Read MAASAI REVISED PROTESTANT 2 Ilaiguanak 9 Bible Online

2 Ilaiguanak 9 - MAASAI REVISED PROTESTANT bible

2 Ilaiguanak 9

¹Neitoki Elisha aipotu obo loo layiok loo loibonok le Nkai nejoki ninye, “Terretena empolos ino, niya ele tulet le ilata, nilo Ramot-Gilead.

²Ore ake pee ibaya, ning'oru Yehu olayioni le Yehoshafat olayioni le Nimshi; nijing'aki ninye, nirik ninye aitung'uaa ilchoreta lenyena, nirik ninye enkilepata to lgilata liatua.

³Nintoki adumu ilo tulet le ilata, nibukoki eilata endukuya enye, nijo, ‘Nji ejo Olaitoriani, aatubukoko nanu eilata aput aitaa olaiguanani le Israel.’ Nintoki abol kutukaji nisik, mintoki aton teine.”

⁴Neaku eshomo ilo barnoti oiboni Ramot-Gilead.

⁵Ore ake pee elotu ng'ura, etii ilarikok le njore enkiguana, nejo ninye, “Aata olkilikuai lino lo kitok le njore.” Nejoki, Yehu, “Kalo obo te iyiook pooki.” Nejoki ninye, “Iyie lo kitok.”

⁶Nedumunye ninye nelo atua aji, nelotu ilo barnoti abukoki eilata endukuya enye, nejoki ninye, “Nji ejo Olaitoriani Enkai oo Siraeli, aatubukoko nanu eilata aaput aitaa olaiguanani loo ltung'ana lo Laitoriani, Isiraeli.

⁷Naa ilo iyie aosh enkaji e Ahab olkitok lino, pee atum nanu aitalaku elap te Yesebel, ilo sarge loo sinkan laainei, lelo oibonok le Nkai o sarge le lelo sinkan pooki lo Laitoriani.

⁸Amu ore ina aji pooki e Ahab naa keidaaya; naa kaiwuang'ie nanu olee pooki aishie o rrindik o lolakuno tiatua Israel.

⁹Naa kaitotiu nanu enkaji e Ahab anaa enkaji e Yeroboam olayioni le Nabat, naitotiu anaa enkaji e Baasha olayioni le Ahija.

¹⁰Naa kepuo ildiein aanya Yesebel to lpolosie le Yesreel, nemeetae oltung'ani onukaa ninye.” Nebol ilo barnoti kutuk aji neisik.

¹¹Ore ake pee eipang'u Yehu alotu enetii isinkan lo lkitok lenye, nejoki ninche ninye, “Aisidain mbaa? Kainyoo pee eewuo ele tung'ani omoda enitii?” Nejoki ninye ninche, “Iyiololo intae ele tung'ani o enkiroroto enye.”

¹²Nejo ninche, “Mesipa ina; toliki iyiook.” Nejo ninye, “Nji o inji aatiaka ninye nanu, nejo, ‘Nji ejo Olaitoriani, Kaabukoki eilata aput aitaa olaiguanani loo Siraeli.’ ”

¹³Ore nabo kata neya pooki ng'ae inkilani enyena neirragie tiabori inkejek e Yehu, neosh intarumpetani, neibalunye aajo, “Olaiguanani Yehu.”

¹⁴Etarresho apa Yehu olayioni le Yehoshafat olayioni le Nimshi pee ear Yoram metua. Ore apa Yoram o Siraeli pooki, nerripisho ninche te Ramot-Gilead te nkaraki Hasael olaiguanani le Siria;

¹⁵kake etorrinyunye apa olaiguanani Yoram metabaki te Yesreel te nkaraki ilbaa apa ootipika ninye iltung'ana le Siria, ina kata apa pee earare Hasael olaiguanani le Siria. Neaku etejo Yehu, “Tenaa ena endamunoto ino, mincho naa oltung'ani hoo obo eipang te nkanasa alo ainosaa ilomon te Yesreel.”

¹⁶Neirot Yehu ingarrin enyena oo mbartan, nelo Yesreel, amu teine apa eirragita Yoram. Neewuo apa Ahasia olaiguanani le Yuda abaiki Yoram.

¹⁷Ore apa olarriponi negira aitashe to ltalet te Yesreel, nedol encholiek e Yehu egira alotu, nejo, “Adolita olturrur,” Nejo Yoram, “Iwa olakedoni le mbarta pee elo anang'are ninche, naa nchoo ninye ejo, ‘Keseriani ake?’ ”

¹⁸Neaku eshomo oltung'ani okedito embarta anang'are ninye, nejoki, “Nji ejo olaiguanani, ‘Keseriani ake.’ ” Nejoki Yehu, “Kaa iyie intaasa eseriani? Mbelekenyayu tusujuaki.” Nelikioo olarriponi ina ejo, “Etabaikia olkilikuai ninche, kake merrinyunye ninye.”

¹⁹Neitoki Yoram airriwaa likae kilikuai oewuo ine netii ninche, nejoki, “Nji ejo olaiguanani, ‘Keseriani ake,’ ” neitoki Yehu ajoki, “Kene nyoo eseriani? Mbelekenyayu tusujuaki.”

²⁰Neitoki ake olarriponi alikioo ajo, “Etabaikia ninye ninche, kake megira ninye arrinyunye. Ore elotunoto neikununo anaa elotunoto e Yehu olayioni le Nimshi amu kekuetu te ngolon oleng.”

²¹Nejo Yoram, “Entobira engarri ai oo mbartan.” Neipang'u Yoram olaiguanani loo Siraeli o Ahasia olaiguanani le Yuda, meetae ake olemetii engarri enye oo mbartan, nepuo aanang'are Yehu, nepuo aanang'aa te wueji e Nabot le Yesreel.

²²Ore ake pee edol Yoram Yehu, nejoki ninye, “Keseriani ake Yehu?” Newaliki ajoki, “Kaa seriani etumi, eba nji enkiborra oo nkonyek o esakutore e ng'utunyi Yesebel te nkumoi?”

²³Neibelekenya Yoram ailanyisho, ejoki Ahasia “Olosek Ahasia!”

²⁴Neyietu Yehu enkawuo enye te ngolon enye pooki, neng'or Yoram erishata oo ronyi, nelo embae ang'or oltau lenye, neimis ninye tiatua engarri oo mbartan.

²⁵Nejoki Yehu Bidkar olaretoni lenye, “Ilepie ninye nilo aiturraa te wueji e Nabot le Yesreel. Amu idamu iyie enapa kata kiriamari kikedito mbartan te siadi Ahab papaai lenye, nchere eiroro Olaitoriani ena kitanapata tialo ninye:

²⁶‘Ore te sipata, anaa enatoduaa ng'ole osarge le Nabot, o sarge loo layiok lenyena Olaitoriani ojo kaitalaku nanu te iyie tene wueji.’ Ore naa taata iwa iyie ninye nilo anang'aa ninye teine wueji te risioroto o rorei lo Laitoriani.”

²⁷Ore ake pee edol Ahasia olaiguanani le Yuda ena, neisik alo enkalo e Bet-hagan. Nesujaa sii Yehu ninye, nejo, “Entang'or sii ninye.” Neng'or ninche ninye etii atua engarri oo mbartan te nkilepata e Guur, te mbata e Iblem. Neisikaki ninye Megido nelo aye teine.

²⁸Nenap isinkan lenyena te ngarri oo mbartan neya Yerusalem, nepuo aanukaa ninye te nkurare enye, tenebo loo menye tiatua enkanasa e Daudi.

²⁹Ore to lari le tomon oobo le nkitoria e Yoram olayioni le Ahab neiteru Ahasia aitoreisho te Yuda.

³⁰Ore apa pee elotu Yehu Yesreel, nening Yesebel ina. Nesir inkonyek enyena, neitobir akus endukuya enye, nerumisho te lusie.

³¹Ore eimu Yehu kishomi, nejo ninye, “Keseriani ake iyie Simri, oloata iloikop lo lkitok lenye?”

³²Neshumu Yehu inkonyek enyena aing'or elusie, nejo, “Kalo ilo otii embata ai? Kalo?” Ore iltung'ana oaare aashu okuni naa isunashi oogelema neing'or ninye.

³³Nejoki ninche, “Entusulaki ninye enkop.” Nesulaki ninche ninye enkop; ore embata o sarge lenye neisuaakino esuntai, o mbartan, neitunyoo mbartan ninye.

³⁴Neitoki ninye ajing atua aji nedaa neokisho; nejo, “Entodol ena kitok nadiaa, enchom entunukai ninye; amu entito o laiguanani ninye.”

³⁵Kake ore ake pee epuo ninche aanukaa ninye, neitu edol toki meteleku ake endukuya o nkejek, o ndapi oo nkaik.

³⁶Ore ake pee errinyunye ninche aaliki Yehu, nejo ninye, “Ororei lo Laitoriani ele, apa oiroro aimunye osinka lenye Elisha le Tishbi, ejo, ‘Ore to lpolosie le Yesreel naa kenya ildiein inkiri o sesen le Yesebel;

³⁷naa ketiu empopok e Yesebel anaa emodiei eirrag tioriong enkop, to lpolosie le Yesreel, ometaa meetae oltung'ani ojo, Yesebel ena.’ ”