Read MAASAI REVISED PROTESTANT Esra 3 Bible Online

Esra 3 - MAASAI REVISED PROTESTANT bible

Esra 3

¹Ore ake pee ebau olapa liopishana, netii iltung'ana loo Siraeli nkang'itie, neiturrurro iltung'ana aaku tenebo te Yerusalem.

²Neitoki adumunye Yeshua olayioni le Yohasadak, tenebo ilapolosak le ncholuek enye o Serubabel olayioni le Shealtiel tenebo iltung'ana lenye le sotua, neshetu ninche olperere lo lasar le Nkai e Israel, pee etum aaitayu olasar opejori te nchumata olperere anaa enaigeroki too nkitanapat e Musa ilo tung'ani le Nkai.

³Eitasheyie apa ninche ilo perere lo lasar te ewueji enye, amu keureisho apa ninche, te nkaraki lelo tung'ana leina kop. Neitayu ninche ilasarri oopejori te nchumata enye aaitaiki Olaitoriani tadekenya o teipa.

⁴Neibung ninche osirua loo lng'oborri, anaa enaigeroki, neiken te risioroto oo nkitanapat, anaa ake anaishiaakino te nkolong.

⁵Ore te siadi ina neitayuni ilasarri oopejori lianaake, ilasarri lo lapa ng'ejuk too siruai pooki gelunot to Laitoriani, o lasarri le pooki ng'ae oitayu nkishoorot o lpela aisho Olaitoriani.

⁶Ore ebaiki enkolong e dukuya o lapa liopishana neiteru ninche aaitayu olasar opejori aaisho Olaitoriani. Kake eton eitu eshetuni olkitamanyunoto le nkaji e Nkai.

⁷Metaa eishoo apa ninche mpisai ilaguetak loo soito o laguetak loo mbaoi o endaa nanyae o enaoki o eilata aaisho ile Sidon o le Tiro, pee eyau iltarakua te Lebanon, aaya enaiposha, neya Yopa, te risioroto e nkishooroto nanoto apa ninche te Sairas olaiguanani le Pasia.

⁸Ore apa to lari liare oetunye ninche enkaji e Nkai te Yerusalem, to lapa liare, neitobir Serubabel olayioni le Shealtiel o Yeshua olayioni le Yosadak enkiterunoto, tenebo ilkulikae alashera lenye, lelo apolosak o Lawi o pooki ooetuo Yerusalem eing'ua eyararoto. Negelu ninche Ilawi ooitabaitie ilarin tikitam neilep, pee eitasheiki esiaai enkaji o Laitoriani.

⁹Ore Yeshua o layiok lenyena o ltung'ana lenye le sotua oonyikare o Kadmiel o layiok lenyena, lelo ayiok le Yuda, neitasheiki pooki ilaisiaayiak tiatua enkaji e Nkai, tenebo ilayiok le Hanadad o Lawi o layiok lenye o ltung'ana lenye le sotua oonyikare.

¹⁰Ore ake pee eiteru ilashetak olkitamanyunoto le nkaji o Laitoriani, ore ilapolosak eishopo nkilani enye e siaai nepuonu dukuya eeta sekekuani, ore Ilawi lelo ayiok le Asaf neyau isaanini dapashi enye, pee eisis Olaitoriani, te risioroto eutaroto e Daudi; olaiguanani loo Siraeli;

¹¹nerany ninche eirukokino, eisis neisho enashe Olaitoriani, ejo, “Amu aisupat ninye amu kebikoo enyorrata enye nauno ntarasi tialo Isiraeli.” Nebuaku iltung'ana pooki te mbuakunoto sapuk, ina kata eisis Olaitoriani te nkaraki naiteruaki olkitamanyunoto le nkaji o Laitoriani.

¹²Kake ilapolosak kumok o Lawi o lukuny oo nkajijik oo loomenye, ilpayiani kituaak apa ootoduaa enkaji e dukuya neyietu aaishir ina kata pee edol olkitamanyunoto lena aji eshetuni, hoo netabuakutua ilkumok te nchipai;

¹³neaku meidim iltung'ana aaitirishu oltoilo le mbuakunoto e nchipai o ltoilo lo lkiyioi loo ltung'ana; amu etabuakutua apa lelo tung'ana te mbuakunoto sapuk oleng, nening'ori ina buakunoto te nelakua.