninye.

¹⁰Ore ina jore pooki oo lkaldayo, apa ootii tenebo ilo kitok le rripore, neuroo isunta pooki naamanita Yerusalem.

¹¹Ore lelo kulikae tung'ana pooki apa ootung'uayioki tiatua enkanasa, o lelo ooisika, aaisikaki olaiguanani le Babilon, tenebo ilo orora pooki, neya Nebusaradan ilo kitok le rripore eyararoto.

¹²Kake etung'uayie apa ilo kitok le rripore embata oo ltung'ana aisinak oleng leina kop, pee eaku ilooitobir isabibu, o laturok.

¹³Ore nena ng'apeta o suyai apa naatii enkaji o Laitoriani, o nkitotoneta enyena o ilo moti lo suyai, apa ootii atua enkaji o Laitoriani, nebel ilkaldayo aaitaa mbelibelat, nenap ilo suyai aaya Babilon.

¹⁴Neya ninche imotioo, o nchempei o nkurteta e nkima, o ntokitin e nkorropil, o masaa pooki o suyai apa naasishoreki te nkaji e Nkai o motioo,

¹⁵o lbakulini. Ore apa nena tokitin e saabu neya ilo kitok le rripore anaa saabu ore ina nara ine nkosholai neya anaa enkosholai.

¹⁶Ore tialo nena ng'apeta pokira are, o ilo moti, o nkitotoneta enyena, apa naaitobira Solomon te nkaraki enkaji o Laitoriani, ore enkiroishi eilo suyai pooki nemeimakinoyu te nkiroishi.

¹⁷Ore enkadoro e ng'ape nabo naa ntemat e nkaina tomon o isiet, ore enchumata enye netii osuyai. Ore enkadoro eina dukuya naa ntemat e nkaina uni.

¹⁸Neya ilo kitok le rripore Seria olapolosani kitok o Sefania ilo apolosani liare, o lelo arripok le kishomi pokira okuni.

¹⁹Ore teina anasa neya ilo kitok apa oitasheiki iltung'ana le njore, o ltung'ana imiet lo lkiama lo laiguanani apa ooinepuaki te nkanasa; o laigeroni lo lkitok le njore laa ninye apa oipotuo iltung'ana leina kop, o ltung'ana ntomoni ile loo ltung'ana leina kop apa oonotoki teina anasa.

²⁰Ore Nebusaradan ilo kitok le rripore neya ninche, neyau ninche enetii olaiguanani le Babilon te Ribla.

²¹Near olaiguanani le Babilon ninche, metuata te Ribla, tiatua enkop e Hamat. Neaku ewaki apa Yuda eyararoto aaitung'uaa enkop enye.

²²Ore te shumata lelo tung'ana ootelekutua te nkop e Yuda, lelo apa ootung'uayie Nebukadnesa olaiguanani le Babilon, negelu ninye Gedalia olayioni le Ahikan, olayioni le Shafan, aitaa olgafanai.

²³Ore ake pee ening ilarikok pooki le njore, teinakop naisiasha nchere eitaaki tenebo iltung'ana lenye nchere eitaa olaiguanani le Babilon Gedalia o olgafanai, nepuonu ninche tenebo iltung'ana lenye enetii Gedalia te Mispa, aa taa Ishmael olayioni le Natania, o Yohanan olayioni le Karea, o Seriai olayioni le Tahumet le Netofat, o Yaasania olayioni le Maakat.

²⁴Nenya Gedalia olmumai tialo ninche o ltung'ana lenye, ejo, “Emiureishoyu intae te nkaraki ilkituaak loo lkaldayo. Entobik intae tena kop, nisiaayiayia olaiguanani le Babilon, amu keserianu te intae.”

²⁵Kake ore to lapa liopishana, nelotu Elishama, leilo marei le nkitoo, tenebo o iltung'ana lenyena tomon, nerasaki Gedalia near metua, tenebo Ilyahudi o Lkaldayo apa ootii tenebo ninye te Mispa.

²⁶Neitoki iltung'ana pooki, ilooti o lkituaak o larikok loo njoreitin aadumunye nepuo Misiri, amu keure apa Ilkaldayo.

²⁷Ore to lari le tomoni uni oopishana le yararoto e Yehoiakin olaiguanani le Yuda, to lapa le tomon oaare, te nkolong e tikitam oopishana o lapa, nelaaya Efil Merodak, ilo aiguanani le Babilon, teilo ari oitera aitoreisho, Yehoiakin olaiguanani le Yuda metupuku te jila.

²⁸Neirorie ninye te supatisho, neisho ninye olorika olus too lorikan loo laiguanak apa ootii tenebo ninye te Babilon.

²⁹Neaku eitayio Yehoiakin lelo kilani lenyena le jila. Ore too nkolong'i pooki e nkishui enye nenya ninye endaa te misa o laiguanani.

³⁰Ore te retoto enye, eishooki apa ninye eretoto e anaake naishoo olaiguanani, ore ake te nkolong neng'amaa erubata, te nkishui enye pooki.