Read MAASAI REVISED PROTESTANT 2 Intepen 3 Bible Online

2 Intepen 3 - MAASAI REVISED PROTESTANT bible

2 Intepen 3

¹Neiteru Solomon ashet enkaji o Laitoriani te Yerusalem, te nchumata o ldoinyo le Moria, teine wueji apa neipang'akinye Olaitoriani kewan te papaai lenye Daudi. Teine wueji apa netegelua Daudi, te nchumata ine apa neiutuutishoreki e Ornan ilo le Yebusi.

²Neiteru ninye ashet to lapa liare to lari liong'uan le nkitoria enye.

³Kuna apa intemeta e Solomon te nchetata e nkaji e Nkai: ore enkadoro naa intemat e nkaina tikitam oopishana, naa ntemeta e nkaina naaudo endapasho.

⁴Ore ine wueji nejing'ieki neba anaa endapasho eina aji. Ore enkadoro oo sunta naa intemat enkaina onom o ong'uan. Ore atua ina aji nemura te saabu nasila.

⁵Ore ilo gilata sapuk neikodo too ltarakua nemura te saabu nasila, neguetakino iltuka, o lpisia.

⁶Eikodo apa olaiguanani ina aji e Nkai too soito sidain oogol enkinyang'a, o te saabu naing'uaa enkop e Paraim.

⁷Neaku etipika apa ninye saabu atua ina aji, ing'apeta enyena, o loom lenyena o sunta enyena.

⁸Neitobir sii ine wueji nesinya aisul, nenyaanyuk enkadoro enye o endapasho eina aji, naa intemeta e nkaina naaudo ake enchoto nabo, nemur ninye te saabu nasila oo ntalantani iip ile.

⁹Ore enkiroishi oo lmushumaani naa shekeli nabo ometabaiki shekeli onom e saabu. Nemur ninye lelo gilat le shumata te saabu.

¹⁰Ore teine wueji nesinya aisul nepik ilkerubi oaare loo nkeek, nemur ninche te saabu.

¹¹Ore inaipuko e lelo kerubi pokira oaare naa intemeta e nkaina are enkadoro.

¹²Ore enaipukoi olkerubi obo nelo atumore enaipukoi e likae kerubi te mpolos e nkaji.

¹³Ore inaipuko e kulo kerubi nebaya te nkadoro intemeta naaudo e nkaina, neitashe ake olkerubi too nkejek enyena eing'or olgos le kutukaji.

¹⁴Neitobir ilkarash liatua, pusi, o sinteti o loonyokie, o kitani napuyiapui neitobiru ilkerubi.

¹⁵Ore te dukuya ina aji, neitobir ninye ing'apeta are naa intemeta e nkaina tomon o imiet o lpisiaai enkadoro, nepik inkopiyiani ilukuny naa intemeta imiet e nkaina enkadoro.

¹⁶Neitobir ninye olpisiai anaa osaei le murt nepik ninche enchumata e nena ng'apeta; neitobir ilgululu iip nabo neripaki ilo pisiai.

¹⁷Etipika apa ninye nena ng'apeta dukuya ina aji e Nkai, nepik ake nabo enchoto e kopikop nepik enkae enchoto e moikuape; ore ina natii enchoto e kopikop nejo ninye Yakin, ore ina natii enchoto e moikuape nejo Boas.