Read MAASAI REVISED PROTESTANT 1 Intepen 19 Bible Online

1 Intepen 19 - MAASAI REVISED PROTESTANT bible

1 Intepen 19

¹Ore apa te siadi ena, neye Nahash olaiguanani loo Lamori, neitoreisho olayioni lenye te rishata enye.

²Nejo Daudi, “Kaitaas nanu inesupatisho Hanan olayioni le Nahash, amu aaitaasa apa menye inesupatisho.” Neaku eirriwayie Daudi ilkiliku pee epuoi aaitagol ninye te nkaraki keeya e menye. Nepuonu isinkan le Daudi enetii Hanan teinakop oo Lamori, pee eitagol ninye,

³kake etiaakita lelo kituaak loo Lamori Hanan, “Ijo iyie eji ore amu kirriwaka Daudi ilarumak naa papaai lino eyanyit? Aime keetuo isinkan lenyena enitii pee ejurrisho, neibelekeny enkop aaikeern?”

⁴Neaku etang'amua Hanan isinkan le Daudi, nebarn ninche, nedung'oo nkilani enye aitoritie too mpolosi, neisho ninche meshomo;

⁵nepuo ninche. Ore ake pee elikini Daudi kulo tung'ana, neirriwaa iltung'ana metanang'are ninche, amu etipikaki apa lelo tung'ana esulare oleng. Nejo olaiguanani, “Entobik te Yeriko ometaba anaa nebulu ilmunyo linyi nintokiki aapuonu.”

⁶Ore ake pee edol Ilamori aajo eitagoro Daudi, neirriwaa Hanan ntalantani enkalifu nabo e nkosholai pee eisilenu ngarrin oo mbartan, o lakedok loo mbartan te Mesopotamia, tenetii Aramaaka o te Soba.

⁷Neisilenu ninche ngarrin oo mbartan nkalifuni tomoni uni oaare o laiguanani le Maaka tenebo enjore enye, apa naewuo aun ilng'oborri te Madeba. Neipotuni Ilamori metupuku too nkanas aapuonu olarrabal.

⁸Ore ake pee ening Daudi ina, neirriwaa enjore pooki oo ltung'ana magil.

⁹Nepuonu Ilamori neluaakino olarrabal etanapate te nejing'ieki enkanasa, ore lelo aiguanak apa ooetuo netii ninche iwuejitin enye maate te wueji neisiasha.

¹⁰Ore ake pee edol Yoab ajo eimua ninye olarrabal te dukuya o te siadi, negelu iltung'ana arriyiak le Israel, neitobiraki olarrabal too le Siria.

¹¹Ore kulikae tung'ana lenyena nepik abori erikoto e Abishai olalashe lenye, neitoluakini ninche metaarare Ilamoni.

¹²Nejo Yoab, “Tenaa kegol Siria oleng te nanu nikipuonunu aaretu nanu; naa te negol Ilamori oleng te intae, naa karetu intae.

¹³Entagoluoto naa mataa lewa to losho lang o nkanas e Nkai ang; naa metaasa Olaitoriani ina naishiakino te ninye.”

¹⁴Nepuonu Yoab o lelo tung'ana apa ootii tenebo ninye aaigutaki ile Siria to larrabal; neilanyisho ninche te dukuya ninye.

¹⁵Ore ake pee edol Ilamoni aajo eilanyishote Isiria, neilanyisho sii ninche te dukuya Abishai, ilo alashe le Yoab, nepuo aajing atua enkanasa. Nelo Yoab Yerusalem.

¹⁶Kake ore ake pee edol Isiria aajo etimira Isiraeli ninche, neirriwaa ilkiliku meyauni lelo Siria apa ootii te idia alo olkeju le Frati, tenebo Shofak le njore e Hadadesa te dukuya ninche.

¹⁷Ore ake pee elikini Daudi, neiturrur Isiraeli pooki tenebo, nelang olkeju le Yordan, nepuonu enetii ninche, neitoloku iltimito lenyena aipirakinye ninche. Ore ake pee eitobir Daudi olarrabal te nkaraki Siria, nearare ninche ninye.

¹⁸Neilanyisho Isiria te dukuya Isiraeli, near Daudi to lalem iltung'ana le Siria nkalifuni naapishana e lelo ooreu ngarrin oo mbartan o nkalifuni artam oo loopuo too nkejek near sii metua Shofak ilo kitok le njore.

¹⁹Ore ake pee edol isinkan le Hadadesa nchere etimira Isiraeli ninche, neitayu osotua o Daudi, neaku ilaisiaayiak lenyena. Neaku meyieu Isiria neigil aaretu Ilamoni.