Read MAASAI REVISED PROTESTANT 2 Ilaiguanak 8 Bible Online

2 Ilaiguanak 8 - MAASAI REVISED PROTESTANT bible

2 Ilaiguanak 8

¹Etiaaka apa Elisha ina kitok naitopiwuoko enkerai enye, “Inyo tenebo olmarei lino, shomo tamanya ewueji neba anaa enitamanya, amu eipotuo Olaitoriani olameyu, naa kelotu ajing ena kop too larin oopishana.”

²Nedumunye ina kitok alo te risioroto o rorei leilo tung'ani le Nkai. Nedumunye ninye o lmarei lenye nelo amany enkop oo Lfilisti ilarin oopishana.

³Ore te nkiting'oto oo larin oopishana, eidipa ina kitok atushukunye te nkop oo Filistia, nelo asai olaiguanani te nkaraki enkaji enye.

⁴Negira apa olaiguanani airorie Gehasi osinka lo ltung'ani le Nkai, ajoki, “Tolikioki nanu kuna baa pooki sapuki naataasa Elisha.”

⁵Ore egira ninye aliki olaiguanani eneikuna Elisha pee eitopiu oltung'ani otua, nelotu ina kitok apa naitopiwuoki enkerai enye, nesai olaiguanani te nkaraki enkaji enye o enkurma enye. Nejo Gehasi, “Olkitok lai, lo aiguanani, nena ina kitok naa nena ina kerai enye apa naitopiwuoki.”

⁶Ore ake pee eikilikuan olaiguanani ina kitok, neliki ninye. Negelu olaiguanani oltung'ani kitok te nkaraki ina kitok, ejo, “Torrinyoki ninye entoki pooki nara enenye, tenebo endaa pooki naing'uaa enkurma enye, ebaiki enkolong apa nashomo tena kop o metabaiki taata.”

⁷Eshomo apa Elisha Dameski. Naa kemuoi apa Benhadad olaiguanani le Siria. Ore pee elikini ninye, aajoki, “Etii oltung'ani le Nkai ene,”

⁸nejoki olaiguanani Hasael, “Toshoroi enkishooroto shomo notore oltung'ani le Nkai, ninkilikuanishore Olaitoriani tialo ninye ajoki, ‘Kaishiu nanu tena muoyian?’ ”

⁹Nelo Hasael anang'are ninye, neshoroo enkishooroto, mpukunot pooki oo ntokitin sidain e Dameski, ilolan loo ntamesin onom, ore pee aitashe te dukuya ninye, nejoki, “Aairiwua nanu olayioni lino Benhadad, olaiguanani le Asiria maeu enitii ejo, ‘Kaishiu nanu tena muoyian?’

¹⁰Nejoki Elisha ninye; ‘Shomo tiaaki ninye; ‘Inchiu iyie kake aaitoduaa nanu Olaitoriani nchere meeta nchere pee miye.”

¹¹Neshumu Elisha inkonyek enyena aing'or ninye, ometaba anaa nedol Hasael enkurruna. Neishir ilo tung'ani le Nkai.

¹²Nejo Hasael, “Kainyoo pee eishir olkitok lai?” Newaliki ajoki, “Te nkaraki naiyolo entorroni nilo aitaas iltung'ana loo Siraeli; ilo iyie apejoo isempewueti lenye, nilo aar metuata ilbarnot lenye to lalem, nidung'udung inkera enye aitaa ndung'udung'ot, niaar metuata nena kituaak enye naairoshiutuo.”

¹³Nejoki Hasael ninye, “Kainyoo ninye osinka lino, laa oldia ake, eji metaa keas ena bae sapuk?” Newaliki Elisha ajoki, “Aaitoduaa nanu Olaitoriani nchere ilo aaku olaiguanani le Siria.”

¹⁴Nelo ninye aing'uaa Elisha, nelo enetii olkitok lenye, nejoki ilo kitok lenye ninye, “Kaa iyie kitiaaka Elisha?” Newaliki ninye ajoki, “Aatiaaka ninye inchiu iyie.”

¹⁵Kake ore pee ekenyu, nedumu ninye olkarasha le ndapash, neitadoiki enkare neisalaashaki enkomom e Benhadad ometua ninye. Neaku Hasael olaiguanani te rishata enye.

¹⁶Ore to lari le imiet le nkitoria e Yoram olayioni le Ahab, olaiguanani loo Siraeli, neiteru Yehoram olayioni le Yehoshafat ilo aiguanani le Yuda aitoreisho.

¹⁷Oloo larin tomoni uni oaare apa ninye pee eiteru aaku olaiguanani, neitoreisho ninye ilarin isiet te Yerusalem.

¹⁸Neibung ninye orrekie loo laiguanak le Israel, anaa apa enataasa enkaji e Ahab, amu entito e Ahab apa enkitok enye. Neas ninye mbaa torrok too nkonyek o Laitoriani.

¹⁹Kake eitu ake eidaikie Olaitoriani Yuda, te nkaraki Daudi osinka lenye, amu eisiligie apa Olaitoriani pee eisho ninye oltaa o layiok lenyena intarasi.

²⁰Ore too nkolong'i e Yehoram, neorori Edom te nkitoria e Yuda, negelaki ate olaiguanani lenye maate.

²¹Nelo Yoram agiroo Saair tenebo ngarrin enyena pooki oo mbartan, nedumunye kewarie, ore ninye o lelo kituaak loo ngarrin e njore, near aamut lelo tung'ana pooki le Edom apa oo manita ninye. Kake eilanyishe enjore enye alo ang.

²²Neaku etoorori apa Edom te nkitoria e Yuda ometabaiki ena olong. Neitoki ake sii Libna aorori teina kata.

²³Ore apa nkulie kiaasin e Yehoram, o nena pooki naataasa ninye neigeroki te mbuku oo ntepen oo laiguanak le Yuda.

²⁴Neirura Yehoram etua anaa apa loo menye, nenukari tenebo loo menye te nkanasa e Daudi, neitoreisho Ahasia olayioni lenye te rishata enye.

²⁵Ore to lari le tomon oaare le nkitoria e Yehoram olayioni le Ahab, olaiguanani loo Siraeli, neitaae Ahasia olayioni le Yehoram olaiguanani le Yuda, neiteru aitoreisho.

²⁶Oloo larin tikitam oaare apa Ahasia pee eiteru aitoreisho, neitoreisho ninye olari obo te Yerusalem. Ore apa enkarna e ng'otonye naa keji Atalia, naa nkakuyiaa lenye apa Omri olaiguanani loo Siraeli.

²⁷Eibung'a sii apa ninye orrekie le nkaji e Ahab, neas mbaa torrok too nkonyek o Laitoriani, anaa apa enataasa enkaji e Ahab. Amu olaputani apa ninye lo lmarei le Ahab.

²⁸Eshomo apa ninye tenebo Yoram olayioni le Ahab aarare Hasael olaiguanani le Siria te Ramot-Gilead nepuo iltung'ana le Siria aapik Yoram olbae teine.

²⁹Nerrinyunye olaiguanani Yoram metabaki te Yesreel, lelo baa lenyena ootipika iltung'ana le Siria te Ramot, ina kata apa pee earare Hasael olaiguanani le Siria. Nedoyio Ahasia olayioni le Yehoram, olaiguanani le Yuda alo adol Yoram olayioni le Ahab te Yesreel, amu kemuoi apa ninye.