Read MAASAI REVISED PROTESTANT 2 Intepen 33 Bible Online

2 Intepen 33 - MAASAI REVISED PROTESTANT bible

2 Intepen 33

¹Oloo larin tomon oaare apa Manase pee eiteru aitoreisho, neitoreisho ninye ilarin onom o imiet te Yerusalem.

²Etaasa ninye mbaa torrok too nkonyek o Laitoriani, te risioroto e nena baa olminong loo loreren apa ooiwuang'ie Enkai te dukuya iltung'ana le Israel.

³Amu enyaaka ninye ashet iwuejitin neeika apa neetigila papaai lenye Hesekia auroo. Neshetaki Baal ilpereren loo lasarri, neitobir Ashera, neserem olorora pooki le shumata, neisiaai ninche.

⁴Neshetu ilpereren loo lasarri tiatua enkaji o Laitoriani, laa ninche apa etejo Olaitoriani “Atua Yerusalem etonie enkarna ai ntarasi.”

⁵Neshetu ninye ilpereren loo lasarri ooseremieki olorora le shumata too lgorieti pokira oaare le nkaji o Laitoriani.

⁶Nepejoo ilayiok lenyena anaa olasar to erata loo layiok le Hinom. Neas ninye mbaa oo nkitumusumusot, neas ine naibon, o esakutore neton tenebo iloo ntaleng'o o lkuyantik. Etaasa ninye entorroni sapuk te dukuya Olaitoriani, neitagor ninye.

⁷Ore ina kitanyaanyukoto e nkai naitobira ninye nepik atua enkaji e Nkai, naa ninye apa etiaaka Enkai Daudi o Solomon olayioni lenye, “Ore tiatua ena aji, o te Yerusalem, naa ninye ategelua too loshon pooki le Israel, kapik enkarna ai ntarasi.

⁸Nemaigil nanu aiwuang'ie Isiraeli teinakop apa nategelaka loo papaai lino teneing'or ninche aaibung nena pooki naitanapa ninche, o nkitanapat pooki, o nkikoot o nkiguanat apa naaishoruaki aaimunye Musa.”

⁹Eteleja Manase Yuda o lelo oomanya Yerusalem, o metaasa ntorrok aaitulus te lelo oshon apa ooidaikie Olaitoriani te dukuya iltung'ana le Israel.

¹⁰Eirorie apa Olaitoriani aikok Manase o ltung'ana lenyena, kake eitu ninche ening.

¹¹Ore te nkaraki ina eyaka ninche Olaitoriani ilarikok le njore e Asiria, lelo ooibung'a Manase too lala oololo neen ninye too lpisia lo suyai, nenap ninche aaya Babilon.

¹²Ore etii ninye atua osina, neomonu omom to Laitoriani Enkai enye, neitobir kewan oleng, te dukuya Enkai oo loo menye.

¹³Neomon ninye, neng'amaa Enkai esayiata enye, o enkomono enye, neitoki Enkai arrinyoki ninye enkitoria enye tiatua Yerusalem. Neyiolou taa Manase ajo Olaitoriani ninye Enkai.

¹⁴Ore te siadi ina neshet esuntai e oriong e nkanasa e Daudi te nkalo oloo ntoluo le Gishon, to erata, te mbata e wueji nejing'ieki enkishomi e dukuya, nelo aitamanaa te Ofel. Neilepie aitoodor oleng. Etipika sii ilarikok le njore nkanas pooki naasheta isunta e Yuda.

¹⁵Neiwuang'ie ninye nena aitin oo loreren, o nkitanyaanyukot oo nkaitin aitung'uaa enkaji o Laitoriani, o lelo pereren loo lasarri apa ootesheta to ldoinyio le nkaji o Laitoriani o te Yerusalem, nenang'aki ninche auluo enkanasa.

¹⁶Neshuku sii apa olperere lo lasar lo Laitoriani, neitayu te nchumata enye ilasarri le seriani o lasarri le nashe. Neitanap ninye Yuda meisiaayia Olaitoriani Enkai e Israel.

¹⁷Ore ake eyia neton ake eitayu iltung'ana ilasarri too wuejitin o neeika, kake Olaitoriani Enkai enye ake eitaiki.

¹⁸Ore apa nkulie kiaasin e Manase, o enkomono enye e Nkai enye, o rorei le lelo aduaak apa oirorie ninye te nkarna o Laitoriani Enkai e Israel, etii atua ntepen oo laiguanak le Israel.

¹⁹Ore ina omono enye, o ina natang'amayie Enkai esayiata enye, o ng'ok enyena pooki, o enkisiligata enye, o wuejitin apa neeteshetie ilpereren loo lasarri, o eneitasheyie Asherim, o nkitanyaanyukot oo nkaitin, enapa kata eitu eitobor kewan, ng'ura eigeroki too ntepen oo laduaak.

²⁰Neaku eirure Manase etua anaa apa loo menye, nenukaa ninche ninye tiatua enkaji enye; neitoreisho Amon olayioni lenye te rishata enye.

²¹Oloo larin tikitam o are apa Amon pee eiteru aitoreisho, neitoreisho ninye ilarin oaare te Yerusalem.

²²Etaasa apa ninye ntorrok te dukuya Olaitoriani, anaa apa enataasa papaai lenye Manase. Etopolosaka apa Amon nkitanyaanyukot pooki oo nkaitin naaitobira papaai lenye Manase, neisiaai ninche.

²³Neitu ninye eitobor kewan te dukuya Olaitoriani, anaa apa enaitoborro papaai lenye Manase kewan, kake etoponayie Amon aas entorroni oleng.

²⁴Nerresh ilaisiaayiak lenyena ninye near metua tiatua aji.

²⁵Kake etara iltung'ana leina kop metuata lelo tung'ana pooki apa ootarresho olaiguanani Amon; ore iltung'ana leina kop neitaa Yosia olayioni lenye olaiguanani te rishata enye.