Read MAASAI REVISED PROTESTANT Esra 1 Bible Online

Esra 1 - MAASAI REVISED PROTESTANT bible

Esra 1

¹Ore to lari le dukuya le nkitoria e Sairas olaiguanani le Pasia, pee etumi aaitabai ororei lo Laitoriani te nkutuk e Yeremia, neputu Olaitoriani oltau le Sairas olaiguanani le Pasia, pee eibalunye enkitanapata te nkitoria enye pooki, neiger sii aajo:

²“Nji ejo Sairas olaiguanani le Pasia. Aaishoo nanu Olaitoriani, Enkai e keper, nkitoriat pooki enkop, naaitanapa Olaitoriani pee ashetaki ninye enkaji te Yerusalem, te nkop e Yuda.

³Ore pooki ng'ae tiatua intae iltung'ana lenyena pooki, metaa Enkai enye tenebo ninye, naa nchoo ninye eilep alo Yerusalem, te nkop e Yuda, nelo ashet enkaji o Laitoriani, Enkai oo Siraeli ninye ilo otii Yerusalem;

⁴naa nchoo pooki tung'ani otelekua, te pooki wueji nemanya ninye, eretu ninye iltung'ana le manyisho enye te nkosholai o te saabu, o too masaa o too ng'uesi, tenebo nena kishoorot olpela[1] te nkaraki ina aji e Nkai natii Yerusalem.”

⁵Nedumunye ilukuny oo nkajijik oo loo menye te Yuda o te Benchamen, o lapolosak o Lawi, o pooki ng'ae otuputuo Enkai oltau lenye pee eilep alo ashet ina aji o Laitoriani natii Yerusalem.

⁶Ore lelo pooki oomanita ninche neretu ninche too masaa e nkosholai, o te saabu, o too masaa, o too ng'uesi, o too ntokitin naagol enkinyiang'a tenebo nena pooki naaishoruaki to lpela.

⁷Neyau sii Sairas ilo aiguanani nena masaa enkaji o Laitoriani apa naawa Nebukadnesa te Yerusalem nelo apik atua enkaji oo nkaitin enyena.

⁸Neyau Sairas olaiguanani le Pasia nena pooki eitasheiki Mitrehat ilo ashumani, laa ninye oikenaka ninye pooki Sheshbasa ilo kitok le Yuda.

⁹Naa ena apa esiana enye: ng'irran enkalifu nabo e saabu, o ng'irran enkalifu nabo e nkosholai, nkalema tikitam ooudo,

¹⁰ilbakulini tomoni uni le saabu, o lbakulini nkalifuni are o iip ong'uan le nkosholai, o kulie masaa enkalifu nabo;

¹¹ore imasaa pooki e saabu o nenkosholai naa nkalifuni imiet o iip ong'uan o ntomoni ile o naaudo. Kuna pooki eyaua Sheshbasa ina kata pee eyauni ilootaarayioki metushukunye aaing'uaa Babilon nepuonu Yerusalem.