Read MAASAI REVISED PROTESTANT 2 Ilaiguanak 4 Bible Online

2 Ilaiguanak 4 - MAASAI REVISED PROTESTANT bible

2 Ilaiguanak 4

¹Ore enkitok e obo le lelo ayiok loo loibonok le Nkai, neishiraki Elisha ajoki, “Etua osinka lino olmoruo lai; niyiolo iyie ajo keure apa osinka lino Olaitoriani. Kake eewuo ilo apa likiaata esile enye aya nkera aainei pokira are aitaa irrindiki lenyena.”

²Nejoki Elisha ninye, “Kaa iyieu naitaas nanu? Tolikioki nanu entoki niaata tiatua aji?” Nejoki ninye, “Meeta esinka ino toki tiaji meteleku esiang'au e ilata.”

³Neitoki ninye ajo, “Shomo enetii ole latia ino toomonu imasaa e aji to le latia ino pooki, imasaa nemetii toki naa kumok.

⁴Nintoki alo atua aji ninkenoo kewan tiaji o layiok linono, nipik eilata nena masaa pooki, naa teneiput nabo, ninteng'el.”

⁵Neaku eshomo ina oliai aing'uaa Elisha, nelo aikenoo kewan o layiok lenyena. Ore ebukoki ninye eilata, neyau ilayiok lenyena nena kulie masaa aaitinyikaki ninye.

⁶Ore ake pee eiputayu nena masaa, nejoki ninye olayioni lenye, “Nyaaki iyakaki enkae.” Nejoki olayioni lenye ninye, “Meekure etii ae.” Neishunye erukunoto eina ilata.

⁷Neipang'u ninye nelotu aliki ilo tung'ani le Nkai, nejoki Elisha, “Shomo timira ina ilata nilo alak isilen inono, ore iyie o layiok linono ninyanya enkae ilata.”

⁸Ore nabo olong nelo Elisha Shunam, netii ine enkitok karsis naitoomono ninye pee enya endaa. Naa ore apa enkata pooki naim ine nelo anya endaa te nkaji enye.

⁹Nejoki ina kitok olpayian lenye, “Ng'ura ore taata, kamusu nanu ajo, oltung'ani osinya le Nkai ele, oimita ena oitoi ang anaake.

¹⁰Maitobira iyiook enkiti aji naitushura netii isunta, nikipikaki ninye endapash o emisa o lorika o ltaa, paa ore enkata ake pooki nalotu ninye enikitii, neidim ashomo ine.”

¹¹Ore nabo olong nelotu Elisha ine, nelo ninye ilo gilata neyeng'iyeng'a teine.

¹²Nejoki ninye Gehasi osinka lenye, “Mpotu ena kitok e Shunam.” Ore ake pee eipotu ninye, neitashe ina kitok te dukuya ninye.

¹³Nejoki ilo sinka ninye, “Irorie iyie ninye, ng'ura ajo itanyamala iyie oleng te nkaraki iyiook, kaa iyieu nikintaasi iyie? Iyieu neirorieki te rishata ino olaiguanani tenaa olkitok le njore?” Newalu ina kitok ajo, “Atua olorere lang nanu atii.”

¹⁴Neitoki Elisha ajoki Gehasi, “Kaa naa eitaasi ninye?” Newal Gehasi ajo, “Meeta ninye olayioni, netamorua olpayian lenye.”

¹⁵Nejoki Elisha, “Mpotu ninye.” Ore ake pee eipotu ninye, nelotu ninye aitashe te kutuk aji.

¹⁶Nejo Elisha, “Ore tena rishata tenemanu olari naa eitum iyie enkayioni.” Nejo ina kitok, “A'a olkitok lai, lo tung'ani le Nkai, milej iyie esinka ino.”

¹⁷Kake eiroshiwuo apa ina kitok, neiu enkayioni te rishata naaijo ina, te rishata o loirujuruj anaa apa enatiaaka Elisha ninye.

¹⁸Ore etubulua ina kerai nelo nabo olong enetii papaai lenye tiatua ilaikesak.

¹⁹Nejoki ninye papaai lenye, “Oi endukuya ai, endukuya ai!” Nejoki papaai lenye osinka lenye, “Ewaita ninye enetii ng'otonye.”

²⁰Ore ake pee edumu ilo sinka ninye, neyau enetii ng'otonye, neton ina kerai too nkejek e ng'otonye o meiulo[1] enkolong, neye.

²¹Nedumu ninye nelo airragie te ndapash o ltung'ani le Nkai, neiken kutukaji, neipang alo.

²²Neitoki aipot olpayian lenye, nejoki, “Irriwakaki obo loo laisiaayiak o esikiria nabo, pee atum nanu atasiooi ashomo enetii oltung'ani le Nkai, naitoki arrinyunye.”

²³Nejo ninye, “Kainyoo iyie pee iyieu nilo enetii ninye taata? Mme olapa ng'ejuk neme Sabato.” Nejo ina kitok, “Kesidanu mbaa.”

²⁴Neirot ninye esikiria, nejoki osinka lenye, “Isiosionie osikiria, nimilo akiti ometaba anaa naajoki.”

²⁵Neaku etudumunye ninye nelotu ine netii oltung'ani le Nkai, to ldoinyo le Karmel. Ore ake pee edol oltung'ani le Nkai ina kitok elotu, nejoki ninye Gehasi osinka lenye, ng'ura elotu enkitok e Shunam te idie.

²⁶Kueta nabo kata shomo tanang'are ninye, nijoki ninye, Aisidan mbaa tialo iyie? Aisidan mbaa tialo lpayian lino? Aisidan mbaa tialo enkerai ino? Newal ninye ajo, “Aisidain.”

²⁷Ore ake pee elotu ina kitok oldoinyo ine netii oltung'ani le Nkai, neibung ninye inkejek enyena, nelotu Gehasi aiwuang'ie ninye. Kake etejo ilo tung'ani le Nkai, “Tapala ninye, amu etii ninye atua osina ogol; neisudoyie Olaitoriani tialo nanu. Neitu aaliki nanu.”

²⁸Neitoki ina kitok ajo, “Kaatoomono nanu olkitok lai olayioni? Keitu nanu ajo, mikilej nanu?”

²⁹Nejoki ilo tung'ani le Nkai Gehasi, “Terretena empolos ino, ninap eng'udi ai te nkaina ino, nilo. Teninang'are oltung'ani nimiroroki ninye, naa tenikiroroki ninye niming'amaa, nilo aiteleiki ena ng'udi enkomom eina kerai.”

³⁰Neitoki ng'otonye ina kerai ajo, “Ore anaa enaishu Olaitoriani o anaa eninchu iyie makewan maaing'uaa nanu.” Neaku etudumunye ninye nesuj ninye.

³¹Neituruk Gehasi alo neiteleiki ina ng'udi enkomom eina kerai kake eitu etumi enkikashata anaa enkitoduaata e nkishui. Neaku etorrinye alo anang'are Elisha, nejoki ninche, “Eitu einyototo ina kerai.”

³²Ore ake pee ejing'u Elisha atua ina aji, nedol ina kerai eirrag etua te ndapash enye.

³³Nelo ninye atua aji neiken kutuk aji neaku ninche ake pokira are tiatua ina aji. Neomon Olaitoriani.

³⁴Neilepaki ninye endapash neirrag te nchumata eina kerai, nepik enkutuk enye enkutuk eina kerai, nepik inkonyek enyena inkonyek eina kerai, neiteleiki inkaik enyena inkaik eina kerai, neitoriori ninye te nchumata ina kerai, neirowuaju osesen leina kerai.

³⁵Neitoki ainyototo nelo nabo kata amanimanaa tiatua aji, neitoki ailepaki endapash eina kerai, nesing ina kerai katitin naapishana, nebol inkonyek enyena.

³⁶Neitanap ninye Gehasi ajoki, “Mpotu ena kitok e Shunam.” Neipotu Gehasi ninye. Ore ake pee elotu ina kitok enetii Elisha, nejoki ninye, “Tudumu enkayioni ino.”

³⁷Nelotu ninye nebatata too nkejek enyena, neirrugo abaiki enkop; neitoki adumu enkayioni enye neipang alo boo.

³⁸Neitoki Elisha alotu Gilgal naa aisapuk olameyu teinakop. Ore etonita inkera oo loibonok le Nkai te dukuya ninye, nejoki ninye, osinka lenye, “Ntobira emoti sapuk pee iyier endaa te nkaraki ninche.”

³⁹Nelo obo lenye ong'ata asotu ilkeek le ntim, netum olchani loo lng'anayio liong'ota, ore teilo shani neitayu ilng'anayio, nelotu adung'udung'oki emoti endaa, nemeyiolo ninye ajo kainyoo lelo.

⁴⁰Neoriki lelo tung'ana meinosa. Kake ore einosita ninche ina daa, neishir aajo, “Lo tung'ani le Nkai, keyaisho ena daa!” Nelaikino ninche aainosa.

⁴¹Nejo Elisha, “Eyau naa endaa.” Nenang'aki atua ina moti, nejo, “Entooriki iltung'ana, pee etum aainosa.” Neitu eitoki atii entoki torrono atua ina moti.

⁴²Nelotu oltung'ani oing'uaa Baal-shalisha, neyaki oltung'ani le Nkai imukateni tikitam e shairi, o lng'osil ng'erng'er le ntapa ootii olbene lenye. Nejo Elisha, “Nchoo kuna iltung'ana pee etum aainosa.”

⁴³Kake etejo osinka lenye, “Kaji nanu aiko te naisho kuna iltung'ana iip nabo?” Neigil Elisha ajo, “Nchoo ninche iltung'ana, pee etum aainosa, amu neijia ejo Olaitoriani, ‘kenya ninche neleku.’ ”

⁴⁴Neaku eirragie ninye ina daa te dukuya ninche, nenya ninche, neleku, te risioroto ororei lo Laitoriani.