Read MAASAI REVISED PROTESTANT Nehemia 8 Bible Online

Nehemia 8 - MAASAI REVISED PROTESTANT bible

Nehemia 8

¹Neiturrurro iltung'ana pooki aatiu anaa oltung'ani obo to lkurroto ooipirakinore enkishomi e Nkare. Nejoki ninche Esra ilo aigeroni pee eyau embuku oo nkitanapat e Musa apa naishoo Olaitoriani Israel.

²Ore Esra ilo apolosani neyau nena kitanapat dukuya ina umata, oo lewa o ng'oruo o lelo pooki ooidim aatoning neyiolou, te nkolong e dukuya o lapa liopishana.

³Neisum ninye ina kitanapata eing'orita olkurroto eipirare kishomi e Nkare eiteru tadekenya enasirie o metabaiki dama eipire enkolong, te dukuya iltung'ana lelo lewa o ng'oruo o ltung'ana pooki ooidim aatoning'u. Nening'u lelo tung'ana too nkiyiaa enye ina buku oo nkitanapat.

⁴Neitashe Esra ilo aigeroni te nchumata ewueji oo nkeek neeika neitobira iltung'ana te nkaraki ina siaai; ore te mbata enye neitashe Matitia o Shema o Anaia o Uria o Hilkia o Maaseia te nkaina enye e tatene. Neitashe Pedaia o Mishael o Malkija o Hashum o Hashbadana o Sakaria o Meshulam te nkaina enye e kedianye.

⁵Nebol Esra ina buku te dukuya iltung'ana pooki, amu etii apa ninye shumata iltung'ana pooki. Ore ake pee ebol ina buku neitashe iltung'ana pooki.

⁶Neisis Esra Olaitoriani, ina Ai kitok, newal iltung'ana pooki aajo, “Eesai, Eesai,” eilepie inkaik enye; neirrug ninche ilukuny enye neserem Olaitoriani eitabaiki nkomomi enye enkop.

⁷Ore sii Yeshua o Bani o Sherebia o Yamin o Akub o Shabetai o Hodia o Maaseia o Kelita o Asariaf o Yosabad o Hanan o Pelaia lelo apolosak neretu iltung'ana aaitoning'u nkitanapat, ina kata etii iltung'ana iwuejitin enye.

⁸Neisum ninche ina buku, natii nkitanapat e Nkai, aaibalie, neitobiraki neaku etoning'utuo iltung'ana enkisumata.

⁹Ore Nehemia laa ninye apa olgafanai o Esra ilo apolosani naa olaigeroni o Lawi laa ninche ooiteng'en iltung'ana, nejoki iltung'ana pooki, “Ore ena olong naa aisinyati to Laitoriani Enkai inyi; emisinanuo niminchirishiri.” Amu eishira apa iltung'ana pooki ina kata pee ening irorei loo nkitanapat.

¹⁰Neitoki ninye ajoki ninche, “Enchom iwuejitin, enosa ntokitin naapir, niokioko enaisho oo sabibu namelok nirriwakiki erubata ilo leitu eitobirakini toki, amu ore ena olong naa aisinyati to laitoriani, nimisinanuonuo ntae, amu enchipai o Laitoriani ninye engolon inyi.”

¹¹Kaae neitigir Ilawi iltung'ana pooki, ejo, “Entigirata, amu ore ena olong naa aisinyati; emisinanuo.”

¹²Nepuo iltung'ana pooki iwuejitin enye aadaa neokisho, neirriwaa irubat, neitobir osirua kitok le nchipai, amu etoning'utuo ninche lelo rorei ooibalakinyeki ninche.

¹³Ore te nkolong e are, ore ilukuny oo nkajijik oo loo menye, too ltung'ana pooki, tenebo ilapolosak o Lawi, nepuonu tenebo enetii Esra ilo aigeroni pee etum aaiteng'enuoto irorei loo nkitanapat.

¹⁴Netum ninche eigeroki tiatua nkitanapat nchere, eitanapa apa Olaitoriani Musa pee etoni iltung'ana too lng'oborri to sirua to lapa liopishana,

¹⁵neji pee elimuni aaibalie too nkang'itie enye pooki o te Yerusalem, entejo, “Empang'a enchom ndoinyo niyauu ilng'osil lo loirien o loirien le ntim o lng'osil o ltuka, o kulikae keek eeta mbenek pee eitainyeki ilng'oborri, anaa enaingeroki.”

¹⁶Neaku eshomo iltung'ana neyau ninche, neitobiraki ate ilng'oborri ore ake oltung'ani neitushur olng'obor lenye o lgoriet lenye, o lgorieti le nkaji e Nkai, o lkurroto otii kishomi e Nkare o lkurroto otii kishomi e Efraim.

¹⁷Ore ina umata pooki e lelo apa ootorrinyunye te yararoto neitobir ilng'oborri nebik too lng'oborri amu ore ebaiki nkolong'i e Yeshua olayioni le Nuni ometabaiki ina olong eitu aekata eas iltung'ana le Israel ina. Netii apa enchipai sapuk.

¹⁸Ore too nkolong'i pooki, ebaiki enkolong e dukuya o metabaiki enkolong nabayie, neisum ninye ina buku oo nkitanapat e Nkai. Neibung ninche osirua nkolong'i naapishana; ore te nkolong e isiet neibung'i eumata nasinya, te risioroto eina kiguana.