Read MAASAI REVISED PROTESTANT 2 Intepen 35 Bible Online

2 Intepen 35 - MAASAI REVISED PROTESTANT bible

2 Intepen 35

¹Eibung'a apa Yosia osirua lo Laitoriani le Pasaka te Yerusalem. Neyieng ninche olkuoo le Pasaka te nkolong e tomon oong'uan o lapa le dukuya.

²Etegelua apa ninye ilapolosak te nkaraki enkisiaayiare neitagol ninche te nkisiaayiare e nkaji o Laitoriani.

³Nejoki ninye Ilawi pooki laa ninche apa ooiteng'en iltung'ana loo Siraeli, naa sinyat ninche to Laitoriani, “Entipik ilo sanduku sinya tiatua ina aji apa natesheta Solomon olayioni le Daudi, olaiguanani le Israel. Meeta tipat pee intokiki aanap too loilila linyi. Esiayia naa taata Olaitoriani Enkai inyi o ltung'ana lenyena le Israel.

⁴Entobira ate te risioroto oo lmareita linyi, o lgilat linyi, nisujaa orrekie le Daudi olaiguanani loo Siraeli o rrekie le Solomon olayioni lenye.

⁵Nintasheshe teine wueji sinyati te risioroto oo nkajijik oo loo papaai linyi, o noo lalashera linyi. Naa nchoo ake metaa keeta pooki tung'ani erubata e nkaji e menye tiatua Ilawi.”

⁶Niyieng'iyieng'e olkuoo le ker lo sirua le Pasaka, nintisinyinyi ate. Nintobiriri ilalashera linyi pee easisho te risioroto o rorei lo Laitoriani oimunyeki Musa.

⁷Neisho Yosia lelo apa tung'ana leme lapolosak, pooki ootii ine, ilkuoo le kerra o le kineji le luaata enye oobaya nkalifuni tomoni uni, o loing'ok nkalifuni uni. Ore kuna pooki naa imasaa o laiguanani eing'uaa.

⁸Ore ilkituaak lenyena neitayu nkishoorot te nyorrata aaisho iltung'ana, o lapolosak, o Lawi. Ore Hilkia, o Sakaria o Yehiel lelo kituaak le nkaji e Nkai, neisho ilapolosak to sirua le Pasaka anaa nkishoorot oo lkuo le kerra, nkalifuni are o iip ile eshula o lkuoo le kineji. O loing'ok iip uni.

⁹Ore sii Konania, o Shemaia, o Natanel o lalashera lenyena, o Hashanbia o Yeiel o Yosabad, lelo kituaak loo Lawi, neisho nkishoorot e Pasaka ilkuoo le kerra o le kineji nkalifuni imiet o loing'ok iip imiet.

¹⁰Ore eidipaki aaitobira ilo sirua, neitashe ilapolosak te wueji enye, neitashe Ilawi too ntukusi enye, te risioroto enkitanapata o laiguanani.

¹¹Neyieng ninche olkuoo le Pasaka neisuaaya ilapolosak ilo sarge otang'amutua too Lawi, ore Ilawi neibung ina nateyieng'aki aapolos.

¹²Neiteng'el ninche ilasarri oopejori pee etumi aatooriki iltung'ana terisioroto oo nkajijik oo loo menye, pee eishori Olaitoriani, anaa enaigeroki too nkitanapat e Musa. Neiko ninche neijia lelo oing'ok.

¹³Nepej ninche nkiri eilo kuo le Pasaka te nkima terisioroto oo nkoon. Neyier lelo asarri oosinya too motio o too ng'irran, o too saanini dapashi, nenap ninche nabo kata aayaki olorere.

¹⁴Ore tesiadi ina neitobiraki iltung'ana ate endaa, o lapolosak amu ore apa lelo apolosak ayiok le Aron netanyamala, eitayu ilasarri oopejori, o nkiri naapir, o metaa kewarie. Neaku eitobirakita ate Ilawi o lapolosak lelo ayiok le Aron endaa.

¹⁵Ore apa ilaranyak lelo ayiok, le Asaf netii ewueji enye, terisioroto enkitanapata e Daudi o Asaf, o Heman, o Yedutum ilo aduaani lo laiguanani. Ore ilarripok le kishomi netii kishomi. Meeta apa ninche tipat naing'uarie esiaai enye amu ore ilalashera lenye, loo lawi neitobirakita ninche endaa.

¹⁶Neaku eitobiraki apa esiaai pooki o Laitoriani ina olong, pee eibung'i Pasaka neitayuni olasar opejori, tenchumata olperere lo lasar lo Laitoriani, terisioroto enkitanapata o laiguanani Yosia.

¹⁷Ore apa iltung'ana le Israel ootii ine, neibung osirua le Pasaka teina kata o osirua loo mukateni neitu eisuishieki nkolong'i naapishana.

¹⁸Eitu aekata etumi Pasaka nanyaayukie ena te Israel ebaiki nkolong'i e Samuel oloiboni le Nkai. Meetae too laiguanak le Israel oloibung'a Pasaka anaa enaibung'a Yosia, o ilapolosak o Lawi, o Yuda pooki o Siraeli ootii ine, o lelo oomanya Yerusalem.

¹⁹Ore to lari le isiet le nkitoria e Yosia neibung'aki ena Pasaka.

²⁰Ore etulusoitie kuna pooki eidipa Yosia aitobira enkaji e Nkai, nelo Neko olaiguanani le Misiri aarare Karkemish te Frati, nelo Yoash agilunore ninye.

²¹Kake eirriwaka ninye ilkiliku, ejoki, “Kainyoo iyiook kiporokino o iyie, olaiguanani le Yuda? Maatakinore nanu iyie ena olong, kake ina aji naatayie olarrabal ninye agilunore, naaitanapa nanu Enkai pee aisarrisar. Mintoki naa akeshare Enkai naa ninye natii tenebo nanu pee mikindaikie ake.”

²²Kake ore ake eyia eitu eibelekenya Yosia alo aing'uaa, kake etonyuaa ajo aarare. Eitu ninye ening irorei le Neko, ooing'uaa enkutuk Enkai, kake etijing'a ninye olarrabal tiong'ata e Megido.

²³Neng'or ilang'orok loo mbaa olaiguanani Yosia, nejoki olaiguanani isinkan lenyena, “Ewuang'ieki nanu tene, amu aatipikaki olbae torrono.”

²⁴Neaku eitayutuo isinkan lenyena ninye te ngarri oo mbartan nenap ninche tenkae garri oo mbartan, neyau ninye Yerusalem. Neye ninye, nenukari ninye too nkuraren oo loo menye. Ore Yuda pooki o Yerusalem neishiraki Yosia.

²⁵Eishiraka sii apa Yeremia Yosia, ore ilewa pooki o nkituaak pooki aranyak neranyu aalimu Yosia o metabaiki ena olong. Neitobir ninche enkitanapata te Israel, ng'ura eigero te mbuku oo nkishirat.

²⁶Ore nkulie kiaasin e Yosia, o nkiaasin enyena sidain te risioroto e nena naaigeroki too nkitanapat o Laitoriani,

²⁷o nkiaasin enyena e dukuya o kulie e siadi, ng'ura eigeroki ninche te mbuku oo laiguanak le Israel o le Yuda.