Read MAASAI REVISED PROTESTANT 2 Intepen 24 Bible Online

2 Intepen 24 - MAASAI REVISED PROTESTANT bible

2 Intepen 24

¹Oloo larin oopishana apa Yoash pee eiteru aitoreisho, neitoreisho ninye ilarin artam te Yerusalem. Ore apa enkarna e ng'otonye naa Sibia e Beer-sheba.

²Neas Yoash mbaa sidain te dukuya Olaitoriani too nkolong'i pooki e Yehoida olapolosani.

³Neisho Yehoida ninye nkituaak are, netum ninye ilayiok o ntoyie.

⁴Ore te siadi ena nemut Yoash pee eitobir enkaji o Laitoriani.

⁵Neiturrur ninye ilapolosak, o Lawi, nejoki ninche, “Enchom nkanas e Yuda nisotutu too Siraeli pooki mpisai naaitobirieki enkaji e Nkai inyi, te pooki ake ari. Naa eng'ura pee isosionienie ina bae.” Kake eitu eisosion Ilawi.

⁶Neitoki olaiguanani aipotu olkitok oji Yehoida, nejoki ninye, “Kainyoo iyie pee eitu nkilikuanu too Lawi, meyauni te Yuda o te Yerusalem kodi apa natejo Musa, osinka lo Laitoriani, te umata oo Siraeli te nkaraki olng'obor le shakenisho?”

⁷Amu etigila apa ilayiok le Atalia, ina kitok arruoni, enkaji e Nkai, netaasishore sii nena tokitin pooki apa naaitisinyaki e nkaji o Laitoriani te nkaraki Baal.

⁸Neaku eitanapishe olaiguanani, neitobir ninche osanduku nepik ninye boo ina kishomi e nkaji o Laitoriani.

⁹Neibalunyeki tiatua Yuda pooki o Yerusalem, pee eyakini Olaitoriani ina kodi apa natejo Musa osinka le Nkai pee eitayu Isiraeli ti ong'ota.

¹⁰Ore ilkituaak pooki o ltung'ana pooki neshipa, neyau kodi enye aaitadoiki ilo sanduku o metaba anaa neidipayu.

¹¹Naa ore apa teneyaki Ilawi ilo sanduku iltung'ana kituaak lo laiguanani, naa tenedol ninche aajo etii mpisai kumok, nelotu olaigeroni lo laiguanani o lkitok loo lapolosak aapiku teilo sanduku, nerriny osanduku ewueji duoo netii. Neas ninche ina anaake, nesotu mpisai kumok oleng.

¹²Neisho olaiguanani o Yehoida lelo apa ooitasheiki esiaai enkaji o Laitoriani, neiger ilaguetak loo soito o laguetak loo nkeek pee eitobir ninche enkaji o Laitoriani. Tenebo sii ilaitobirak loo sekenke o suyai, pee eitobir ninche enkaji o Laitoriani.

¹³Neaku etaasishote apa lelo ootipikaki esiaai, ore enkitobirata e nkaji nelo dukuya too nkaik enye, neitobir ninche enkaji e Nkai netiu anaa apake, neitagol ninye.

¹⁴Ore ake pee eidip neyau nena pisai naatelekutua dukuya olaiguanani o Yehoida. Neitobiraki nena pisai imasaa e nkaji o Laitoriani, te nkaraki enkisiaayiare o lasarri oopejori, o ntokitin e nkorropil, o ntokitin e saabu o enkosholai. Neitayu ninche ilasarri oopejori tiatua enkaji o Laitoriani anaake too nkolong'i pooki e Yehoida.

¹⁵Kake etamorua Yehoida, neye; naa oloo larin iip o tomoni uni apa ninye ina kata pee eye.

¹⁶Nenukaa ninche ninye te nkanasa e Daudi tenebo ilaiguanak, amu etaasa apa ninye mbaa sidain te Israel, o tialo Enkai o enkaji enye.

¹⁷Ore etulusoyie keeya e Yehoida, nepuonu ilkituaak le Yuda aailejilej olaiguanani nening olaiguanani ninche.

¹⁸Neing'uaa ninche enkaji o Laitoriani Enkai oo loo menye, neisiaai Asherim o nkitanyaanyukot oo nkaitin. Nelotu engoro napi shumata Yuda o Yerusalem te nkaraki ena kitarruorroto enye.

¹⁹Ore ake eyia, eirriwua Olaitoriani iloibonok meetu aarrinyoki ninye iltung'ana, kake etanyaita ninche ening.

²⁰Nejing Enkiyang'et e Nkai Sakaria olayioni le Yehoida olapolosani; neitashe arumaki iltung'ana kop, nejoki ninche, “Nji ejo Enkai, ‘Kainyoo pee igiligili intae nkitanapat o Laitoriani o metaa meekure ibulubulu? Ore te nkaraki nitanyaita intae Olaitoriani, etanya sii ninye intae.’ ”

²¹Kake eing'orutua ninche pee ear ninye metua, ore te nkitanapata o laiguanani nenang ninye too soito to lgoriet le nkaji o Laitoriani.

²²Neaku eitu apa edamu olaiguanani Yoash esupatisho apa naitoduaa Yehoida, menye le Sakaria ninye, kake etaara olayioni lenye metua. Ore eye ninye, nejo, “Metoduaa Olaitoriani neitalaku.”

²³Ore etulusoyie olari nelotu enjore e Siria agilunore Yoash. Nepuonu ninche Yuda o Yerusalem, neidaikie ninche ilkituaak pooki loo ltung'ana, neishie tiatua olorere, neirriwaki ninche nena masaa pooki naawaita o laiguanani le Dameski.

²⁴Ore hoo naa ilkuti tung'ana apa ina jore e Siria, eishooyie Olaitoriani apik inkaik enye enjore kitok, te nkaraki natanyaita ninche Olaitoriani, Enkai oo loo menye. Neaku etudung'okito ninche enkiguana, Yoash.

²⁵Ore pee epuo ninche aaing'uaa ninye, neing'uaa ninye eeta olbae sapuk, neiguanare isinkan lenyena ninye pee ear metua, aaitalaku osarge lo layioni le Yehoida ilo apolosani, near ninche ninye metua te nchumata endapash enye. Neye ninye; nenukaa ninche ninye te nkanasa e Daudi, kake eitu ninche enukaa ninye too nkuraren oo laiguanak.

²⁶Ore apa lelo ooiguanare ninye pee ear metua naa Sabad olayioni le Shimeat le Amon, o Yehoshafat olayioni le Shimrit le Moab.

²⁷Ore mbaa oo layiok lenyena o mbaa kumok naaibarieki ninye, o ne nchetata e nkaji e Nkai neigeroki too limunot tiatua embuku oo laiguanak. Neitoreisho Amasia olayioni lenye te rishata enye.