Read MAASAI REVISED PROTESTANT 2 Intepen 30 Bible Online

2 Intepen 30 - MAASAI REVISED PROTESTANT bible

2 Intepen 30

¹Neirriwaa Hesekia olkilikuai te Israel pooki o Yuda, neigeroki sii Efraim impala, o Manase, pee epuonu ninche enkaji o Laitoriani te Yerusalem, pee epuonu aaibung Pasaka o Laitoriani Enkai e Israel.

²Amu eibung'a olaiguanani, o ltung'ana pooki kituaak, o eumata pooki natii Yerusalem enkiguana, pee eibung Pasaka to lapa liare.

³Amu metumoki apa ninche aaibung'a te rishata enye amu eitu eitisiny ilapolosak ate, te siana naishiaakino, neitu sii eiturrurro iltung'ana te Yerusalem.

⁴Nedol olaiguanani aa sidai ina kitobirata, nedol sii ina umata aajo aisidai.

⁵Nelikioo ninche aaibalunye te Israel pooki ebaiki Beer-sheba o metabaiki Dan, nchere pee epuonu iltung'ana aaibung Sabato te nkaraki Olaitoriani Enkai e Israel, te Yerusalem, amu eitu aikata eibung te nkumoi anaa apa enatolimuoki.

⁶Nepuo ilkipaareta enkop e Israel pooki o Yuda eeta mpala naaing'uaa olaiguanani o ltung'ana lenyena kituaak, anaa enaitanapishe olaiguanani, ejo, “Lo tung'ana le Israel, entorrinyokinoto Olaitoriani, Enkai e Abraham, o Isaak, o Israel, pee eitoki sii ninye arrinyokino ilo pisiai linyi, apa otelekua too nkaik oo laiguanak le Asiria.

⁷Emitiuu intae anaa loo papaai linyi anaa ilalashera linyi, apa lemeisiligayu to Laitoriani Enkai oo loo menye, ore te nkaraki ina neitaaki ninche olmuaate, anaa enidolitata.

⁸Emiaku naa taata ilooogol ilukuny anaa apa enatiu iloo papaai linyi, kake embelekenyakinoto Olaitoriani, nipuonunu ewueji enye sinyati, apa naitisinya ninye ntarasi, nisiayiayia Olaitoriani Enkai inyi, pee etum ina goro enye napi aibelekenyayu atapaasha intae.

⁹Amu tenimbelekenyakinono intae Olaitoriani, ore ilalashera linyi o nkera inyi netum olng'ur te lelo apa ootaraitie ninche, nerrinyunye ninche aapuonu ena kop. Amu ore Olaitoriani Enkai inyi naa kenana oshoke neeta olng'ur, nemeboin enkomom enye aitapaash intae, te nimbelekenyakinono ninye.”

¹⁰Nepuo lelo kipaareta aaimaa nkanas pooki, te nkop e Efraim pooki o Manase, nepuo o metabaiki Sebulon, kake etakueniyie iltung'ana ninche nesurdaany, neikordod ninche.

¹¹Ilkuti tung'ana ake le Asheri o le Manase o le Sebulon ooitoborruote nepuonu Yerusalem.

¹²Etii sii apa enkaina o Laitoriani shumata Yuda, pee eisho ninche oltau obo oasie nena naaitanapishe olaiguanani o lkituaak lenyena, tialo ororei lo Laitoriani.

¹³Nepuonu iltung'ana kumok aaiturrurro tenebo aaibung osirua loo mukateni neitu eisuishieki; to lapa liare, eumata sapuk oleng.

¹⁴Neasisho ninche, neiwuang'ie ilpereren loo lasarri apa ootii Yerusalem, o lperereni loo lasarri oopejorieki enkorropil, neya ninche nepuo aanang'aki oerata le Kidron.

¹⁵Neyieng ninche ilkuoo le kerra le Pasaka, te nkolong e tomon oong'uan o lapa liare. Ore ilapolosak o Lawi nekurru, nepuo ninche aaitisiny ate, neyau ilasarri oopejori atua enkaji o Laitoriani.

¹⁶Nejing ninche irishat enye terisioroto enkitanapata e Musa, ilo tung'ani le Nkai. Neisuaya ilapolosak ilo sarge otang'amutua too nkaik oo Lawi.

¹⁷Amu etii apa ilkumok teina umata leitu eitisiny ate. Ore te nkaraki ina eteyiang'a Ilawi ilkuoo le kera te pooki ng'ae leitu eitisinyi, pee eitaae sinyati to Laitoriani.

¹⁸Ore teilo orora lo lorere naa Efraim eing'uaa ilkumok lenye, o Manase, o Isaakar, o Sebulon, neitu eitisiny ate, eji neinosa ake Pasaka kake mme te nkoitoi natolimuoki. Amu etoomonoko Hesekia ninche ejo, “Metapalaki Olaitoriani supat pooki tung'ani,

¹⁹oing'oru to ltau lenye Enkai, Olaitoriani Enkai oo loo menye, hoo duoo teneme too nkitanapat e wueji sinyati e nkitukuore.”

²⁰Nening Olaitoriani Hesekia, neishiunye iltung'ana.

²¹Ore iltung'ana le Israel apa ootii Yerusalem neibung osirua loo mukateni neitu eisuishieki nkolong'i naapishana, te nchipai sapuk oleng. Ore Ilawi o lapolosak neisis Olaitoriani anaake. Neranyaki te nkidimata enye pooki Olaitoriani.

²²Neirorie Hesekia aitagol lelo Lawi apa ooitodolutua enkarriyiano te nkisiayiare o Laitoriani. Nenya iltung'ana ina daa o sirua nkolong'i naapishana. Neitayu ilasarri le seriani, neisho enashe Olaitoriani Enkai oo loo menye.

²³Neitoki eumata pooki aaning'okino tenebo pee eibung osirua nkulie olong'i naapishana. Neaku eibung'a ninche nkulie olong'i naapishana, te nchipai.

²⁴Amu eishoo apa Hesekia, ilo aiguanani le Yuda eumata ilmong'i enkalifu nabo, o nkerra nkalifuni naapishana te nkaraki olasar. Ore ilkituaak neisho ina umata ilmong'i enkalifu nabo o nkerra nkalifuni tomon. Ore ilapolosak neitisiny ate te nkumoi oleng.

²⁵Ore ina umata pooki e Yuda, o ina umata pooki naing'uaa enkop e Israel, o lelo oomanya Yuda, neshipayu.

²⁶Neaku sapuk oleng enchipai te Yerusalem, amu ore ebaiki enkata e Solomon olayioni le Daudi olaiguanani le Israel, eitu aekata etumi entoki naaijo ena te Yerusalem.

²⁷Neinyototo ilapolosak o Lawi aamayian olorere, nening'i oltoilo lenye, nelotu enkomono enye ine wueji enye sinyati te keper.