Read MAASAI REVISED PROTESTANT 1 Intepen 5 Bible Online

1 Intepen 5 - MAASAI REVISED PROTESTANT bible

1 Intepen 5

¹Kulo ile ishoi e Ruben ilo kikau le Israel, (ore te nkaraki natijing'a enkaji e papaai lenye, meekure eikenari aajo olkikau. Ore erishata enye neishori ilayiok le Yosef olayioni le Israel. Amu eitu eigeri enkarna enye te mbuku oo iishoritin anaa olkikau.

²Ore hoo naa Yuda apa ogol alang ilalashera lenyena, naa ninye eimu ilo kitok, kake ene Yosef enjung'ore o lkikau.)

³Ore ilayiok le Ruben ilo kikau le Israel naa: Hanok, o Palu o Hesron o Karmi.

⁴Kulo ilayiok le Yoel: Shemia olayioni lenye, o Gog olayioni lenye o Shimei olayioni lenye

⁵o Mika olayioni lenye o Reaia olayioni lenye o Baal olayioni lenye

⁶o Beara olayioni lenye, laa ninye apa ewa olaiguanani Tilgat Pilnesa le Asiria te yararoto. Ninye apa oltung'ani kitok too le Ruben.

⁷Ore iltung'ana lenye too lmareita lenye, ina kata pee eigeri iishoritin enye naa: ore olkitok lenye naa Yerel o Sakaria

⁸o Bela olayioni le Asas olayioni le Shema, olayioni le Yoel, apa omanya Aroer ometabaiki Nebo o Baalmeon.

⁹Etobiko sii apa te nkalo o loosaen ometabaiki olpolosie lo lpurkel tena shoto e Frati, amu etoponari apa nkishu enye te nkop e Gilead.

¹⁰Ore too nkolong'i e Saul neitayunye iltung'ana le Hagrit olarrabal, neibung ninche, nebik ninche too lng'oborri lenye te nkop pooki e Gilead te nkalo oloosaen.

¹¹Etamanya apa ilayiok le Gad aatashare ile Ruben te nkop e Bashan ometabaiki Saleka.

¹²Yoel apa olkitok nesujaki Shafan o Yanai o Shafat te Bashan.

¹³Ore olorere lenye te risioroto oo nkajijik oo loo menye naa: Mikael o Meshulam o Sheba o Yorai o Yakan o Sia o Eber, lelo pokira oopishana.

¹⁴Kulo apa ilayiok le Abihail olayioni le Huri olayioni le Yaroa, olayioni le Gilead, olayioni le Mikael, olayioni le Yeshishai, olayioni le Yohado, olayioni le Buus.

¹⁵Ahis olayioni le Abdiel, olayioni le Guni ninye apa olkitok te nkaji e menye.

¹⁶Nebik apa ninye te Gilead, tiatua Bashan o too nkang'itie enyena, o teinakop pooki nairritishoreki e Sharon o meiting'ie.

¹⁷Eigeroki apa kuna baa pooki anaa iishoritin too nkolong'i e Yotam olaiguanani le Yuda o too nkolong'i e Yeroboam olaiguanani le Israel.

¹⁸Ore tiatua iloshon le Ruben o Gad o lpisiaai lo losho le Manase, neeta iltung'ana magil, ooata long'oi o lalema, neeta nkai, naa arriyiak to larrabal, naa nkalifuni artam oong'uan, o iip naapishana o ntomoni ile, neterretenate ninche te nkisiaayiare.

¹⁹Neitayu ninche olarrabal o Lhagri, o lyetur, Olmafish, Olnadab;

²⁰ore ake pee eng'amu ninche eretoto pee egilunore ninche, ore Ilhagri, o lelo pooki ootii tenebo ninche neishoori aapik inkaik oo le Ruben, amu Olaitoriani eishirakita ninche to larrabal, neisho ninche Enkai eomonunoto enye te nkaraki naisiliga ninche ninye.

²¹Neya ninche nkishu enye, o ntamesin enye nkalifuni onom, o nkerra nkalifuni iip are o onom, o sirkon nkalifuni are, o ltung'ana ooishu nkalifuni iip nabo.

²²Amu eirragaitie ilkumok etuata, amu ore ilo arrabal naa ole Nkai. Nebik ninche te nkop enye ometabau eyararoto.

²³Ore olpisiai loo ltung'ana le Manase nebik teinakop, neaku ninche kumok oleng te Bashan o metabaiki Baarhermon o Senir o ldoinyio le Harmon.

²⁴Kulo apa ilukuny oo nkajijik oo loo menye: Efer o Ishi o Eliel o Esriel o Yeremia o Hadafia o Yadiel, lelo murran magil, ooning'o, laa lukuny oo nkajijik oo loo menye.

²⁵Kake etogolong'okita ninche Enkai oo loomenye, neiborrie onyek aarubare nkaitin oo ltung'ana leina kop apa naaidaikie Enkai te dukuya ninche.

²⁶Ore te nkaraki ina neputu Enkai e Israel oltau le Puul, olaiguanani le Asiria, o ltau le Tilgal-Pilnesa, olaiguanani le Asiria, nearaa ninche meshomo, aa taa ile Ruben o le Gad, o lpisiaai loo ltung'ana le Manase, nereu ninche Hala, o Habor, o Hara, nereu sii olkeju le Gosan ometabaiki ena olong.