Read MAASAI REVISED PROTESTANT Esta 5 Bible Online

Esta 5 - MAASAI REVISED PROTESTANT bible

Esta 5

¹Ore te nkolong e uni neishop Esta nkilani enyena e nkitoo neitashe tiatua olgoriet le nkaji o laiguanani, oipirakinore ina aji o laiguanani. Neton olaiguanani to lorika lenye le nkitoo tiatua enkaji e nkitoo aipirakinore kutukaji e nkaji e nkitoo.

²Ore ake pee edol olaiguanani Esta eitashe to lgoriet, netum ninye Esta omom too nkonyek enyena neitarasaki ninye Esta ina ng'udi e saabu apa naata te nkaina enye. Nelotu Esta ayiaya neibung endukuya e ina ng'udi.

³Nejoki olaiguanani ninye, “Kainyoo Esta? Kainyoo eomonunoto ino? Eikinchori iyie, o metabaiki olpisiai le nkitoria ai.”

⁴Nejo Esta, “Tenaa keishiaakino to laiguanani, nchoo olaiguanani o Haman epuonu osirua taata laitobiraka nanu olaiguanani.”

⁵Nejo olaiguanani, “Eyau Haman entasieku, pee kitum aataas anaa enayieu Esta.” Nelotu olaiguanani o Haman ilo sirua oitobira Esta.

⁶Ore eokito enaisho oo sabibu, nejoki olaiguanani Esta, “Kainyoo olkiyioi lino? Eikinchori iyie. Naa kainyoo eomonunoto ino? Tenaa duoo ninye kolpisiai le nkitoria ai, naa keitabari ake.”

⁷Kake etejo Esta, “Ore enkolat ai o eomonunoto ai naa;

⁸tenaa kanoto nanu omom too nkonyek o laiguanani, naa tenaa keitiship olaiguanani meishoru enkolat neitabaya eomonunoto ai, nchoo olaiguanani o Haman epuonu taaisere osirua layooki aitobiraki ninche, ore taaisere naas anaa enatejo olaiguanani.”

⁹Neipang Haman ina olong alo eng'ida neshipa to ltau. Kake ore ake pee edol Haman Mordekai te nkishomi o laiguanani, nchere eitu eitashe neitu eikirikira te dukuya ninye neiput engoro te nkaraki Mordekai.

¹⁰Ore ake eyia eibooyie Haman kewon, nelo ang, neirriwaa meipoti ilchoreta lenyena o enkitok enye Seresh.

¹¹Neinosaki Haman ninche esikar o enkarsisisho enye, esiana oo layiok lenyena o enkitoo pooki naishoo ninye olaiguanani o ina nailepieki ninye aaitalang ilkituaak o laisiaayiak lo laiguanani.

¹²Neitoki Haman aponaa ajo, “Ore ninye Esta enkitok o laiguanani eitu eisho hoo ng'ae meeu te nebo olaiguanani ilo sirua oitobira ninye meteleku nanu ake. Naa ore sii taaisere aaitoomono ninye te nebo olaiguanani.

¹³Ore eyia, maaitiship kuna pooki te nadol Mordekai ilo Yahudi eton te nkishomi o laiguanani.”

¹⁴Nejoki enkitok enye Seresh o lchoreta lenyena pooki, “Nchoo eitayuni olchani ogorishoreki intemat onom enkadoro ore taaisere tadekenya niliki olaiguanani pee eiki Mordekai te nchumata e ilo shani. Nijing, iyie osirua lo laiguanani te ng'ida.” Neitiship ina walata Haman, neisho meitobiri olchani ogorishoreki.