Read MAASAI REVISED PROTESTANT Esta 2 Bible Online

Esta 2 - MAASAI REVISED PROTESTANT bible

Esta 2

¹Ore te siadi kuna baa, ina kata pee eyagaa engoro o laiguanani Serser, nedamu Fashiti ina nataasa o ina naidipaki aatejo te nkaraki ninye.

²Nejoki isinkan lo laiguanani ooisiaaita ninye, “Nchoo meing'urakini olaiguanani ntoyie sidain.

³Negelu olaiguanani ilaitasheikinok too loshon pooki le nkitoria enye, pee eiturrurru ntoyie pooki sidain meshomo enkaji oo nkituaak te Susa teina ang kitok netoni ti abori enkirrita e Hegai ilo sunash ogelema lo laiguanani laa ninye olaing'urani loo nkituaak; nchoo meishori ninche iila enye.

⁴Ore entito naitiship olaiguanani nchoo eaku ninye enkitok enye te rishata e Fashiti.” Neitiship ina olaiguanani, neiko neijia.

⁵Netii apa Olyahudi otii Susa ina ang kitok oji enkarna enye Mordekai, olayioni le Yair, olayioni le Shimei olayioni le Kish Olbenchamini,

⁶otaarayioki apa te Yerusalem te nebo lelo ootarayioki te nebo Yekonia olaiguanani le Yuda, otaarayie Nebukadnesa olaiguanani le Babilon.

⁷Neitubulu Hadasa, aa taa Esta, entito o le nkapu lenye amu meeta apa menye nemeeta sii ng'otonye. Entito apa ninye sidai naa supat, ore ake pee eye menye o ng'otonye, neya Mordekai netiu anaa enkerai enye kewan.

⁸Ore ake pee eibulaa enkitanapata o laiguanani, neiturrurri ntoyie kumok te Susa teina aji naitasheiki Hegai, neyae sii ninye Esta atua enkaji o laiguanani nepiki abori enkirrita e Hegai laa ninye olaing'urani loo nkituaak.

⁹Neitiship ina tito ninye nenyorru ninye neisho ninye asioki ntokitin naakusore o eoroti enye e ndaa o sinkan naapishana gelunot naaing'ua enkaji o laiguanani, neisho ninye o nena sinkan enyena ewueji sidai te nkaji oo nkituaak.

¹⁰Eitu ninye elimu Esta iltung'ana lenye o lorere lenye amu eitanapa Mordekai pee melimu.

¹¹Naa ore nkolong'i pooki nelo Mordekai te dukuya ina aji oo nkituaak pee eiyiolou Esta eneikununo, tenaa keserian.

¹²Ore ake pee elotu enkata pee elo ake pooki tito enetii Serser, te siadi ilapaitin tomon ti abori nkitanapat oo nkituaak, aa taa ena apa enkata enye naisikarrare, ilapaitin ile te ilata o manemane o lapaitin ile loo sonkoyoni naarropil oo nkituaak.

¹³Ore ake pee elo entito atua ine netii olaiguanani tena oitoi, neishori pooki toki naba anaa enayieu neya eing'uaa enkaji oo nkituaak o meshomo enkaji o laiguanani.

¹⁴Nelo ninye teipa, ore tadekenya neshukunye alo olgilata li are te nkaji e Sha-ashgas ilo apa sunash ogelema lo laiguanani oing'or nkapiak; eitu eitoki alo enetii olaiguanani, meteleku te netishipe olaiguanani te ninye naa keipoti te nkarna.

¹⁵Ore pee ebau erishata e Esta entito e Abihail nkapu e Mordekai, oowa apa ninye aitaa entito enye, pee elo atua ine netii olaiguanani, eitu eikilikuanu toki meteleku ake ina natiaaka Hegai, ilo sunash ogelema lo laiguanani laa ninye oitasheiki nkituaak. Neitiship Esta nkonyek e lelo pooki ootoduaa ninye.

¹⁶Ore ake pee eyae Esta enetii olaiguanani Serser, ti atua enkaji enye e nkitoo to lapa le tomon, laa ninye olapa le Tebes to lari li opishana le nkitoria enye,

¹⁷nenyorru olaiguanani Esta aitalang inkituaak pooki, neitiship Esta olaiguanani alang nkulie toyie pooki, neaku etipika enkopiyia e nkitoria endukuya enye nepik ninye erishata e Fashiti.

¹⁸Neitoki olaiguanani aisho osirua sapuk ilkituaak lenyena pooki o sinkan; osirua le Esta. Neitoki sii aishoru empalakinoto e kodi too lkerenketi neishooyo nkishoorot te nkidimata o laiguanani.

¹⁹Ore pee eitokini aiturrur nena toyie eniare, etonita Mordekai te nkishomi o laiguanani.

²⁰Neitu elimu Esta olmarei lenye aashu iltung'ana lenye, anaa enaitanapa Mordekai; amu kening apa Esta Mordekai ebaiki apa pee eitubulu ninye.

²¹Naa ore nena olong'i, anaa enatonita Mordekai te kishomi o laiguanani, negoro oaare le lelo sunashi oogelema lo laiguanani Bigsan o Teres neing'oru eneiko pee esesekuan olaiguanani Ore ake pee eyae Esta enetii olaiguanani Serser.

²²Neyiolou Mordekai ina bae, neliki ninye Esta enkitok o laiguanani, neliki Esta olaiguanani te nkarna e Mordekai.

²³Ore ake pee ejurruni ina bae nenyorrikini aajo neijia etiu, neilili lelo tung'ana pokira aare te nchumata olchani. Neigeri nena baa te mbuku oo Ntepen[3] te dukuya olaiguanani.