Read MAASAI REVISED PROTESTANT Nehemia 5 Bible Online

Nehemia 5 - MAASAI REVISED PROTESTANT bible

Nehemia 5

¹Nedumunye apa olkiyioi kitok loo ltung'ana o nkituaak enye te nkaraki Ilyahudi alashera lenye.

²Amu etii apa lelo oojo, “Ore iyiook tenebo o layiok lang o ntoyie ang naa eikira kumok, maing'oru iyiook entapa pee kitum aainosa pee mikiiye.”

³Keetae sii apa lelo oojo, “Kiteena te sile nkurman ang o nkurman ang oo sabibu o nkajijik ang, pee kitum entapa te nkaraki olameyu.”

⁴Netii sii lelo oojo, “Kisilenoitie mpisai te kodi o laiguanani te nkaraki nkurman ang o nkurman ang oo sabibu.

⁵Etotiutuo taata iseseni lang anaa iseseni loo lalashera lang; netotiutuo inkera ang anaa nkera enye; eji neton ake kirrumoki ilayiok lang o ntoyie ang metaa irrindiki; ore kulie oo ntoyie ang neidipaki aaitaa irrindiki; amu mikiaata engolon nikiretunye. Amu ewaita kulikae tung'ana nkurman ang o nkurman ang o sabibu.”

⁶Atagore apa oleng pee aning olkiyioi lenye o kulo rorei.

⁷Aiguane nanu makewan, nadung'oki enkiguana lelo kituaak o larikok. Najoki nanu ninche, “Intulusoitie elaakinoto e dupoto o ltung'ani ake olalashe lenye.” Naibung ina umata kitok agilunore ninche,

⁸najoki ninche, “Ore iyiook anaa enikindim nikinyiang'utua aarrinyu ilyahudi alashera lang apa ootimirakaki iloreren; kake eji imir iyie ilalashera linono eji pee etumi aatimiraki iyiook!” Etigirate ninche neitu etum ororei owalu.

⁹Kaae najo nanu, “Ore ina bae niaasitata intae neme sidai. Aimeishiaakino intae nipuopuo te uriata e Nkai ang, pee imbooyoyo nkinyalat e lelo oshon mang'ati lang?

¹⁰Ore ake sii nanu o lalashera laainei nikisilenoki ninche mpisai o entapa. Matung'uai iyiook ena dupoto.

¹¹Entorrinyoki ninche ena olong taata nkurman enye o nkurman enye oo sabibu o nkurman enye oo loirienito o nkajijik enye o maaip oo ropiyiani enye, o entapa, o enaisho oo sabibu o ina ilata apa niwaita aaitung'uaa ninche.”

¹²Neitoki ninche aajo, “Eikirrinyu iyiook kuna nimikinkilikuanu toki te ninche. Eikiaas iyiook anaa enijo.” Naipotu nanu ilapolosak nainosie ninche olmumai pee eas anaa enaisiligishore.

¹³Naitoki sii aipirripir enkila ai, najo, “Meikuna neijia Enkai aipiripiroo pooki tung'ani te nkaji enye o te siaai enye tenemeitabaya ena kisiligata. Meipiripiri ninye neitoroki.” Nejo eumata pooki, “Eesai” Neisis Olaitoriani. Neas lelo tung'ana aa naa enaisiligishore ninche.

¹⁴Ore ake sii ebaiki ina kata apa naageluni mataa olgafanai te nkop e Yuda, ebaiki olari le tikitam o metabaiki olari le tomoni uni o are le nkitoria e Arteserses ilo aiguanani, ilarin tomon o are, eitu nanu o lalashera laainei anya ina daa o lbalusui.

¹⁵Ore lelo balusuni apa le dukuya ootii te dukuya nanu neitanap iltung'ana ilolan ooiroishi, neoru ninche endaa o enaisho oo sabibu, metii shekeli artam e nkosholai. Neitore sii isinkan lenye olorere. Kake eitu nanu aas ina, te nkaraki euriata e Nkai.

¹⁶Aibung'a sii apa enchetata ena suntai, neitu aing'oru enkop. Ore isinkan laainei pooki neiturrurro teine te nkaraki esiaai.

¹⁷Ore ake sii etii apa emisa ai iltung'ana iip nabo o oonom oonya endaa tenebo nanu, Ilyahudi o lkituaak metii lelo apa ooetuo enikitii eing'uaa lelo oreren oomanita iyiook.

¹⁸Ore apa endaa naitobiri te nkolong nabo naa olkiteng obo o nkerra ile gelunot; eitobiraki sii apa ilukunkuni te nkaraki nanu. Ore ake too nkolong'i tomon netii ilbenia le naisho oo sabibu te nkumoi; ore ake etii kuna pooki eitu nanu aikilikuanu endaa naipirare olgafanai, amu keiroishi apa esinkaisho te kulo tung'ana.

¹⁹Tadamu te nkaraki esupatisho tialo nanu na Ai ai, nena pooki nataasa te nkaraki kulo tung'ana.