Read MAASAI REVISED PROTESTANT Enaidurra 12 Bible Online

Enaidurra 12 - MAASAI REVISED PROTESTANT bible

Enaidurra 12

¹Nejoki Olaitoriani Musa o Aron tiatua enkop e Misiri,

²“Keaku ele apa te ntae enkiterunoto oo lapaitin; ekeaku olapa le dukuya lo lari te ntae.

³Entiaaki olturrur pooki loo Siraeli nchere ore te nkolong e tomon ele apa naa keitayu ake pooki tung'ani olkuoo le ker te risioroto oo nkajijik oo loo menye olkuoo le ker ake te nkaji;

⁴naa tenaa eikiti oleng enkaji to lkuo le ker, ore ake oltung'ani o lelatia enye otashare enkaji enye neitayu te risioroto esiana oo ltung'ana; anaa enaidim ake oltung'ani ainosa nintayuyu olkuoo le ker obo.

⁵Ore ilo kuo le ker linyi enchoo metaa meeta entioto, ositima lo lari obo, nintayuyu tiatua nkerra aashu tiatua nkineji.

⁶Nintaanyunyu ometabaiki enkolong e tomon o ong'uan ele apa, ina kata nayieng'ie olorere pooki o lturrur loo Siraeli ilkuoo lenye le kerra teipa.

⁷Neitayu ninche embata o sarge, nepik ntaloishin pokira are e kutuk aji o emolinka e kutuk aji enena ajijik naainosie ilkuoo le kerra.

⁸Nenya ninche nkiri ina kewarie, naatapejoki; te nebo imukateni neitu eisuishieki nenya sii mbenek naadua.

⁹Eminya ake te nena ejon aashu eitokitokieki te nkare, kake epejo endukuya enye te nebo loilelek lenyena o enkoshoke enye.

¹⁰Nimilekuku ake ae toki enye o mekenyu, ore pooki toki naton o mekenyu nipejoo.

¹¹Naa tena oitoi inyanya; eena ntae impolosi, etii namuka nkejek inyi netii ng'usidin inyi nkaik inyi; ninyanya te naipuk. Engiroroto ena o Laitoriani.

¹²Amu kaim atua enkop e Misiri ina kewarie, naar metuata ilkikaunot pooki tiatua enkop e Misiri nadung'oki nanu enkiguana nkaitin pooki e misiri. Kara nanu Olaitoriani.

¹³Keaku ilo sarge olmonekie te ntae, too nkajijik nitii; naa te nadol osarge nagiroo ntae, nemetii olmeitai ojing'aki ntae peyie emut ntae te naar enkop e Misiri.

¹⁴“Keaku ena olong te ntae enitumutumu aadamu, nimbung'ubung'u aitaa osirua to Laitoriani; ore tiatua ishoritin inyi pooki embung'a anaa enkitanapata oo ntarasi.”

¹⁵“Enosa imukateni neitu eisuishieki nkolong'i naapishana; ore te nkolong e dukuya niwuang'ieng'ie enkisuisho aaitayu too nkajijik inyi, amu te nenya oltung'ani emukate naisuisho, ebaiki enkolong edukuya o metabaiki enkolong e naapishana neorori ilo tung'ani aaitung'uaa Isiraeli.

¹⁶Ore te nkolong e dukuya netumo olturrur osinya; meetae esiaai naasi te nena olong'i; kake ina nanya pooki ng'ae ake intobiriri.

¹⁷Ning'oring'oro osirua loo mukateni neitu eisuishieki, amu teina olong apa aitayio ilororani linyi aitung'uaa enkop e Misiri: metaa embung'a ena olong tiatua iishoritin inyi pooki, anaa enkitanapata oo ntarasi.

¹⁸Ore to lapa le dukuya te nkolong e tomon o ong'uan o lapa te nkata e nteipa, ninyanya imukateni neitu eisuishieki ninkoko neijia o metabaiki enkolong e tikitam o obo o lapa te nkata e nteipa.

¹⁹Ore too nkolong'i naapishana enchoo metaa metumi enkisuisho too nkajijik inyi; amu te nenya oltung'ani emukate naisuisho neorori ilo tung'ani aitung'uaa olturrur loo Siraeli, enyor naa ketadokuo aashu eino teinakop.

²⁰Minyanya pooki toki naisuisho; ore too manyishoritin inyi pooki enosa imukateni neitu eisuishieki.”

²¹Neipot Musa ilpayiani pooki loo Siraeli, nejoki ninche, “Entegelaki ate ilkuoo le kerra te risioroto oo lmareita linyi, niyieng'iyieng'e ilo kuoo le ker le ng'iroroto.

²²Nintayuyu orridati le nkaitubului naji hisopo nilopilopiepie ilo sarge otii embakuli, paa ieliele emolink'a oo ntaloishin pokira are te ilo sarge otii embakuli; nemetii hoo obo linyi oipang aim kutuk aji e nkaji enye o mekenyu.

²³Amu kegiroo Olaitoriani alo aar metuata Ilmisiri; naa ore te nedol osarge te molinka o too ntaloishin pokira e kutuk aji negiroo Olaitoriani kutuk aji nemeisho ilo arani metijing'u nkajijik inyi peyie ear ntae entuata.

²⁴Embung'a ele kerreti anaa enkitanapata te ntae o too nkera inyi ntarasi.

²⁵Ore kenya ake peyie ipuonunu enkop naisho ntae Olaitoriani, anaa enatejo, nimbung'ubung'u ena kisiaayiare.

²⁶Ore ake peyie kijoki nkera inono, ‘Kene nyoo ena kisiaayiare?’

²⁷Tejo iyie, ‘Olasar lo Laitoriani le Pasaka, amu etogiroyie apa nkajijik oo ltung'ana loo Siraeli te Misiri apa peyie ear Lmisiri kake etapala nkajijik ang.’ ” Neirrug iltung'ana ilukuny enye neserem.

²⁸Nepuo iltung'ana loo Siraeli aas ina; anaa enaitanapa Olaitoriani Musa o Aron neiko neijia.

²⁹Ore te mpolos e nkewarie near metuata Olaitoriani ilkikaunot pooki te nkop e Misiri, eiteru tolkikau le Farao oton to lorika lenye le nkitoo o metabaiki olkikau le ilo oena te nkaji naenishoreki o ilkikaunot pooki loo nkishu.

³⁰Neinyototo Farao kewarie, ninye o laisiaayiak lenyena pooki o Ilmisiri pooki; netii apa olkiyioi sapuk Misiri amu metii apa enkaji neitu eye oltung'ani obo.

³¹Neipot ninye Musa o Aron te nkewarie, nejo, “Enyoito, enchom entung'uai iltung'ana laainei, intae o ltung'ana loo Siraeli; enchom esiayia Olaitoriani, anaa apa enitejo.

³²Ewaita nkerrai inyi o nchoo inyi anaa enitejo, enchom naa entamayianaki sii nanu.”

³³Neipukie Ilmisiri iltung'ana, peyie earaa ninche metupuku aaing'uaa enkop te nkisarrisar amu etejo, “Kituata pooki.”

³⁴Neya iltung'ana enkurma enye eton eitu eisuishieki o mbakulini naaipurjishoreki neimulumulari too nkilani enye nenap too loilila.

³⁵Netaasa sii iltung'ana loo Siraeli anaa enatiaaka Musa, amu etoomonutuo ilgiso loo Lmisiri le nkosholai o le saabu o nkilani.

³⁶Neishoo Olaitoriani iltung'ana omom te dukuya Ilmisiri metaa eishoo nena naatoomunutuo. Nedupore Isiraeli Ilmisiri.

³⁷Nepuo iltung'ana loo Siraeli te Rameses o metabaiki Sukot, ilewa oobaya nkalifuni ile too nkejek, metii nkituaak o nkera.

³⁸Nelo sii olorora oshula te nebo ninche o nkishu kumok oleng; o nkerrai o nchoo.

³⁹Nepej ninche imukateni neitu eisuishieki enapa kurma nayautua aaitung'uaa Misiri neitu eishori metotoni, neitu sii eitobiraki ate endaa.

⁴⁰Ore enkata natotona iltung'ana loo Siraeli te Misiri naa ilarin iip ong'uan o tomoni uni.

⁴¹Ore te siadi ilarin iip ong'uan o tomoni uni, teina olong kewan, neipang aapuo olorora pooki lo Laitoriani aaing'uaa Misiri.

⁴²Enkewarie apa netagolie Olaitoriani ninche, aitupuku ninche te nkop e Misiri; metaa ore ena kewarie naa enkewarie naing'ori to Laitoriani iltung'ana pooki loo Siraeli tiatua iishoritin enye pooki.

⁴³Nejoki Olaitoriani Musa o Aron, “Ena enkitanapata o sirua le Ng'iroroto: meetae oltung'ani omoni olo anya ilo sirua.

⁴⁴Kake ore pooki rrindik oinyiang'uaki too mpisai neidim ainosa te neidipi aatumurat ninye.

⁴⁵Menya olomoni aashu olaisiaayiani oigeroki.

⁴⁶Te nkaji nabo enyae; meyae ake hoo ae kiring'o aaipang'unye ti aji; nimigiligili ake oloito lenye.

⁴⁷Nchoo eibung ena olturrur pooki loo Siraeli.

⁴⁸Naa te nelotu oltung'ani omoni aton te nebo ntae neyieu neitaiki Olaitoriani osirua le ng'iroroto, nchoo emurati ilewa lenyena pooki. Kake meetae oltung'ani lememurata onya.

⁴⁹Enkitanapata nabo ake eetae to inoti o to ltung'ani omoni oton tiatua intae.”

⁵⁰Neiko neijia iltung'ana pooki loo Siraeli anaa enaitanapa Olaitoriani Musa o Aron neas ninche.

⁵¹Ore teina olong ake neitayu Olaitoriani iltung'ana loo Siraeli aaitung'uaa enkop e Misiri too lororani lenye.