Read MAASAI REVISED PROTESTANT 2 Intepen 20 Bible Online

2 Intepen 20 - MAASAI REVISED PROTESTANT bible

2 Intepen 20

¹Ore te siadi ena nepuonu Ilmoabu, o le Amon o kulikae ooing'uaa Meani, nepuonu aarasaki Yehoshafat to larrabal.

²Nepuonu kulikae tung'ana aajoki Yehoshafat, “Etii olorora kitok oing'uaa Edom likipuonu aarare, ooing'uaa lido kekun le naiposha, etii ninche Hasasotama” (aa taa Enkedi).

³Neureishoyu Yehoshafat, neing'oru Olaitoriani makewan, neitanapisho meteena iltung'ana ate aapukoo te Yuda pooki.

⁴Neiturrurro Yuda aaing'oru eretoto to Laitoriani; eing'uaa nkanas pooki e Yuda nepuonu aaing'oru Olaitoriani.

⁵Neitashe Yehoshafat tiatua eumata e Yuda o Yerusalem, tiatua enkaji o Laitoriani, te dukuya ilo goriet ng'ejuk,

⁶nejo ninye, “Olaitoriani, Enkai oo loo papa, aime iyie Enkai te keper? Aimintore iyie nkitoriat pooki oo loshon? Enkaina ino etii engolon o enkidimata, ore te nkaraki ina meetae oltung'ani likindimaa iyie.

⁷Keitu iyie, Na Ai ang, iaraa lelo apa oomanya ena kop te dukuya iltung'ana linono loo Siraeli; ninchooyie ntarasi aisho eishoi e Abraham ilo shore lino?

⁸Netamanya ninche atua, nikiteshetakita ninche ewueji sinyati, te nkaraki enkarna ino, nejo,

⁹‘Tenelotu entorroni shumata iyiook, olalem, o enkiguana, anaa olmeitai, anaa olameyu, nikintashe iyiook te dukuya ena aji, o te dukuya iyie, amu etii enkarna ino atua ena aji, nikinchiraki iyie tosina lang, nining iyie, nintajeu iyiook.’

¹⁰“Ore naa taata ng'ura kulo tung'ana le Amon o le Moab o lo ldoinyo le Seir, leitu iyie incho iyie Isiraeli metarasaki ninche, apa eing'uaa enkop e Misiri, netapaasha apa ninche neitu eidaikie.

¹¹Toduaa elaakinoto naisho ninche iyiook, epuonu aaraa iyiook aaipang'ie te nkop ino apa ninchoo iyiook matujung.

¹²Na Ai ang aimidung'oki iyie ninche enkiguana? Amu mikiata iyiook engolon tialo ele orora kitok olotu agilunore iyiook. Mikiyiolo iyiook aajo kaa kias, kake iyie eimariri nkonyek ang.”

¹³Ore teina kata neitashe iltung'ana pooki le Yuda te dukuya Olaitoriani, tenebo nkera enye kutiti o nkituaak enye, o nkera enye.

¹⁴Nelotu Enkiyang'et o Laitoriani shumata Yahasiel olayioni le Sekaria, olayioni le Yerel, olayioni le Matania, Olawi loo layiok le Asaf, te mpolos eina umata.

¹⁵Nejo ninye, “Entoning, Yuda pooki o loomanya Yerusalem o laiguanani Yehoshafat: Nji ejoki intae Olaitoriani, ‘Emiureisho nimileporiri te nkaraki ele orora kitok, amu mme olinyi ele arrabal, kake ole Nkai.

¹⁶Ore taisere tadoi shomo tigilunore ninche; ng'ura keilepu ninche aaimu enkoitoi e Siis; ilo iyie ainepu ninche te nkiting'oto o erata, te nkalo o loosaen tiong'ota e Yeruel.

¹⁷Meeta tipat niarishore iyie tele arrabal; ntasho ake duoo, ntirring'ayu pee idol enkisulata o Laitoriani, te rishata ino. Iyie Yuda o Yerusalem.’ Miureishoyu nimilepori. Ore taaisere tadoi shomo tigilunore ninche, naa keaku Olaitoriani tenebo intae.”

¹⁸Neirrugo Yehoshafat aitabaiki enkomom enye enkop, ore Yuda pooki, o lelo oo manya Yerusalem nebatata te dukuya Olaitoriani, neserem Olaitoriani.

¹⁹Ore Ilawi le Kohat o Lkorati neitashe aaisis Olaitoriani Enkai e Israel to ltoilo sapuk oleng.

²⁰Nedumunye ninche tadekenya enasirie, nepuo ong'ata e Tekoa, ore epuoito ninche neitashe Yehoshafat nejo, “Entoning'oki nanu Yuda o intae iloomanya Yerusalem! Eruko Olaitoriani Enkai inyi, pee eitasheyieki intae, entoning iloibonok lenyena pee idupoyuyu.”

²¹Ore ake pee eidip aiguana iltung'ana, negelu lelo oopuo aaranyaki Olaitoriani neisis ninye eishopito ilkilani sinyat, nepuo ninche te dukuya enjore, nejo “Enchoo Olaitoriani enashe, amu ore enyorrata enye nauno nebikoo ntarasi.”

²²Ore ake pee eiteru aaranyisho neisis Olaitoriani, nerasaki Olaitoriani iltung'ana le Amon, o Moab o lo ldoinyio le Seir, laa ninche apa ooetuo aagilunore Yuda, neaku eishieki ninche.

²³Amu etudumakinote iltung'ana le Amon o le Moab iltung'ana lo ldoinyo le Seir, neidaikie ninche katukul, ore ake pee eishie iltung'ana le Seir, neitoki ninche aaidaakino maate.

²⁴Ore pee epuonu Yuda oltalet liong'ota, neing'or ilo orora naa ng'ura! Mpopoki ake naairragaa te nkop. Meetae oloilanyishe.

²⁵Ore pee elotu Yehoshafat o ltung'ana lenyena aaya iyarunot enye, netum ninche nkishu kumok, o masaa, o nkilani, o ntokitin naagol enkinyang'a, naawaita ninche o metaba anaa neaku menapayu. Nkolong'i uni eyaita ninche nena yarunot, eikumok apa oleng.

²⁶Ore te nkolong e ong'uan neiturrurro ninche to erata le Beraka, ore teine neisis Olaitoriani. Ore te nkaraki ina naa keji enkarna eine wueji oerata le Beraka o metabaiki ena olong.

²⁷Neitoki aarrinyo, pooki tung'ani le Yuda o Yerusalem, netii Yehoshafat dukuya ninche, errinyo aapuo Yerusalem te nchipai, amu eishoo ninche Olaitoriani enchipai tialo ilmang'ati lenye.

²⁸Nepuonu ninche Yerusalem eeta nkai oo sinkolioitin o lwululi loo usin o sekekuani, nepuo enkaji o Laitoriani.

²⁹Neiput enkuretisho e Nkai nena kitoriat pooki e nena kuapi ina kata pee ening nchere, etaarare Olaitoriani ilmang'ati loo Siraeli.

³⁰Neaku eitirring'e Yehoshafat te seriani, amu eishoo ninye Enkai enkiyeng'iyeng too nkaloli pooki.

³¹Metaa neijia apa eikuna Yehoshafat te neitore Yuda. Oloo larin tomoni uni o miet apa ninye pee eiteru aitoreisho, neitoreisho ilarin tikitam o imiet te Yerusalem. Ore apa enkarna e ng'otonye naa keji Asuba, entito e Shilhi.

³²Neibung apa ninye orrekie le Asa papaai lenye, neitu eibelekenya apaash. Etaasa ninye isidain too nkonyek o Laitoriani.

³³Ore apa iwuejitin neeika neitu eiwuang'ieki; eitu epik iltung'ana iltauja lenye nkaitin e kulikae tung'ana.

³⁴Ore nkulie kiaasin e Yehoshafat, ebaiki enkiterunoto o metabaiki enkiting'oto, neigeroki too nkatinin e Yehu olayioni le Hanani, apa naatisiraki te mbuku oo laiguanak le Israel.

³⁵Ore te siadi ena, neibung'are olaiguanani Yehoshafat Ahasia olaiguanani loo Siraeli, apa oas entorroni.

³⁶Neibung'are ninye te nchetata oo melin naapuo Tarshishi, neshetu ninche imelin te Esiong'eber.

³⁷Neitoki Eliesa olayioni le Dodawahu le Maresha, aibonisho tialo Yehoshafat, ejo, “Ore te nkaraki nimbung'are Ahasia, keidaikie Olaitoriani ina nitaasa.” Nemuta nena melin neitu ninche epuo Tarshishi.