Read MAASAI REVISED PROTESTANT 1 Intepen 11 Bible Online

1 Intepen 11 - MAASAI REVISED PROTESTANT bible

1 Intepen 11

¹Neitoki iltung'ana pooki le Israel aaiturrurro tenebo te netii Daudi te Hebron, nejoki ninye, “Kira iyiook osarge lino o sesen lino.

²Ore too nkolong'i naatulusoitie o enapa kata doi ninye aa olaiguanani Saul, iyie apa orikoo Israel aipang'ie nintijing'u; nikitiaaka iyie Olaitoriani Enkai ino, ‘Iyie oaku olairritani loo iltung'ana laainei Isiraeli, naa ilo aaku olkitok oitore iltung'ana laainei le Israel.’ ”

³Neaku eetuo ilpayiani pooki le Israel enetii olaiguanani te Hebron; neitobir Daudi olning'o o ninche te Hebron te dukuya Olaitoriani. Nebukoki ninche Daudi eilata aaput metaa olaiguanani le Israel te risioroto o rorei lo Laitoriani oimunye Samuel.

⁴Ore Daudi o ltung'ana pooki le Israel nepuo Yerusalem, aa taa Yebus, ine apa netii Ilyebusi lelo oomanya ina kop.

⁵Nejoki lelo oomanya Yebus Daudi, “Milotu iye ine.” Ore ake eyia neibung Daudi ina ang nagol e Sion, aa taa, enkanasa e Daudi.

⁶Nejo Daudi, “Ore oltung'ani oiter arasaki Ilyebusi naa keaku olkitok neaku olarikoni le njore.” Ore olayioni le Seroya, neituruk alo, neaku etaa ninye olkitok.

⁷Nebik Daudi tiatua ina ang nasheta sunta, neaku etejoki apa ine enkanasa e Daudi.

⁸Neshet ninye ina anasa aitamanaa ebaiki Milo neidip aitamanaa. Neitoki Yoab aitobir ineetebelate te nkanasa.

⁹Neponari Daudi aaku kitok oleng, amu ketii apa Olaitoriani loo lororani tenebo ninye.

¹⁰Naa kulo apa ilkituaak le lelo tung'ana le Daudi magil, laa ninche ootijing'a ninye enkoriong te nkitoria enye, tenebo Israel pooki, pee eitaa ninche olaiguanani, te risioroto o rorei lo Laitoriani oipirta Israel.

¹¹Kulo lelo tung'ana le Daudi magil; Yashabean le Hakomon, ilo arikoni le lelo okuni, etara ninye te mpere iltung'ana iip uni near pooki metuata te nkata nabo.

¹²Ore oliare ninye te lelo pokira okuni magil naa, Eliesa olayioni le Dodo, le Ahoti.

¹³Etii apa ninye tenebo Daudi te Pas Damim ina kata apa pee eiturrurro Ilfilisti teine to larrabal. Etii apa ine enkurma nabore shairi neisik iltung'ana aailany Ilfilisti.

¹⁴Kake eitasho ninye te mpolos eina kurma neisulie, nesesekuan Ilfilisti, neitajeu Olaitoriani ninche te nkisulata kitok.

¹⁵Ore lelo okuni le lelo tung'ana pokira tomoni uni kituaak nedoyio aapuo endapidapoi ine netii Daudi te nkapune e Adulam, ina kata etii enjore oo Lfilisti ilng'oborri to erata le Refaim.

¹⁶Netii apa Daudi ina kata atua osempewuet; netii oltim loo Ilfilisti ina kata Betlehem.

¹⁷Nejo Daudi keeta enkure, “Woi naaji tenatum oltung'ani laayaki enkare naok to lchorro le Betlehem otii embata e kishomi!”

¹⁸Ore lelo tung'ana okuni magil neim atua ilng'oborri loo Lfilisti; nepuo aaoku enkare teilo shorro le Betlehem otii embata e kishomi, neyaki Daudi. Kake eitu eok Daudi, etubukoko ninye Olaitoriani,

¹⁹nejo, “Maatalama nanu ena te dukuya Enkai ai tenaa kaas ena. Kaok nanu osarge le nkishui le kulo lewa? Amu etipika ninche enkishui enye batisho pee eyau.” Kuna baa etaasa lelo tung'ana okuni magil.

²⁰Ore apa Abishai, olalashe le Yoab laa olarikoni le tomoni uni. Near ninye te mpere iltung'ana iip uni metuata, nening'oyu enkarna enye tenebo lelo okuni.

²¹Ninye apa yioloti oleng te lelo tomoni uni, neaku olarikoni lenye, kake eitu etiu anaa lelo pokira okuni.

²²Naa ore apa Benaia olayioni le Yehoida naa oltung'ani oning'o oleng te Kabseel olaasani loo mbaa sapuki; etara ninye iltung'ana oaare yiolot le Moab metuata. Eshomo sii apa ajing'aki olng'atuny te ngumoto near metua teina olong apa naiputa enkirobi enkop.

²³Etara sii apa metua Olmisiri, ilo tung'ani apa sapuk laa ntemat e nkaina imiet enkadoro, eeta ilo Misiri empere enye naba anaa embokishi; kake eshomo Benaia enetii ninye eeta eng'udi ake, newuapaa empere te nkaina e ilo Misiri near ninye metua te mpere enye makewan.

²⁴Kuna baa etaasa Benaia olayioni le Yehoida, nening'oyu enkarna enye tenebo lelo tung'ana okuni magil.

²⁵Ening'o apa ninye oleng te lelo tomoni uni, kake menyaanyukie lelo pokira okuni. Nepik Daudi ninye meitasheiki lelo arripok lenyena.

²⁶Ore apa lelo tung'ana magil loo njorin naa Asahel, olalashe le Yoab o Elhanan olayioni le Dodo le Betlehem

²⁷o Shumot le Harod o Heles le Peloni

²⁸o Ira olayioni le Ilkedesh le Tekoa o Abiesa le Anatot,

²⁹o Sibekai le Hushat o Ilai le Ahoti

³⁰o Maharia le Netofa o Heled olayioni le Baana le Netofam o

³¹Itai olayioni le Ribai le Gibea loo le Benchamen o Benaia le Piraton,

³²o Hurai too nchorroi e Gash o Abiel le Abati,

³³o Asmafet le Baharum o Eliaba le Shaalbon,

³⁴o Hashem le Gison o Yonatan olayioni le Shagee le Harari,

³⁵o Ahinoam olayioni le Sakar le Harari o Elifat olayioni le Uri,

³⁶o Hafer le Mecherat o Ahija le Pelon

³⁷o Hesso le Karmel o Naarai olayioni le Esbai,

³⁸o Yoel olalashe le Natan o Mibar olayioni le Hagri,

³⁹o Selek le Amon o Naharai le Beerot ilo anapani loo masaa o larrabal e Yoab olayioni le Seruya.

⁴⁰O Ira le Itiri o Gareb le Itiri,

⁴¹o Uria le Hiti o Sabad olayioni le Ahalai,

⁴²o Adina olayioni le Shisa le Ruben, olarikoni loo le Ruben naa tomoni uni ilewa ootii tenebo ninye,

⁴³o Hanan olayioni le Maaka o Yoshafat le Mitini,

⁴⁴o Usia le Asheri, o Shama o Yerel ilayiok le Hotam le Arori,

⁴⁵o Yediel olayioni le Shiuri o Yoha olalashe lenye, le Tisi,

⁴⁶o Eliel le Mahafi o Yeribai o Yoshafia, ilayiok le Elnaan o Itam o Itma le Moab

⁴⁷o Eliel, o Obed o Yaasiel le Moraba.