Read MAASAI REVISED PROTESTANT Esta 9 Bible Online

Esta 9 - MAASAI REVISED PROTESTANT bible

Esta 9

¹Ore to lapa le tomon o are laa olapa le Adar, te nkolong e tomon o okuni e ilo apa ina kata etinyikutua inkitanapat o laiguanani o lkilikuai lenye pee eitabari, teina olong apa ejo ilmang'ati loo Lyahudi ketum engolon te ninche, kake eibelekenye ina, aaku enkolong natumie Ilyahudi engolon too lmang'ati lenye,

²neiturrurro Ilyahudi too nkanas enye tiatua loshon pooki lo laiguanani Ahasero pee epik inkaik lelo oshi ooyieu near ninche. Nemetii oltung'ani oidim airisha ninche, amu eiputa iltung'ana pooki enkuretisho eure ninche.

³Ore ilkituaak pooki loo loshon o laitasheikinok o lbalusuni o lelo pooki oata enkitoo neretu sii ninche Ilyahudi, amu etijing'a ninche enkuretisho eure Mordekai.

⁴Amu eikitok apa Mordekai tiatua enkaji o laiguanani, ore ening'oi enye neidapashakino iloshon pooki; amu ore ilo tung'ani oji Mordekai netoponari oleng agolu.

⁵Near Ilyahudi lelo mang'ati lenye pooki to lalem, nemut, neidaikie ninche, neas anaa enayieu te lelo pooki apa ooiba ninche.

⁶Ore te Susa teina ang kitok ake near Ilyahudi metuata neidaikie ilewa iip imiet,

⁷near sii Par Shandata o Dalfon o Aspata

⁸o Parata o Adalia o Aridata

⁹o Parmashata o Arisai o Aridai o Faisata,

¹⁰ilayiok pokira tomon le Haman ole Hamedata, olmang'atinta loo Lyahudi; Kake eitu epik nkaik enye nena naataarutua.

¹¹Ore ina olong ake nelikini olaiguanani esiana e lelo ootaaraki te Susa teina ang kitok.

¹²Nejoki olaiguanani Esta enkitok o laiguanani, “Ore te Susa teina ang kitok etaara Ilyahudi ilewa iip imiet o layiok tomon le Haman, Kainyoo naa sii yie etaasa te lelo kerenketi le laiguanani ootelekutua! Kainyoo naa taata eyieuna ino? Eikinchori iyie. Naa kainyoo intoki aomonu? Amu keitabari.”

¹³Nejo Esta, “Tenaa keitiship olaiguanani, nchoo Ilyahudi ootii Susa menyaakini aanyorraki taaisere metaasa anaa ena kitanapata ena olong. Naa nchoo layiok le Haman meilili to lchani ogorishoreki.”

¹⁴Neitanapisho olaiguanani ina metaasi; neitayuni enkitanapata te Susa, neilili ilayiok pokira tomon le Haman.

¹⁵Neitoki Ilyahudi ootii Susa aaiturrurro te nkolong e tomon o ong'uan o lapa le Adar near metuata iltung'ana iip uni te Susa; kake eitu epik nkaik enye nena naataarutua.

¹⁶Ore lelo kulikae Yahudi ootii atua lelo oshon lo laiguanani neiturrurro sii ninche pee emitu ate, netum ninche enkiyagata tialo ilmang'ati lenye. Neitoki aar inkalifuni ntomoni naapishana o imiet e lelo apa ooiba ninche; kake eitu epik nkaik enye nena naataarutua.

¹⁷Te nkolong e tomon o ong'uan neyeng'iyeng'a neitaa ina olong osirua o enchipai.

¹⁸Kake ore Ilyahudi ootii Susa neiturrurro te nkolong e tomon o okuni o te nkolong e tomon o ong'uan, neyeng'iyeng'a te nkolong e tomon o imiet, aaitaa ina olong osirua o enchipai.

¹⁹Metaa ore Ilyahudi loo nkang'itie kutiti, ootoni too nkang'itie nemeeta isunta, neitaa enkolong e tomon o ong'uan olapa le Adar enkolong e nchipai, osirua o enkiyeng'iyeng, enkolong naa ninye eishorore nkishoorot.

²⁰Neiger Mordekai kuna baa, neitoki airriwaki mpala Ilyahudi pooki ootii iloshon lo laiguanani Ore ake pee eyae Esta enetii olaiguanani Serser, ilootaana o loolakua,

²¹aikok ninche pee edamu, enkolong e tomon oong'uan o lapa le Adar o enkolong sii e tomon o imiet to lari o to lari,

²²aa inkolong'i naa ninche enotie Ilyahudi enkiyagata too lmang'ati lenye, naa olapa sii oibelekenyaki te ninche metaa kepuku to sina aajing enchipai nepuku to lkiyioi aajing enkiyeng'iyeng, pee etum aaitaa ninche inkolong'i o sirua o enchipai, inkolong'i naaishorore nkishoorot maate neisho nkishoorot ilaisinak.

²³Neiruk lelo Yahudi aas anaa ina naiterutua aas, anaa sii ina naigeroko Mordekai ninche.

²⁴Amu ore Haman ilo Agagi olayioni le Hamedata, olmang'atinta loo Lyahudi pooki, eitobira pee err Ilyahudi; neidaikie ninche, netoosho Pur aa nchere enkukuo pee eparripar neidaikie ninche.

²⁵Kake ore ake pee elotu Esta dukuya olaiguanani, neishooyo inkitanapat too lkigerot nchere ore ina kitobirata enye torrono naitobira pee emuti Ilyahudi enyor nelotu shumata endukuya enye, ore ake sii neilili ninye o layiok lenyena to lchani ogorishoreki.

²⁶Nejo ninche kuna olong'i Purim, aaitusuj ilo rorei oji Pur. Metaa ore te nkaraki nena pooki naaigeroki tena palai o nena naatoduare tena bae o te nena naaetuo atua ninche.

²⁷Neitayu Ilyahudi enkitanapata neibung ninche maate o nkera enye o pooki ooibung'are ninche, nchere keibung kuna olong'i pokira are eitu eitadiak te risioroto e nena apa naaigeroki o te nkata naba anaa enageluni te pooki ari

²⁸nchere keishiaakino nedamuni kuna olong'i neibung'i tiatua iishoritin pooki ishoi, te pooki marei, o losho o enkang, naa ore kuna olong'i e Purim nemeishori aekata eimin tiatua Ilyahudi, nemepali sii enkitadamunoto tiatua ishoritin pooki.

²⁹Neitoki Esta, ina kitok o laiguanani, entito e Abihail o Mordekai ilo Yahudi, aaiger enkitanapata nalulung'a te nkitoria, aaitadedeyie ena palai e are naipirta Purim.

³⁰Neigerokini mpala Ilyahudi pooki, ootii lelo oshon tikitam o opishana lo laiguanani Ore ake pee eyae Esta enetii olaiguanani Serser, too rorei le seriani o esipata,

³¹nchere ore kuna olong'i e Purim neishiaakino neibung'i too nkatitin naatudung'okoki, anaa enaitanapa Mordekai ilo Yahudi o Esta enkitok o laiguanani Ilyahudi o ina sii nairuko aaibung ninche maate o nkera enye mbaa naaipirta eenata o enkishirata enye.

³²Neitagol enkitanapata e Esta nena baa e Purim, neigeri te mbuku.