Read MAASAI REVISED PROTESTANT Esta 1 Bible Online

Esta 1 - MAASAI REVISED PROTESTANT bible

Esta 1

¹Ore apa too nkolong'i e Serser laa ninye apa oitore ebaiki India ometabaiki Etiopia, ilkerenketi oobaya iip o tikitam oopishana.

²Ore te nena olong'i ina kata pee eton olaiguanani Serser to lorika lenye le nkitoo te Susa, naa ninye enkang kitok.

³Ore to lari liokuni le nkitoria enye neitobiraki osirua ilkituaak lenyena, o sinkan, Netii sii ilkituaak le njore le Pasia o Midia o larikok o laiguanak loo lkerenketi dukuya ninye,

⁴ina kata eitoduaya enkarsisisho e nkitoo enye e nkisisa o enkishiaa e nkitoo enye too nkolong'i kumok. Inkolong'i iip o ntomoni isiet.

⁵Ore ake pee ebaya nena olong'i, neisho olaiguanani lelo tung'ana pooki ootii Susa, ina ang kitok, ilkituaak o looti osirua too nkolong'i naapishana, tiatua enkaji e ntumo natii atua olgoriet le nkurma e ina manyisho o laiguanani.

⁶Netii ilkarash ooibor o lpusi ooika eisiong'are iusin sidain naanyokie olgiso le nkosholai o ng'apeta naashetuno too soito oowang, netii sii ilorikan dapashi le saabu o enkosholai shumata oleng'oti loo soito oonyokie o loonyori, netii isoito oogol enkinyang'a.

⁷Neisho ninche metookisho too nkikompeni e saabu oo mpukunot kumok, naa eisapuk oleng enaisho oo sabibu anaa enaikununo eleng'on[1] o laiguanani.

⁸Ore eokore naa anaa enaitanapishoteki, mearakini hoo oltung'ani amu eitanapishe olaiguanani too lkituaak lenyena pooki ootii enkaji enye e nkitoo nchere pee eas pooki tung'ani enayieu.

⁹Neisho sii Fashiti ina kitok o laiguanani inkituaak osirua teina aji e nkitoo o laiguanani Serser.

¹⁰Ore te nkolong e naapishana, etishipe oltau lo laiguanani te nkaraki enaisho oo sabibu, neitanap ninye Mehuman o Bista o Harbona o Bigta o Abaguta o Setar o Karkas, lelo sunashi oogelema oopishana ooisiaisho te dukuya olaiguanani Serser,

¹¹pee eyau Fashiti dukuya olaiguanani eishopito enkopiyia enye e nkitoo pee eitodol iltung'ana pooki o lkituaak pooki esidano enye, amu eisidai apa oleng te nking'urata.

¹²Kake etanya apa Fashiti ina kitok o laiguanani elotu teina kitanapata o laiguanani anaa enatolimutuo lelo sunashi oogelema. Neitagor ina olaiguanani oleng, netiu engoro enye anaa enkima nayupuyup tiatua ninye.

¹³Nejoki olaiguanani ilang'eni ooyiolo nkatitin, amu ilo apa olkerreti tialo olaiguanani o tialo lelo pooki arriyiak too nkitanapat o te nkiguana.

¹⁴Ore apa iltung'ana ootashare ninye naa Karshena o Shetar o Admata o Tarshishi o Meres o Marsena o Memukan, lelo kituaak oopishana le Pasia o Midia, ootoduaa enkomom o laiguanani, naa ninche ootang'asa aatoni te nkitoo enye.

¹⁵Nejoki, “Amaa te risioroto oo nkitanapat kaa eitaasi Fashiti amu eitu eas enaitanapa olaiguanani Serser natolikitio lelo sunashi oogelema?”

¹⁶Nejoki Memukan te dukuya olaiguanani o lelo kituaak, “Mme ake olaiguanani eitaasa Fashiti entorrono, kake eitaasa sii ilkituaak pooki o ltung'ana pooki ootii iloshon pooki lo laiguanani Serser.

¹⁷Amu ore ena yasata e ina kitok o laiguanani naa keyiolou nkituaak pooki, nemenu ilpayiani lenye, te neimakini aajo eitanapishe olaiguanani Serser ajo meyauni Fashiti dukuya enye, neany elotu.

¹⁸Ore ninye taata ena olong ntomonok e Pasia o Midia naaidipa aatoning olkuak le nkitok o laiguanani naa keliki ilkituaak pooki lo laiguanani, na keaku sapuk olmena o engoro.

¹⁹Tenaa keitiship ena olaiguanani, nchoo epukunye ninye enkitanapata, neigeri too nkitanapat oo Lpasia o Lmedia pee meibelekenyi, nchere meitoki ae kata Fashi alotu dukuya Serser, naa nchoo eisho olaiguanani erishata enye e nkitoo esupat alang ninye.

²⁰Ore ake pee einosuni aaibalunye ina kitanapata o laiguanani tiatua enkitoo enye pooki, aa sapuk anaa enatiu, pee eisho nkituaak enkanyit ilpayiani lenye, lkituaak o looti.”

²¹Neitiship ena utaroto olaiguanani o lkituaak, neas olaiguanani anaa enatolimuo Memukan[2].

²²Neirriwaa mpala iloshon pooki le nkitoria enye, olosho ake too lkigeroto lenye o te nkutuk enkiroroto enye, nchere pee eaku olee ake ninye pooki olaitoriani le nkaji enye, neiro te risioroto enkutuk o lorere lenye.