Read MAASAI REVISED PROTESTANT Nehemia 6 Bible Online

Nehemia 6 - MAASAI REVISED PROTESTANT bible

Nehemia 6

¹Ore apa pee elikini Sanbalat o Tobia le Geshem ilo Marabui o kulikae mang'ati lang nchere atesheta nanu ina suntai nemeekure etii ilusieta, hoo naa ore ebaiki ina kata eton eitu apik inkikeneta e kishomi.

²Naairriwaki Sanbalat o Geshem olkilikuai ejo, “Wou manototo tenebo te nkang nabo e nkisiashata e Ono.” Kake keyieu apa ninche naaitaas entorrono.

³Airriwaka nanu ninche ilkiliku ajoki, “Aasita esiaai kitok nemaidim aeu. Kainyoo pee eitashe esiaai eji pee alotu enitii?”

⁴Naairriwaki ninche nanu ilkiliku katitin ong'uan aaiko nji, nawaliki ninche aiko nji.

⁵Ore ake teina oitoi neirriu Sanbalat olkilikuai lenye te nkata e imiet, nereu olaisiaayiani lenye eeta empalai nabolo te nkaina enye.

⁶Ore tiatua ina palai neigero, ajo, “Etolimuoki tiatua iloshon, netejo sii Geshem neijia, nchere ore iyie o Lyahudi nintobiritata pee iserriserre ina pee ishetitata esuntai, naa ijo pee iyaku olaiguanani lenye te risioroto eina limunoto.

⁷Itegelua sii iloibonok pee eibalie aalimu mbaa naaipirta Yerusalem, ‘Etii olaiguanani Yuda.’ Ore naa taata kelikini olaiguanani te risioroto e kulo rorei. Ore naa taata wou matoning'oto.”

⁸Nairriwaki nanu olkilikuai ajoki, “A'a, ore nena baa nijoito netaasate, amu iyie oipirua ninche too ndamunot inono.”

⁹Amu keyieu apa pooki neiture iyiook, edamu aajo, “Keidim inkaik enye aatalepori neitiak esiaai, nemeitokini aas” kake ore iyie na Ai ntagolo iyie inkaik aainei.

¹⁰Ore apa pee alo enkaji e Shemaia olayioni le Delaia, olayioni le Mehatabel, apa oikenoyioki, nejo ninye, “Manototo iyiook tenebo tiatua enkaji e Nkai, tiatua ewueji sinyati, nikinken nkikeneta e nkaji e Nkai; amu aikipuonu ninche aar iyie tua, kewarie kipuonu ninche aar iyie tua.”

¹¹Kake atiaaka nanu ninye, “Kaisik ailanyisho to ltung'ani laaijo nanu? Ijo iyie kaitajeu enkishui ai tenalo aisudori tiatua enkaji e Nkai. Maas nanu ina.”

¹²Nayiolou nanu aitisip, nadol ajo eitu eirriu Enkai ninche, kake eibalunye ninye enaibon pee aagilunore nanu, te nkaraki naigero Tobia o Sanbalat ninye.

¹³Te nkaraki ena bae apa eigeroki ninye pee aaitukureti mataasa eng'oki tena oitoi, naatumoki ninche aaishoo enkarna torrono ejo pee aaitongu.

¹⁴Tadamu Tobia o Sanbalat, na Ai ai te risioroto e kuna baa naataasa ninche o enkoiboni sii naji No-adia o lelo kulikae oibonok laayieu naaitukuret.

¹⁵Eidipe apa ina suntai te nkolong e tikitam o miet o lapa oji Elul, too nkolong'i onom oaare.

¹⁶Ore pee ening ilmang'ati lang pooki ina, neirut iloshon pooki oomanita iyiook, neibung oloputukunyi kitok amu etumusutuo aajo etaasaki ena siaai te retoto e Nkai ang.

¹⁷Ore ake sii apa te nena olong'i, eirriwaitie ilkituaak le Yuda mpala aairriwaki Tobia, neirriwaki sii ninye Tobia ninche mpala.

¹⁸Amu ore apa iltung'ana kumok te Yuda neinosakinote olmumai o ninye, amu olaputani apa ninye le Shekania olayioni le Ara: naa olayioni lenye Yehohanan apa oyama entito e Meshulam, olayioni le Berekia.

¹⁹Eimakita sii apa nkiaasin sidain te dukuya nanu, nepuo aaliki ninye irorei latejo. Naairriwaki Tobia mpala ejo pee aaiture.