Read MAASAI REVISED PROTESTANT 2 Intepen 19 Bible Online

2 Intepen 19 - MAASAI REVISED PROTESTANT bible

2 Intepen 19

¹Nerrinyunye te Seriani Yehoshafat olaiguanani le Yuda alotu enkaji enye te Yerusalem.

²Kake eshomo Yehu olayioni le Hanani, ilo aduaani anang'are ninye, nejoki ninye olaiguanani Yehoshafat, “Iretu iyie olarruoni ninyor lelo ooiba Olaitoriani? Ore te nkaraki ena, eewuo engoro naing'uaa Olaitoriani te nkaraki iyie.

³Ore ake eyia, enotoki kulie baa sidain te iyie, amu indaikie Ashera aishie tena kop, ning'oru Enkai to ltau lino.”

⁴Nebik Yehoshafat te Yerusalem; nelo ninye tiatua olorere, ebaiki Beer-sheba o metabaiki ina kop oo ndoinyio e Efraim, neyau ninche arrinyoki Olaitoriani, Enkai oo loo menye.

⁵Negelu ninye ilarishak teinakop tiatua nkanas pooki naasheta isunta e Yuda. Te nkanasa ake o te nkanasa,

⁶nejoki ninye lelo arishak, “Entadamu eniasiasa, amu mme te nkaraki oltung'ani nguanarere, kake te nkaraki Olaitoriani; etii ninye tenebo intae idung'udung'u enkiguana.

⁷Ore naa taata nchoo euriata o Laitoriani eaku tenebo intae; entujurru eniasiasa; amu meetae enkibelekenyata e sipata to Laitoriani Enkai, anaa enyorrakinoto, anaa eng'amunoto oo ntokitin e ropare.”

⁸Ore ake sii te Yerusalem negelu Yehoshafat kulikae Lawi o lapolosak, o lukuny oo lmareita loo Siraeli, pee edung enkiguana te nkaraki Olaitoriani nedung enkiguana tenetii enchankar. Yerusalem apa etii entonata enye.

⁹Neitanap ninye ninche, ejo, “Nji intae enkuna te uriata o Laitoriani, o te nkisiligata, o too ltauja linyi pooki:

¹⁰Tenelo nelotu enkiguana naing'uaa ilalashera linyi ootii kulie anas, eipirta enkibukoroto o sarge, o enkitanapata, anaa nkikoot, o nkiguanat, ninteng'en iyie ninche, pee meas ake entorroni te dukuya Olaitoriani, melotu ake engoro napi shumata intae o lalashera linyi. Ena intae entaas nimbayuyu intae entorroni.

¹¹Naa entayiolo nchere Amaria ilo apolosani kitok otii te shumata intae tialo mbaa pooki o Laitoriani; naa Sebadia olayioni le Ishmael ninye olgafanai le nkaji e Yuda, too mbaa pooki naaipirta olaiguanani; naa Ilawi likisiai iyie anaa iltung'ana kituaak. Taasisho te mpijan naa nchoo eaku Olaitoriani tenebo ilo oitoriori mbaa enyena.”