Read MAASAI REVISED PROTESTANT 2 Ilaiguanak 3 Bible Online

2 Ilaiguanak 3 - MAASAI REVISED PROTESTANT bible

2 Ilaiguanak 3

¹Ore to lapa le tomon o isiet le nkitoria e Yehoshafat olaiguanani le Yuda, etaa Yehoram olayioni le Ahab olaiguanani loo Siraeli te nkop e Samaria. Neitoreisho ninye ilarin tomon oaare.

²Etaasa ninye entorroni too nkonyek o Laitoriani, hoo neitu etiu anaa menye o ng'otonye, amu eiwuang'ie ninye eng'ape e Baal apa naitobira papaai lenye.

³Ore ake eyia eibung'are ninye eng'oki e Yeroboam olayioni le Nebat, apa natorikoko Israel metaasa eng'oki. Eitu ninye eing'uaa ina ng'oki.

⁴Ore apa Mesha olaiguanani le Moab naa olaramatani loo nkerra. Naa ore ake to lari neisho olaiguanani le Israel ilkuoo le kerra nkalifuni iip nabo o lpapit loo nkerra loo lmeregeshi inkalifuni iip nabo.

⁵Kake ore ake pee eye Ahab, negolong'u olaiguanani le Moab apaashare olaiguanani le Israel.

⁶Neaku eshomo apa teina kata olaiguanani Yehoram tiatua enkop e Samaria pooki, neiturrur Isiraeli pooki.

⁷Nelo ninye airriwaki olkilikuai Yehoshafat olaiguanani le Yuda, nejoki, “Etogolong'ua olaiguanani le Moab tialo nanu; aimikiriamariye nanu olarrabal le Moab?” Nejoki ninye, “Kalo nanu; atiu nanu anaa enitiu iyie, netiu iltung'ana linono anaa iltung'ana laainei, netiu mbartan aainei anaa mbartan inono.”

⁸Neitoki ninye ajo, “Kaa oitoi iyiook kipuo aaim?” Newal Yehoram ajo, “Enkoitoi e ong'ata e Edom.”

⁹Neaku eshomo olaiguanani le Israel tenebo olaiguanani le Yuda o laiguanani le Edom. Ore ake pee eidip ninche aashom elototo oo nkolong'i naapishana, neishunye enkare naok enjore o enaok ng'uesi apa naasujita ninche.

¹⁰Neitoki olaiguanani le Israel ajo, “Wooi Ee! Eipotuo Olaitoriani kulo aiguanak pokira okuni pee elotu apik ninche inkaik e Moab.”

¹¹Nejo Yehoshafat, “Aimeetae oloiboni le Nkai tene pee kitum iyiook aaikilikuanishore tialo Olaitoriani?” Neitoki osinka obo le lelo sinkan lo laiguanani loo Siraeli awal ajo, “Etii Elisha olayioni le Shefat ene, laa ninye apa otubukoko enkare inkaik e Eliya.”

¹²Nejo Yehoshafat, “Etii ororei lo Laitoriani tenebo ninye.” Nedoyio olaiguanani loo Siraeli o Yehoshafat o laiguanani le Edom aapuo enetii Elisha.

¹³Nejoki Elisha olaiguanani loo Siraeli, “Kainyoo nanu aatakinore iyie? Shomo enetii iloibonok le papaai lino o loibonok le yieyioo lino.” Kake etiaaka olaiguanani loo Siraeli ninye, “A'a; Olaitoriani oipotuo kulo aiguanak pokira okuni apik inkaik e Moab.”

¹⁴Nejo Elisha, “Ore anaa enaishu Olaitoriani loo lororani, laa ninye nanu aisiaai, teneme naaji Yehoshafat olaiguanani le Yuda, anaata maashilaa iyie nemaaing'or iyie.

¹⁵Kake ore naa taata entorikokoki olaranyani.” Ore ake pee eranyisho olaranyani, nelotu engolon o Laitoriani shumata ninye.

¹⁶Nejo ninye, “Nji ejo Olaitoriani, ‘Ore ele erata otoyio kaiput nanu enkare.’

¹⁷Amu nji ejo Olaitoriani ‘Midolidolo intae olkutati anaa enchan, kake ore ele erata pooki naa keiputi enkare, pee itumutumu aatook, intae o nkishu inyi o ng'uesi inyi.’

¹⁸Embae nalelek ena too nkonyek o Laitoriani; naa keishoru sii Ilmoabu apik atua inkaik inyi.

¹⁹Naa ipuopuo intae aaibung pooki anasa nasheta isunta, o pooki anasa yioloti, niuroo pooki shani sidai, nimbooyoyo nkonyek oo nkariak pooki, ninyalinyala pooki kop sidai too soito.”

²⁰Ore te nkolong nasuju tadekenya, etaa enkata naishoori ilasarri, nelotu enkare naing'uaa enkalo e Edom, o metaba anaa neiput enkare enkop.

²¹Ore ake pee ening Ilmoabu nchere eetuo ilaiguanak aagilunore ninche, ore pooki ooidim aatanap imasaa o larrabal, eiteru to loti o metabaiki to olbotor, neipotuni nepuoi aaibok to lpolosie.

²²Ore ake pee edumunye ninche tadekenya, neilang enkolong ina are, nedol Ilmoabu enkare te dukuya ninche enyokie anaa osarge.

²³Nejo ninche, “Osarge ele; esipa etumutakinote ilaiguanak maate, netaarate maate. Ore naa taata, Moab nalo aya iyarunot.”

²⁴Kake ore ake pee epuonu ninche, ilng'oborri le Israel, nedumunye Israeli nerasaki Ilmoabu o metaba anaa neipirri aailanyisho te dukuya ninche. Nepuo ninche dukuya ear Ilmoabu too lalema epuoito.

²⁵Neibung ninche nkanas, ore te pooki kop sidai, nenang'aki pooki tung'ani osoit ometaba anaa neiput isoito. Neibooyo pooki ong'u naruko enkare, neuroo ilkeek pooki sidain, ometaba anaa neaku isoito ake ootelekutua te Kiharet. Neng'adu ilang'orok loo soito te nkopito ine neisulie.

²⁶Ore ake pee edol olaiguanani le Moab ajo etii olarrabal agilunore ninye, neshoroo iltung'ana oata ilalema, iip naapishana pee epuo aagiroo olaiguanani le Edom, kake eitu ninche eidim aashom.

²⁷Neitoki ninye ayau olkikau lenye laa ninye ojing te rishata enye te nkitoria, neitayu ninye aitaa olasar opejori te nchumata e suntai. Nejing engoro napi Siraeli, nepuo ninche aaing'uaa ninye nerrinyo aapuo enkop enye.