Read MAASAI REVISED PROTESTANT 2 Intepen 2 Bible Online

2 Intepen 2 - MAASAI REVISED PROTESTANT bible

2 Intepen 2

¹Neitobir apa Solomon pee eshet enkaji e Nkai te nkaraki enkarna o Laitoriani, neitobiraki kewan enkaji e nkitoo.

²Neiteng'el Solomon iltung'ana inkalifuni intomoni naapishana pee enap ilolan, neiteng'el iltung'ana inkalifuni intomoni isiet pee eturu isoito teinakop oo ndonyio, neiteng'el iltung'ana inkalifuni uni o iip ile ooitasheiki ninche.

³Neirriwaki Solomon olkilikuai Huram olaiguanani le Tiro: Nejoki, “Ore apa anaa enintaasa Daudi papa, nirriwaki ninye iltarakua ooshetie enkaji enye nabikie, intaasaki sii nanu ina.

⁴“Etaa nanu kajo pee ashet enkaji te nkaraki enkarna o Laitoriani Enkai ai, naitisinya nanu ninye apejoki enkorropil, o sonkoyoni naarropil te dukuya ninye. Naishoru nanu anaake emukate e nkitoduaaroto, naishoru ilasarri oopejori tedekenya o teipa, too Sabatoni o too lapaitin ng'ejuko, o too siruai gelunot lo Laitoriani Enkai ang, anaa apa enaiteng'elaki intarasi te Israel.

⁵Ore ina aji nalo nanu ashet naa keaku kitok, amu ore Enkai ang naa aikitok alang inkaitin pooki.

⁶Kake aing'ae oidim ateshetaki ninye e nkaji, aa ore keper nalakua oleng nemeishaa ninye? Kara nanu ng'ae oshetaki ninye enkaji, meteleku ake ewueji nepejieki enkorropil te dukuya ninye?

⁷Ore naa taata irriwakaki nanu oltung'ani arriyia te siaai e saabu o enkosholai o suyai o sekenkei, o ltung'ani arriyia too muain pilei o naanyokie o nkilani pusi, o ltung'ani oiteng'enaki te nguetare, pee elo aaku tenebo lelo aisiaayiak arriyiak ootii tenebo nanu te Yuda o te Yerusalem, lelo apa ooishorua Daudi papaai lai.

⁸Irriwakaki sii iltarakua o lkeek oonyaanyukie iltarakua, o mbaoi naaing'uaa Lebanon, amu ayiolo nanu ajo keyiolo isinkan linono aatudungu imbaoi te Lebanon. Naa keaku isinkan laainei tenebo isinkan linono,

⁹pee aaitobiraki nanu imbaoi kumok, amu ore ina aji nalo nanu ashet naa keaku kitok naa enenking'asia.

¹⁰Naa kaishoru nanu te nkaraki isinkan linono, lelo oodung'u mbaoi, mpirbili inkalifuni tikitam e nkano naidong'o, o mpirbili inkalifuni tikitam e shairi, o mboreitin iip ong'uan oltulet le naisho oo sabibu, o eilata mboreitin iip ong'uan oltulet.”

¹¹Neitoki Huram ilo aiguanani le Tiro awal te mpalai naigeroko Solomon, nejo, “Ore te nkaraki nanyor Olaitoriani iltung'ana lenyena, kintaa iyie olaiguanani lenye.”

¹²Neitoki Huram, ajo, “Meisisi Olaitoriani Enkai e Israel, ilo oitobira shumata o enkop, laa ninye oishoo olaiguanani Daudi olayioni ng'en, neiputaki enkarriyiano o eyiolounoto, laa ninye oshetaki Olaitoriani enkaji, neshetaki kewan enkaji e nkitoo.

¹³“Airriwua naa taata nanu oltung'ani arriyia, obore eyiolounoto, Huramabi

¹⁴olayioni le ntito e Dan, ore apa menye naa oltung'ani le Tiro. Eiteng'enaki ninye pee easishore saabu, o enkosholai, o suyai, o esekenkei, o soito o nkeek, o muain pooki pilei o mpusi, o nkilani naanyokie o kitani napuyiapui. Neas impukunot pooki e nguetare nedamu enkipirunoto ake ninye naishooki ninye meipiru. Keaku lelo tung'ana linono arriyiak tenebo iltung'ana arriyiak lo lkitok lai Daudi papaai lino.

¹⁵Ore naa taata ina ano o shairi, o eilata o enaisho oo sabibu, naa ninche eimaka olkitok lai, inchoo ninye meirriwaki isinkan linono;

¹⁶naa aikidung'u iyiook mbaoi naaba anaa iniyieu te Lebanon, nikiyaki iyie too rridat aaimunye enaiposha e Yopa, pee itum iyie aawa Yerusalem.”

¹⁷Neitoki Solomon aiken iltung'ana pooki dokunot apa ootii enkop e Israel, aiturubare ina kikenare apa naikenishe Daudi papaai lenye. Netumi iltung'ana inkalifuni iip nabo o onom o okuni o iip ile.

¹⁸Ore intomoni naapishana negelu metanapa ilolan. Ore inkalifuni intomoni isiet nepuo aaturu isoito teinakop oo ldoinyo, ore inkalifuni uni o iip ile neitaa ilaitasheikinok pee etum iltung'ana aataas esiaai.