Read MAASAI REVISED PROTESTANT 2 Intepen 5 Bible Online

2 Intepen 5 - MAASAI REVISED PROTESTANT bible

2 Intepen 5

¹Neidipayu ina siaai pooki apa nataasa Solomon te nkaraki enkaji o Laitoriani. Neyau Solomon aitijing'u nena tokitin apa naaitisinya Daudi papaai lenye, neshum ina osholai o saabu, o masaa pooki teneshumishoreki e nkaji e Nkai.

²Neitoki Solomon aiturrur ilpayiani loo Siraeli o lukuny pooki oo loshon, o lukuny oo nkajijik oo loo menye too ltung'ana loo Siraeli, te Yerusalem, pee epuo aailepunye osanduku lo lning'o lo sotua lo Laitoriani aaitupuku te nkanasa e Daudi, aa taa Sion.

³Neiturrurro iltung'ana pooki loo Siraeli te dukuya olaiguanani to sirua lo lapa liopishana.

⁴Nepuonu ilpayiani pooki loo Siraeli, nenap Ilawi ilo sanduku,

⁵neyau ilo sanduku oilo ng'obor le ntumo, o nena masaa naasinya pooki naatii atua ilo ng'obor; neyau ilapolosak o Lawi ninche.

⁶Ore olaiguanani Solomon o lturrurr pooki le Israel apa oiturrurre te dukuya ninye, netii dukuya ilo sanduku, nepolos nkerra kumok o lmong'i lemeikenayu.

⁷Neaku eyautua ilapolosak ilo sanduku lo lning'o lo sotua lo Laitoriani ewueji enye, tiatua olgilata liatua leina aji, tiatua ine wueji nesinya aisul, tiabori inaipuko oo lkerubi.

⁸Amu kelak apa lelo kerubi inaipuko enye te shumata ilo sanduku lo lning'o lo sotua, neaku keitoip lelo kerubi ilo sanduku lo sotua, o mbokishi enyena.

⁹Naa kaadoru apa nena bokishi oleng, ometaa ore ineeiting'ie nelioyu teine wueji sinyati te dukuya olgilata liatua osinya. Kake melioo te boo. Netii ninche ine ometabaiki ena olong.

¹⁰Metii apa toki atua ilo sanduku meteleku ake nena baoi dapashi oo soito apa naatipika Musa te Horeb, teine apa naitobirie Olaitoriani olning'o lo sotua o ltung'ana loo Siraeli, apa pee eipang'u te nkop e Misiri.

¹¹ Ore apa pee eipang'u ilapolosak teine wueji sinyati (amu ore apa lelo apolosak pooki ootii ine neitisinya ate, meshilaa ilturrurri lenye).

¹²Ore lelo aranyak pooki le Lawi o Asaf o Heman o Yedutum o layiok lenye o lalashera lenye, neishop ilkilani sidain, neeta inkinantani dapashi o nkai oo sinkolioitin, o lwululi loo usin, neitashe te nchoto o loosaen lo lperere lo lasar, tenebo ilapolosak iip nabo o tikitam ookut intarumpetani.

¹³Naa esiaai apa oo lakutak loo sekekuani, o laranyak pee eitoning'oo ate te nkirukoto o sinkolio eisis neisho enashe Olaitoriani. Naa teneilepieki osinkolio too sekekuani o too nkinantani dapashi, o kulie ake kinantani naaranyishoreki eisisi Olaitoriani, aajo, “Eisupat ninye nebikoo enyorrata enye nauno intarasi” ore ina aji o Laitoriani neiput enkatampoi

¹⁴ometaa meeidim ilapolosak aaitasho aaisiaaisho amu eiputa apa enkitoo o Laitoriani enkaji e Nkai.