Read MAASAI REVISED PROTESTANT 2 Intepen 22 Bible Online

2 Intepen 22 - MAASAI REVISED PROTESTANT bible

2 Intepen 22

¹Ore lelo oomanya Yerusalem neitaa Ahasia olayioni le Yehoram oti olaiguanani terishata enye. Amu ore ilo wuampa apa loo ltung'ana ooetuo tenebo Ilmarabu atua ilng'oborri, netaara metuata lelo ayiok pooki botoro. Neaku Ahasia olayioni le Yehoram olaiguanani le Yuda ninye oitoreishe.

²Oloo larin artam oaare apa Ahasia pee eiteru aitoreisho, neitoreisho ninye olari obo te Yerusalem. Ore apa enkarna e ng'otonye naa Atalia, enkakuyiaa e Omri.

³Eshomo sii apa aibung orrekie le nkaji e Ahab, amu ng'otonye apa naiguan metaasa entorroni.

⁴Etaasa apa ninye entorroni too nkonyek o Laitoriani, anaa enataasa enkaji e Ahab. Amu ore apa te siadi keeya e papaai lenye, ninche ooiguanaki ninche, neitasur ninye.

⁵Etusujayie ninye enkikoo enye, o meshomo ninye tenebo Yehoram olayioni le Ahab, ilo aiguanani le Israel, nepuo aaitayunye Hasael olaiguanani le Siria olarrabal te Ramot-gilead. Nepik iltung'ana le Siria Yoram olbae.

⁶Nerrinyo ninye alo metabaki te Yesreel te nkaraki lelo baa apa ootipikaki ninye te Rama, ina kata apa pee elo aarare Hasael olaiguanani le Siria. Nedoyio Ahasia olayioni le Yehoram, olaiguanani le Yuda alo arum Yoram olayioni le Ahab te Yesreel, amu kemuoi apa ninye.

⁷Kake etegelua apa Enkai pee eyau embatatata e Ahasia tena lototo nashomo ninye abaiki Yoram. Ore apa pee elotu ninye ine, neipang ninye alo anang'are Yehu olayioni le Nimshi, laa ninye apa etubukoko Olaitoriani eilata aput pee eidaikie enkaji e Ahab.

⁸Ore edung'ito Yehu enkiguana te nkaraki enkaji e Ahab, netumore ninye ilkituaak le Yuda o layiok loo lalashera le Ahasia, laa ninche apa ooing'orita Ahasia. Near ninche metuata.

⁹Neing'oru ninye Ahasia, neibung'i ninye eisudori tiatua Samaria, neyauni ninye enetii Yehu neari ninye metua. Nenukaa ninye amu etejo, “Nkakuyiaa lenye Yehosahafat, apa oing'oru Olaitoriani to ltau lenye pooki.” Ore te nkaji e Ahasia nemeetae oltung'ani ooidim aitoreisho.

¹⁰Ore apa pee edol Atalia, ng'otonye Ahasia nchere etua olayioni lenye, nedumunye ninye, neidaikie lelo pooki le nkaji e nkitoo te Yuda.

¹¹Kake ewa Yehoshabet ina tito o laiguanani Yoash olayioni le Ahasia nelo aisudoo ninye aitung'uaa ilkulikae ayiok lo laiguanani letaa keji pee eari metuata, nepik ninye tenebo enkaibung'ani enye olgilata oirragi. Neiko neijia Yehoshabet, ina tito o laiguanani Yehoram, ina kitok e Yehoida olapolosani. Ore te nkaraki naa enkanashe apa ninye e Ahasia, eisudoyie ninye arishie Atalia, neaku eitu ear ninye metua.

¹²Nebik ninye tenebo ninche ilarin ile, eisudori tiatua enkaji e Nkai, ina kata eitore Atalia ina kop.