Read MAASAI REVISED PROTESTANT 1 Intepen 9 Bible Online

1 Intepen 9 - MAASAI REVISED PROTESTANT bible

1 Intepen 9

¹Eigeroki apa nkarn oo ltung'ana pooki le Israel anaa too iishoritin enye, neigeroki pooki te mbuku oo laiguanak le Israel. Newaki apa iltung'ana le Yuda eyararoto te Babilon te nkaraki nemeisiligayu ninche.

²Ore apa iltung'ana le dukuya ootang'asa aamany iwuejitin tiatua nkanas enye naa ile Israel o lapolosak o le Lawi o laisiaayiak le nkaji e Nkai.

³Ore kulikae tung'ana le Yuda, na Benchamen o Efraim o Manase nebik te Yerusalem.

⁴Utai ole Amihud, olayioni le Omri, olayioni le Imri, olayioni le Bani, oing'uaa ilayiok le Peres olayioni le Yuda.

⁵Ore too le Shilo naa: Asaia ilo kikau o layiok lenyena.

⁶Ore too layiok le Serak naa: Yeul o lalashera lenyena, iip ile o ntomoni naaudo.

⁷Ore loo le Benchamen naa: Salu olayioni le Meshulam ole Hodafia, olayioni le Hasenau

⁸o Ibneaia olayioni le Yeroham o Elak olayioni le Usi olayioni le Mikri o Meshulam olayioni le Shefatia olayioni le Reul olayioni le Ibnija.

⁹Ore ilalashera lenyena te risioroto oo iishoritin enye naa iip naaudo o onom o ile. Ore kulo pooki naa lukuny oo nkajijik oo loo menye te risioroto oo nkajijik oo loo menye.

¹⁰Ore too lapolosak ootushukunye Yerusalem naa Yedaia o Yehoiarib o Yakin

¹¹o Asaria olayioni le Hilkia, olayioni le Meshulam, olayioni le Sadok, ilo aitasheikinoni kitok le nkaji e Nkai.

¹²O Pashur olayioni le Malkija o Maasai olayioni le Adiel olayioni le Yehesera, olayioni le Meshulam, olayioni le Meshilamit, olayioni le Imer.

¹³Ore tenebo ilalashera lenye o lukuny oo nkajijik oo loo menye naa enkalifu nabo o iip naapishana o ntomoni ile. Iltung'ana ooata enkidimata oleng ninche, te nkaraki e nkisiaayiare e nkaji e Nkai.

¹⁴Ore too Lawi apa ootushukunye Yerusalem naa Shemaia olayioni le Hashub, olayioni le Asrikam, olayioni le Hasabia, loo layiok le Merari;

¹⁵o Babakar o Heresh o Galalo Matamia olayioni le Mika, olayioni le Mikiri, olayioni le Asaf.

¹⁶O Obadia olayioni le Shemaia, olayioni le Galal, olayioni le Yedutum o Berekia olayioni le Asa, olayioni le Elkana laa ninche apa oomanya nkang'itie kutiti oo Lnetofati.

¹⁷Ore apa ilarripok le kishomi naa, Shalum o Akun o Talmon o Ahinam o lalashera lenyena, (aa Shalum olkitok).

¹⁸Netipikaki lelo metorripo kishomi o laiguanani te nkalo o loosaen. Kulo apa ninche ilarripok le kishomi te nkang oo lng'oborri oo le Lawi.

¹⁹Ore Shalum naa olayioni le Kore o layioni le Ebisaf o layioni le Kora o lalashera lenyena o enkaji e menye, lelo le Kora, naa ninche apa ooitasheiki esiaai e nkikesare, ninche ilaing'urak le wueji nejing'ieki olng'obor anaa apa enaitasheiki iloo menye ilo ng'obor lo Laitoriani, nerrip kishomi.

²⁰Naa Finehas olayioni le Eliesa ninye apa oitasheiki ninche too nkolong'i naatulusoitie; netii Olaitoriani tenebo ninye.

²¹Sekaria olayioni le Meshelemia apa olaing'urani le kishomi eilo ng'obor le ntumo.

²²Ore kulo pooki ootegeluaki metaa larripok loo njing'eta o lng'obor, naa iip are o tomon oaare. Neigeroki ninche too iishoritin tiatua nkang'itie enye. Nepik Daudi o Samuel ilo aduaani ninche esiaai e rripore te nkaraki naisiligayu ninche.

²³Neaku ninche o layiok lenye ooitasheiki nchomito naajing'ieki enkaji o Laitoriani o metabaiki ena olong, ina aji olng'obor, aaku ilarripok.

²⁴Ore apa lelo arripok loo nchomito netii imatuan ong'uan, oloosaen o loontoluo o kopikop o moikuape.

²⁵Ore lelo alashera lenye apa ootii nkang'itie enye nepuonu apa too rishat oo nkolong'i naapishana anaake, pee eaku tenebo kulo,

²⁶amu ore apa lelo aitasheikinok le kishomi oong'uan kituaak, laa ile Lawi, naa ninche ooitasheiki nkajijik o neeshumishoreki e nkaji e Nkai;

²⁷netoni aaman enkaji e Nkai amu ninche ilaing'urak, naa ninche oobol nchomito tadekenya anaake.

²⁸Ore kulikae Lawi neitasheiki imasaa e nkisiaayiare, amu keyieuni apa neikeni ninche teneitijing'uni o teneipang'ieki aaya.

²⁹Ore kulikae lenye negeluni meitasheiki ilorikan o masaa pooki naasinya o ina tapa napuyiapui o enaisho oo sabibu o eilata o enkorropil o sonkoyoni.

³⁰Ore kulikae le lelo ayiok loo lapolosak neitushul isonkoyoni.

³¹Ore Matitia obo loo Lawi, ilo kikau le Shalum le Kora, naa ninye oitasheiki enkitobirata oo mukateni dapashi.

³²Ore sii kulikae alashera lenye le Kohat neitasheiki emukate nkitoduaaroto, pee eitobir te pooki Sabato.

³³Naa kulo apa ilaranyak, ilukuny oo nkajijik oo loo menye too le Lawi, oobikito too lgilat le nkaji e Nkai, lemetii ae kisiayiare, amu ketii apa ninche esiaai enye dama o kewarie.

³⁴Kulo apa ninche ilukuny oo nkajijik oo loo menye too le Lawi, te risioroto oo iishoritin enye, lelo arikok apa oomanya Yerusalem.

³⁵Kemanya apa Yeiel menye le Gibeon, enkanasa naji Gibeon. Ore enkarna e nkitok enye naa Maaka.

³⁶Ore olkikau lenye naa Abdon, nesuju Sur o Kish o Baal o Ner o Nadab

³⁷o Gedor o Ahio o Sakaria o Miklot,

³⁸naa Miklot apa menye le Shimeam, ore sii kulo nemanyisho aataaniki ilalashera lenye te Yerusalem, tenebo iltung'ana lenye.

³⁹Ner apa menye le Kish naa Kish menye le Saul, naa Saul menye le Yonatan o Malkishua o Aminadab o Esbaal:

⁴⁰ore olayioni le Yonatan naa Meribaal; naa Meribaal menye le Mika.

⁴¹Ore ilayiok le Mika naa Pison o Melek o Taharea o Ahas,

⁴²naa Ahas apa menye le Yara, naa Yara menye le Alemet o Asmafet o Simri; naa Simri menye le Mosa.

⁴³Mosa apa menye le Binea naa Refaia olayioni lenye, naa Eliesa olayioni lenye o Asiel olayioni lenye.

⁴⁴Keeta apa Asel ilayiok ile naa kuna nkarn enye: Askrikam o Bokeru o Ishmael o Shearia o Obadia o Hanan; kulo apa ninche ilayiok le Asel.