Read MAASAI REVISED PROTESTANT 2 Intepen 36 Bible Online

2 Intepen 36 - MAASAI REVISED PROTESTANT bible

2 Intepen 36

¹Ewaita iltung'ana leina kop Yoahas olayioni le Yosia neitaa ninye olaiguanani terishata e papaai lenye te Yerusalem.

²Oloo larin tikitam ookuni apa Yoahas pee eiteru aitoreisho, neitoreisho ninye ilapaitin okuni te Yerusalem.

³Neitoki olaiguanani le Misiri aaraa ninye te Yerusalem, nepikaki iltung'ana leina kop kodi e talanta iip nabo e nkosholai o talanta e saabu.

⁴Neitaa olaiguanani le Misiri Eliakim olalashe lenye olaiguanani te Yuda o te Yerusalem, neibelekeny enkarna enye ajo Yehoiakim. Kake ewa Neko olalashe lenye Yoahas Misiri.

⁵Oloo larin tikitam o imiet apa Yehoiakim pee eiteru aitoreisho neitoreisho ninye ilarin tomon oobo te Yerusalem. Neas ninye ntorrok too nkonyek o Laitoriani Enkai enye.

⁶Nelotu Nebukadnesa olaiguanani le Babilon agilunore ninye, neen ninye too lpisia neya ninye Babilon.

⁷Etanapa sii apa Nebukadnesa aya kulie tokitin e nkaji o Laitoriani Babilon, nepik ninche atua enkaji e nkitoo o laiguanani te Babilon.

⁸Ore apa nkulie kiaasin e Yehoiakim o nena tokitin o ilo minong otaasa ninye, o mbaa torrok naaipirta ninye, ng'ura eigeroki tiatua embuku oo laiguanak le Israel o le Yuda. Neitoreisho Yehoiakin olayioni lenye terishata enye.

⁹Oloo larin isiet apa Yehoiakin pee eiteru aitoreisho, neitoreisho ilapaitin okuni o nkolong'i tomon te Yerusalem. Neas ninye mbaa torrok too nkonyek o Laitoriani.

¹⁰Ore to lapa lo loirujuruj leilo ari, neirriu olaiguanani Nebukadnesa olkilikuai meyauni ninye Babilon, tenebo nena tokitin e tipat apa naa tiatua enkaji o Laitoriani neitaa olalashe lenye Sedekia olaiguanani le Yuda o Yerusalem.

¹¹Oloo larin tikitam oobo apa Sedekia pee eiteru aitoreisho, neitoreisho ninye ilarin tomon oobo te Yerusalem.

¹²Etaasa ninye mbaa torrok too nkonyek o Laitoriani Enkai enye. Eitu ninye eitobor kewan te dukuya Yeremia oloiboni le Nkai, oiroro apa alimu ilomon lo Laitoriani.

¹³Eisero apa Sedekia apaashare olaiguanani Nebukadnesa, laa ninye apa oishoo ninye meinosa olmumai tialo Enkai; negolong'u ninye neitagol oltau lenye, neany eibelekenyakino Olaitoriani Enkai e Israel.

¹⁴Ore ilapolosak pooki kituaak, oltung'ana sii neponari aaku ilemeisiligayu, nesuj olminong le lelo oshon; neisarkionie enkaji o Laitoriani, apa naitisinya ninye te Yerusalem.

¹⁵Ore Olaitoriani Enkai oo loo menye, neirriwaki ninche ilkiliku aimunye isinkan lenyena, te nkaraki naing'urrie ninye iltung'ana lenyena, o te nkaraki emanyisho enye.

¹⁶Kake etigirate ninche aamor lelo sinkan le Nkai, nemenaa irorei lenyena, nesurdaany iloibonok le Nkai, o metaba anaa nedumunye engoro o Laitoriani too iltung'ana lenyena, ometaba anaa neaku meetae olmairo.

¹⁷Ore te nkaraki ina neyau aitaar ninche olaiguanani loo Lkaldayo ilo apa otasesekuana ilbarnot lenye metuata tiatua enkaji e Nkai, nemeetayie olng'ur olbarnoti anaa esila, anaa oltung'ani kitok aashu oltung'ani moruo. Neishooyo ninche apik atua enkaina enye.

¹⁸Ore nena masaa pooki e nkaji e Nkai nkutiti o sapuki, o lchumat pooki le nkaji o Laitoriani o lchumat lo laiguanani o lkituaak lenyena, neyai nena pooki Babilon.

¹⁹Nepejoo ninche enkaji e Nkai neuroo esuntai e Yerusalem, nepejoo nkajijik enyena pooki e nkitoo te nkima. Neinyal nena tokitin pooki e tipat.

²⁰Ewa ninye eyararoto meshomo Babilon lelo apa ooilanya olalem, neaku isinkan lenyena, o metaba anaa neitasheyieki enkitoria e Pasia.

²¹Pee eitabari ororei lo Laitoriani oimua enkutuk e Yeremia, o metaba anaa neshipakino enkop Sabato. Ore te nena olong'i pooki naitomijoonoki, neibung Sabato neitabaya ilarin ntomoni naapishana.

²²Ore apa to lari le dukuya le nkitoria olaiguanani Sairas le Pasia, pee etumi aaitabai ororei lo Laitoriani oimunyeki enkutuk e Yeremia, neputu Olaitoriani oltau le Sairas olaiguanani le Pasia, neaku etolimuo aibalunye te nkitoria enye pooki, neiger sii ajo,

²³“Nji ejo Sairas olaiguanani le Pasia, ‘Ore Olaitoriani Enkai e keper, naaisho nanu nkitoriat pooki enkop, naaitanap ninye nanu pee ashetaki ninye enkaji te Yerusalem. Aa taa te Yuda. Ore pooki ng'ae tiatua intae, te kulo tung'ana pooki nchoo eaku Olaitoriani Enkai enye tenebo ninye, nchoo ninye eilep alo.’ ”