Read MAASAI REVISED PROTESTANT Esra 4 Bible Online

Esra 4 - MAASAI REVISED PROTESTANT bible

Esra 4

¹Ore apa pee ening ilmang'ati le Yuda o Benchamen nchere ore ilapa yararot oo torrinyunye neshetita enkaji o Laitoriani, Enkai oo Siraeli,

²nepuo ninche enetii Serubabel, o lukuny oo nkajijik oo loo menye nejoki ninche, “Nchoo iyiook mateshet tenebo ntae; amu ekiserem sii iyiook Enkai inyi anaa eninkoko intae, naa aikipolosaki apa iyiook ninye ebaiki nkolong'i e Esarhadon olaiguanani le Asiria, laa ninye apa oyaua iyiook ene.”

³Kake etiaakita ninche Serubabel, o Yeshua o kulie lukuny oo nkajijik oo loomenye te Israel, “Miatata eniporokiki iyiook te nchetata e nkaji e Nkai ang; kake iyiook ake oopeny ooshetaki Olaitoriani, Enkai e Israel, anaa enaitanapa iyiook Olaiguanani Sairas, ilo aiguanani le Pasia.”

⁴Ore lelo tung'ana leina kop neitashal iltung'ana le Yuda, neitukuret ninche te nchetata,

⁵neiger ninche ilautarok oogilunore ninche pee eitashal ninche teina kiaas enye, too nkolong'i pooki e nkitoria e Sairas olaiguanani le Pasia, ometabaiki enkitoria e Dario olaiguanani le Pasia.

⁶Ore te nkitoria e Ahasero te nkiterunoto e nkitoria enye, neiger ninche enkitang'oroto te nkaraki lelo oo manya Yuda o Yerusalem.

⁷Ore apa too nkolong'i e Artaserser olaiguanani le Pasia, o Bishlam o Mitredat o Tabeel o lkulikae le ncholuek enye, neigeroki empalai Artaserser. Eigeroki apa ina palai te nkutuk e Aramea neibelekenyi.

⁸Ore apa Rehum olkitok le njore o Shimshai ilo aigeroni neiger empalai te nkaraki Yerusalem aigeroki Artaserser ilo aiguanani nejo nji

⁹neitoki Rehum ilo kitok le njore aiger o Shimshai ilo aigeroni o lelo kulikae le ncholuek enye o larishak o lbalusuni o lkituaak o le Pasia o ltung'ana le Erek o le Babilon, o ltung'ana le Susa, aa taa ile Elam,

¹⁰tenebo ilkulikae oreren laa ninche etimirayie olkitok oji Osnapar nepuo aamany nkanas e Samaria o kulie lo lkerenket otii idia alo olkeju, naa ore taata,

¹¹ena entashati eina palai apa nairriwaitie ninche - “Enetii Artaseses olaiguanani: Ore isinkan linono, lelo tung'ana lo lkerenket otii teidia alo olkeju, kirriu enkirorokino. Ore taata,

¹²nchoo eyiolou olaiguanani nchere, ore ilapa Yahudi ooetuo eing'ua enitii, nepuonu enikitii neshomo Yerusalem. Enyaakita aashet enapa anasa e ngolongu e ntorroni; eidipa ninche isunta neramita ilkitamanyunot.

¹³Nchoo naa taata eyiolou olaiguanani nchere, teneigili aashet ena anasa neidipayu isunta, meitoki ninche aalak kodi; anaa mpisai olpolosie anaa ine nkoitoi, ore mpisai enkitoria neng'oroo.

¹⁴Ore naa te nkaraki naa iyie kingarakino, nemeishiaakino iyiook nikiduaaki olaiguanani esulare, te nkaraki ena pee kirriwakita olaiguanani olkilikuai aaitayiolo,

¹⁵pee itum aing'oru enjurrunoto tiatua embuku oo mbaa oo loopapaai lino. Itum iyie tiatua embuku oo mbaa, niyiolou nchere ore ena anasa naa kegolong'u, naa enkaitooshoni too laiguanak, o too lkerenketi, netipikaki apa ninye enking'oling'ol ebaiki moitie te nkaraki ena apa pee eitaaki ena anasa olmuaate.

¹⁶Kintayiolo iyiook olaiguanani nchere, teneigili aashet ena anasa neidipayu isunta enyena, nimintoki aata enipor ilo kerenket otii lido kekun olkeju.”

¹⁷Neirriwaa olaiguanani ewalata ejo: “Enetii Rehum ilo kitok le njore o Shimshai olaigeroni o lkulikae pooki le ncholuek enye ootii Samaria otii olkerenket teidia alo olkeju, airriu enkirorokino. Naa ore taata,

¹⁸enapa palai nirriwakita iyiook neisumaki aaibalie te dukuya nanu.

¹⁹Aitayio nanu enkitanapata neitobiraki enjurrunoto, nenotoki nchere ore ena anasa ebaiki apa moitie netudumakine ilaiguanak agilunore, netii engolong'u o enkarruoisho atua ninye.

²⁰Netii apa ilaiguanak magil Yerusalem, ooitoreishote to lkerenket pooki le lido kekun olkeju, laa ninche apa elaakini kodi o mpisai o lpolosie o mpisai oo nkoitoi.

²¹Ore te nkaraki ina entobira pee elikini kulo tung'ana metapala esiaai, nemeitoki aashet ena anasa, ometaba anaa naitobir enkitanapata.

²²Naa entodol pee mintololong'ong'o ena bae; kainyoo pee eibulaa enkinyalata pee einyal ilaiguanak?”

²³Ore ake pee eisumi entashati e mpalai o laiguanani Atasese te dukuya Rehum o Shimshai olaigeroni o lelo le ncholuek enye, neisarrisar aapuo enetii Ilyahudi te Yerusalem ore te nkisikong'ata o te ngolon neitapal ninche esiaai e nchetata e nkaji e Nkai.

²⁴Ore ina siaai e nkaji e Nkai natii Yerusalem neitasheyieki; neitashe ometabau olapa liare le nkitoria e Dario olaiguanani le Pasia.