Read MAASAI REVISED PROTESTANT 1 Intepen 26 Bible Online

1 Intepen 26 - MAASAI REVISED PROTESTANT bible

1 Intepen 26

¹Ore tialo eoroto oo larripok loo nchomito: ore too ltung'ana le Kora naa Meshelemia olayioni le Kore, obo loo layiok le Asaf.

²Neeta apa Meshelemia kulo ayiok: Sakaria aa ninye olkikau, naa Yediael oliare, naa Sebadia oliokuni, naa Yatiniel oliong'uan,

³naa Elam olayioni le miet, naa Yehohanaan olayioni le ile, naa Eliehoenia oliopishana.

⁴Neeta sii apa Obed-edom ilayiok: naa Shemaia olkikau, naa Yehosabad oliare, naa Yoa oliokuni, naa Sakar oliong'uan, naa Netanel olayioni le miet,

⁵naa Amiel olayioni le ile, naa Isaakar oliopishana, naa Peuletai olayioni le isiet; amu etamayiana apa Enkai ninye.

⁶Ore sii apa tialo olayioni lenye Shemaia, netoiwuoki ilayiok laa ninche ootaa ilaitoriak loo nkajijik oo loo menye, amu iltung'ana apa ooata enkidimata kitok oleng.

⁷Ore ilayiok le Shimeia, naa, Otini o Refael, o Obed o Elisabad, neeta apa ilalashera lenye enkidimata, Elihu o Shimeia.

⁸Ore kulo pooki naa ilo lmarei le Obed-edom, tenebo ilayiok lenye o lalashera lenye. Iltung'ana ooata enkidimata ninche naa arriyiak te siaai. Iltung'ana le Obed-edom ntomoni ile oaare.

⁹Neeta sii apa Meshelemia ilayiok o lalashera iltung'ana ooata enkidimata oora tomon o isiet.

¹⁰Ore Hosa loo layiok le Merari neeta kulo ayiok: Shimri aa ninye olkitok, (amu ore duoo ninye neme olkikau ninye, neitaa menye kitok).

¹¹Naa Hikia osuju, naa Tebalia oliokuni naa Sekaria olioong'uan; ore ilayiok pooki o lalashera le Hosa naa tomon ookuni.

¹²Ore kulo turrurri pooki loo larripok loo nchomito, negeluno ake aaipirare ltung'ana lenye kituaak, negelakino enkisiaayiare, anaa apa enataasa ilalashera lenye, eisiaaisho tiatua enkaji o Laitoriani.

¹³Neosh ninche enkukuo anaa too nkajijik oo loo menye, neitorisi nkutiti o sapuki, te nkaraki nchomito enye.

¹⁴Ore enkukuo enkalo o loosaen nedoiki Shelemia. Enyaakita sii aoshoki olayioni lenye Sekaria enkukuo, ilo autaroni ng'en nedoiki enkukuo enye enkalo e moikuape.

¹⁵Nelotu Obed-edom enkalo e kopikop ore ilayiok lenyena neishori enkaji nashumishoreki.

¹⁶Ore Shupim o Hosa nedoiki enkukuo enye enkalo o loo ntoluo, embata e nkishomi e Sheleket, teina oitoi kitok nalo ailep. Neipirakinore ake olarriponi olarriponi.

¹⁷Ore te nkalo o loosaen netii ilarripok ile anaake, ore te nkalo e moikuape netii ilarripok oong'uan anaake, ore te nkalo e kopikop netii ilarripok oong'uan anaake, tenebo ake sii kulikae maare maare te nkaji nashumishoreki.

¹⁸Ore te nkalo o loo ntoluo netii ilarripok oong'uan enkoitoi kitok netii oaare ine wueji neitobiraki aakus.

¹⁹Kulo ninche ilturrurri loo larripok loo nchomito tialo ile Kora o layiok le Merari.

²⁰Ore too Lawi, naa Ahija apa oata enkitasheikinoto te nkaraki enchumare oo masaa e nkaji e Nkai o lchumat loo nkishoorot naaitisinyaki.

²¹Ore ilayiok le Ladan, lelo ayiok le Gershom ooara ile Ladan, nena lukuny oo nkajijik oo loo menye naa ile Ladan le Gershom: Yehiel.

²²Ore ilayiok le Yehiel, naa Setam o Yoel olalashe lenye, naa ninche ooitasheiki ilchumat le nkaji o Laitoriani.

²³Ore too le Amram, lelo le Isharit,

²⁴o le Shebuel ilo ayioni le Gershom, olayioni le Musa, naa ninye olkitok oitasheiki ilchumat.

²⁵Ore ilalashera lenyena, ebaiki Eliesa; naa olayioni lenye Rehabia o layioni lenye Yeshaia, olayioni lenye Yoram, olayioni lenye Sikri, naa olayioni lenye Shelomot.

²⁶Ore Shelemot o lalashera lenyena naa ninche ooitasheiki ilchumat le nena kishoorot apa naaitisinya olaiguanani Daudi, tenebo ilukuny oo nkajijik oo loo menye o lkituaak loo nkalifuni o loo maa iip loo larikok le njore naaitisinyaki.

²⁷Ore ntokitin naataaruaki to larrabal, neitisiny ninche nena kishoorot pee eitobirieki enkaji Olaitoriani.

²⁸O nena sii pooki naaitisinya Samuel oladuaani, o Saul olayioni le Kish o Abna olayioni le Neer o Yoab olayioni le Seruya - ore nena kishoorot pooki naaitisinyaki naa abori enking'urata e Shelemot etii o lalashera lenyena.

²⁹Ore too Lharisit, naa Kenaia o layiok lenyena etegeluaki te nkaraki isiaaitin e boo too Siraeli, metaa ilkituaak o larishak.

³⁰Ore too le Hebron, naa Hashabia o lalashera lenyena, iltung'ana enkalifu nabo o iip naapishana ooata enkidimata, ooing'or aagolie Israel, te nkalo o loo ntoluo lo lkeju le Yordan, te siaai pooki Olaitoriani o te nkisiaayiare o laiguanani.

³¹Ore too le Hebron, naa Yeriya olkitok loo le Hebron te pooki iishoritin o too nkajijik oo loo menye. (Ore to lari liartam le nkitoria e Daudi, netujurroki iltung'ana netumi iltung'ana ooata enkidimata tiatua ninche te Yaser tiatua Gilead.)

³²Etegelua olaiguanani Daudi ninye o lalashera lenyena, iltung'ana nkalifuni are o iip naapishana ooata enkidimata, nena lukuny oo nkajijik oo loo menye, pee eitasheiki ile Ruben, o le Gad, olpisiai lo losho le Manase te pooki bae naipirta Enkai o too mbaa o laiguanani.