Read MAASAI REVISED PROTESTANT Nehemia 4 Bible Online

Nehemia 4 - MAASAI REVISED PROTESTANT bible

Nehemia 4

¹Ore apa pee ening Sanbalat nchere kishetita iyiook esuntai negoro oleng, neim engoro enye oleng. Nesurdaany ninye Ilyahudi.

²Nejo ninye te dukuya ilalashera lenyena o te dukuya enjore e Samaria, “Kainyoo easita kulo Yahudi tashala? Keigil ninche aaitobir ntokitin? Keigil ninche aapolosisho? Keidip ninche te nkolong nabo? Keigil ninche aaiturrur isoito, aaitayu teilo sototi loo suut naapejore.

³Netii apa Tobia olayioni le Amori embata enye, nejo ninye, ‘Ee, ore ina nashetita ninche, tenelo embarie shumata ninye, neuroo ina suntai enye oo soito!’”

⁴Naomon nanu najo, “Toning'o na Ai ang, amu etemenaki iyiook; mbelekenya iyie esurdaanyata enye meeu shumata ilukuny enye maate, naa nchoo ninche meitoroki teinakop enye e yararoto.

⁵Mintemoo iyie enkitarruorroto enye, nimincho metujuti eng'oki enye aajutoo aaiwuang'ie too nkonyek inono. Amu kintagoro ninche iyie te dukuya ilashetak.”

⁶Ina pee kishet iyiook esuntai; neiruburuba esuntai pooki tenebo, to lpisiaai le nkadoro enye. Amu keeta apa lelo tung'ana endamunoto pee eas esiaai.

⁷Kake ore ake pee ening Sanbalat o Tobia o Ilarabu o Lamori le Ashdod nchere eloito dukuya eramata e suntai e Yerusalem, netunukaki ilusien enyena, negoro ninche oleng.

⁸Neipiru ninche tenebo pee erasaki Yerusalem neyau olmilo atua ninye.

⁹Nikiomon iyiook Enkai ang, nikipik ilarripok ooibooyo ninche, dama o kewarie.

¹⁰Kake etejo apa Yuda, “Eishunye engolon oo lanapak loo lolan, naa kumok isuut, mikindim iyiook aateshet esuntai.”

¹¹Nejo ilmang'ati lang, “Meyiolou ninche toki anaa edolisho, ometaba anaa nikipuonu empolos enye, nikiaar ninche metuata, nikintasheyie esiaai.”

¹²Ore ake pee epuonu lelo Yahudi apa ootashare ilmang'ati lang, nejoki ninche iyiook katitin tomon, ore too wuejitin pooki neemanya ninche, nepuonu ninche aagilunore iyiook.

¹³Neaku ore too wuejitin neegum oo rishat e oriong e suntai, too wuasin, atipika nanu iltung'ana te risioroto oo lmareita lenye, eeta ilalema o remeta enye o nkai enye.

¹⁴Naing'orisho nanu, nadumunye, najoki lelo kituaak o larikok, o lkulikae tung'ana, “Emiureyu ninche. Entadamu Olaitoriani, laa ninye olkitok neitureisho, naa ninye omitu ilalashera linyi o layiok linyi o ntoyie inyi o nkituaak inyi o nkang'itie inyi.”

¹⁵Ore ake pee ening ilmang'ati lang nchere kitayioloito nena kitobirat enye, neibooyie Enkai, nikirrinyokino pooki suntai, nelo ake oltung'ani esiaai enye.

¹⁶Ore ebaiki ina olong neito idia alo, ore olpisiaai loo laisiaayiak laainei neas esiaai e nchetare, neibung likae pisiai iremeta o long'oi o nkai o nkilani oo lgooitie, neitashe ilarikok tioriong enkaji pooki e Yuda,

¹⁷laa ninche apa ooshetita esuntai. Ore lelo oonap ilolan, neitanapi te nkaina nabo ilolan ore te nkae aina neibung imasaa o larrabal.

¹⁸Ore ake obo loo lashetak, neenita olalem te mpolos enye eshetisho. Ore ilo tung'ani apa oosh esekekua naatashare nanu.

¹⁹Najoki nanu lelo kituaak o larikok o lkulikae tung'ana pooki, “Aisapuk esiaai, netalala oleng, neidapasha iyiook esuntai, kitalamate maate.

²⁰Ore te wueji nining'ieng'ie oltoilo le ntarumpeta, enkuetu ene nikitii. Kejing Enkai olarrabal te rishata ang.”

²¹Neaku kitaasishote iyiook teina siaai, ore olpisiaai loo ltung'ana, neibung iremeta ebaiki tadekenya o metaliooto ilakir teipa.

²²Atiaaka sii apa iltung'ana, “Nchoo pooki tung'ani o sinka lenye eirrag Yerusalem, pee etum aatorrip iyiook kewarie, neidim aataasisho dama.”

²³Metaa mme nanu, neme lalashera laainei, neme isinkan laainei, neme larripok laasujita nanu, meetae hoo obo oitayio inkilani enyena; neibung'ita ake oltung'ani imasaa enyena o larrabal te nkaina enye.