Read MAASAI REVISED PROTESTANT Esta 6 Bible Online

Esta 6 - MAASAI REVISED PROTESTANT bible

Esta 6

¹Ore teina kewarie neitu eirura olaiguanani; neitanapisho ninye pee eyauni embuku natii mbaa naadamuni, neisumi te dukuya olaiguanani.

²Netumi eigero ajo etolimuo Mordekai Bigtana o Teres, lelo oaare tiatua isunashi oogelema lo laiguanani, apa oorripito kutuk aji, neyieu sii apa nepik inkaik enye olaiguanani Ore ake pee eyae Esta enetii olaiguanani Serser.

³Nejo olaiguanani, “Amaa kaa anyit anaa kaa kitoo eishooki Mordekai tena bae?” Nejoki ilaisiaayiak lo laiguanani ooisiaaita ninye, “Meetae enaitaasaki.”

⁴Nejo olaiguanani, “Aing'ae otii olodung'oro,” naa enalotunye Haman atua ilo odung'oro li oriong enkaji o laiguanani pee etum airorie olaiguanani pee eiki Mordekai te nchumata ilo shani ogorishoreki oitobiraka.

⁵Neliki ilaisiaayiak lo laiguanani ninye, nejoki, “Etii Haman idie, eitashe to lodung'oro.” Nejo olaiguanani, “Enchoo elotu atua aji.”

⁶Nejing'u Haman atua aji, nejoki olaiguanani ninye, “Kaa eitaasi oltung'ani oshipakino olaiguanani pee eyanyit.” Nejo Haman to ltau lenye, Kaing'ae pasa oitishipa olaiguanani pee eyanyit aitalang nanu?

⁷Neitoki Haman ajoki olaiguanani, “Ore oltung'ani oshipakino olaiguanani pee eyanyit

⁸inchoo eyauni nkilani e nkitoo naaidipa olaiguanani aishopo o ina barta naidipa olaiguanani atakedo, neishopokoki olmarisian le nkitoo endukuya enye;

⁹neishori nena kilani o ina barta eitarasakini obo loo laitasheikinok lo laiguanani oata enkitoo; nchoo ninye eishopoki ilo tung'ani oshipakino olaiguanani pee eyanyit, nerikoo ninye ekedito embarta te nkoitoi sapuk e ina ang, eitayiolo aibalunye te dukuya ninye nchere, neijia eikoni ilo tung'ani oshipakino olaiguanani pee eyanyit.”

¹⁰Neitoki olaiguanani ajoki Haman, “Isarisara intayu nena kilani o ina barta, ore anaa enitejo, nintaas ina Mordekai ilo Yahudi otonita te nkishomi o laiguanani. Mintong'or ake nabo te nena duoo nitejo.”

¹¹Neitayu Haman inkilani o embarta neishopoki Mordekai neisho ninye metakedo embarta nerikoo ninye aimie ilo kurroto otumoreki le nkanasa eibalunye ajo, “Inji eikoni oltung'ani oshipakino olaiguanani pee eyanyit.”

¹²Neitoki Mordekai ashuko alo kishomi o laiguanani. Kake eisarisara Haman alo enkaji enye eishirita neimulumula elukunya enye.

¹³Neliki Haman enkitok enye Seresh o lchoreta lenyena pooki nena baa pooki naanoto ninye. Nejoki ninye ilang'eni lenyena o enkitok enye Seresh, “Tenaa ko Lyahudi Mordekai ilo apa litang'asa adumakino mindim naa iyie ninye kake meeta nchere mibatata iyie te dukuya ninye.”

¹⁴Ore eton eirorie ninche ninye, nebau lelo sunashi oogelema lo laiguanani eisosion pee eya Haman ilo sirua oitobira Esta.