Read MAASAI REVISED PROTESTANT Esta 4 Bible Online

Esta 4 - MAASAI REVISED PROTESTANT bible

Esta 4

¹Ore pee eyiolou Mordekai nena pooki naataasaki, nepolos Mordekai inkilani enyena neishop ilkuniyiani neelare nkuruon, neipang alo empolos e nkanasa, eyietu to ltoilo sapuk o te mion aishir;

²nelo ninye o metabaiki dukuya e nkishomi o laiguanani, amu meetae hoo abo oidim atijing'a enkishomi o laiguanani eishopito ilkuniyiani.

³Ore pooki kerenket otabaikia enkitanapata o laiguanani o nkiguanat enyena nesapuku olkiyioi loo Lyahudi, neen ate aaitupukoo, neyietu aaishir, nepetaa ilkumok lenye ilkuniyiani o nkuruon.

⁴Ore ake pee epuo nkaisiaayiak e Esta o lelo sunashi oogelema aainosaki, neisina oleng ina kitok o laiguanani: Neirriwaa nkilani aishop Mordekai, pee etum aitayu ilkuniyiani, kake eitu enyorraa ang'amaa nena kilani.

⁵Neitoki Esta aipot Hatak, obo le lelo sunashi oogelema lo laiguanani, laa ninye etegeluaki pee eisiaai ninye, neirriwaa ninye meshomo enetii Mordekai pee eyiolou ajo kaa ena naa ae te nkaraki nyoo pee etotiwuo neijia.

⁶Neipang Hatak alo enetii Mordekai teilo kurroto otumoreki le nkanasa te dukuya enkishomi o laiguanani.

⁷Neliki Mordekai nena pooki naataasate o esiana oo mpisai naatonyorrayie Haman alak apik olchumati lo laiguanani te mutata oo Lyahudi.

⁸Neitoki Mordekai aisho emboitati e mpalai e ina kitanapata naitayioki te Susa te nkaraki emutata enye, pee elo aitodol Esta, neinosaki ninye ilomon, neitanap meshomo enetii olaiguanani pee eomon nesai te nkaraki iltung'ana lenyena.

⁹Nelo Hatak aliki Esta ina natejo Mordekai.

¹⁰Neitoki Esta airorie Hatak neisho ninye olkilikuai oyaki Mordekai ejo,

¹¹“Ore ilaisiaayiak pooki lo laiguanani o ltung'ana loo lkerenketi pooki lo laiguanani neyiolo aajo te nelo olee aashu enkitok ajing'aki olaiguanani tiatua ine netonie eitu eipoti, naa enkitanapata nabo ake natii, ore pooki te risioroto naa keari metuata meteleku ilo oitorioki olaiguanani eng'udi enye e saabu pee epok. Naa eitu nanu aaipoti maeu atua enetii olaiguanani kuna olong'i tomoni uni.”

¹²Neliki ninche Mordekai ina natejo Esta.

¹³Neitoki Mordekai ajoki ninche metushuku ewalata enetii Esta, “Mijo taa ore tiatua enkaji o laiguanani niserian alang ilkulikae Yahudi pooki.

¹⁴Amu te nigira te nkata natiu anaa ena, naa kelotu eretoto o enjeunoto ti ae oitoi, kake ore iyie o enkaji e papaai lino nindaayaya. Naa eing'ae oyiolo tenaa ieuo ena kitoo te nkaraki enkata anaa ena?”

¹⁵Neitoki Esta ajoki ninche metawaliki Mordekai,

¹⁶“Shomo, inturrurro Ilyahudi pooki ootii Susa nieniene ate aaitupukoo te rishata ai niminyanya endaa aashu iokioko too nkolong'i uni dama o kewarie. Ore nanu o nkaisiaayiak aainei nikien sii iyiook ate aaitupukoo anaa intae. Nalo enetii olaiguanani, hoo tenaa kengilata oo nkitanapat ina naa tenaa kaye nanu naye.”

¹⁷Nelo Mordekai neas pooki toki anaa enaitanapa Esta ninye.